.jpg)
កម្មករកំពុងរៀបចំវេចខ្ចប់ជីផលិតជីធម្មជាតិ នាពេលកន្លងមក។ រូបថត Huy Yun Agriculture
ភ្នំពេញៈ Huy Yun Agriculture Co.,Ltd ដែលជាក្រុមហ៊ុនផលិតជីធម្មជាតិកំពុងមានផែនការពង្រីកខ្សែចង្វាក់ផលិតកម្មខ្លួនឱ្យបានប្រមាណ ១០០ តោនក្នុង ១ ថ្ងៃ ដើម្បីបំពេញតម្រូវការទីផ្សារក្នុងស្រុកដែលកំពុងកើនឡើងជាលំដាប់។
ក្រុមហ៊ុននេះបានបង្កើតឡើងនៅឆ្នាំ ២០១៣ ស្ថិតនៅភូមិតាឡាក់ ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ។
លោក យុន សុផាត នាយកក្រុមហ៊ុន Huy Yun Agriculture បានរាយការណ៍ជូន លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទក្នុងដំណើរទស្សនកិច្ចខ្សែចង្វាក់ផលិតកម្មក្រុមហ៊ុន កាលពីថ្ងៃទី ២៦ ខែមិថុនាថា សព្វថ្ងៃនេះសិប្បកម្មផលិតជីរបស់លោកមានសមត្ថភាពផលិតជីចន្លោះពី ២០-៣០ តោនក្នុង ១ ថ្ងៃ។ លោកបន្តថា ដោយសារមានតម្រូវការកើនឡើង ក្រុមហ៊ុនគ្រោងនឹងពង្រីកសក្តានុពលផលិតជីឱ្យបាន ៥០-១០០ តោនក្នុង ១ ថ្ងៃ។
លោកនិយាយថា៖ «កម្មករ និយោជិតភាគច្រើន គឺអ្នករស់នៅក្នុងតំបន់នេះតែម្តងដែលបានបម្រើការងារនៅក្នុងសិប្បកម្មផលិតជីធម្មជាតិ»។
លោក សុផាត បានឱ្យដឹងទៀតថា វត្ថុធាតុដើមដែលក្រុមហ៊ុនយកមកប្រើមានដូចជា លាមកមាន់ គោ ជ្រូក កន្ទក់ ផេះអង្កាម ឆ្អឹងគោ និងថ្មកំបោរ ជាដើម។ ដោយឡែក វត្ថុធាតុដើមសម្រាប់ផលិតជីទឹក រួមមានសំណល់បន្លែ ផ្លែឈើគ្រប់ប្រភេទ ស្បែកគោ និងសំណល់ត្រីសមុទ្រ។
ក្នុងឱកាសនោះលោកក៏ថ្លែងអំណរគុណចំពោះរដ្ឋាភិបាលដែលបានជួយគាំទ្រ និងលើកទឹកចិត្តដល់សកម្មភាពសិប្បកម្មជីឱ្យបានដំណើរការតាំងពីថ្ងៃចាប់ផ្តើម រហូតមកទល់ពេលនេះពិសេសកិច្ចអន្តរាគមន៍របស់រដ្ឋាភិបាលលើការបញ្ចុះតម្លៃអគ្គិសនីដែលបានចូលរួមកាត់បន្ថយតម្លៃដើមផលិតបានមួយកម្រិត។
លោក វេង សាខុន បានលើកឡើងថា ក្រសួងនឹងគាំទ្រក្រុមហ៊ុនឱ្យពង្រីកសក្តានុពលផលិតជីធម្មជាតិ ដើម្បីចូលរួមបង្កើនបរិមាណផ្គត់ផ្គង់ក្នុងស្រុកតបតាមកំណើននៃការប្រើជីធម្មជាតិព្រមទាំងចូលរួមថែរក្សា និងកែលម្អគុណភាពដីកសិកម្ម កាត់បន្ថយហានិភ័យដោយសារការប្រើជីគីមីលើកសិផល កាត់បន្ថយហានិភ័យសុខភាពសាធារណៈ កាត់បន្ថយការនាំចូល និងប្រើប្រាស់ជីគីមី ពិសេសចូលរួមប្រើប្រាស់វត្ថុធាតុដើមផលិតក្នុងស្រុកឱ្យអស់ពីលទ្ធភាព។
លោករដ្ឋមន្ត្រីថ្លែងថា៖ «ការកែច្នៃវត្ថុធាតុដើមទាំងអស់នេះ ក្រសួងសូមធ្វើការគាំទ្រ និងរង់ចាំផ្តល់កិច្ចសហការបន្ថែមទាំងបច្ចេកទេសកែច្នៃ វេចខ្ចប់ និងនីតិវិធីច្បាប់ពាក់ព័ន្ធមួយចំនួន ដើម្បីចូលរួមកាត់បន្ថយផលប៉ះពាល់បរិស្ថាន ការប្រកួតប្រជែង បរិយាប័ន្ន និងការប្រែប្រួលអាកាសធាតុ ស្របតាមគោលនយោបាយរដ្ឋាភិបាល ដើម្បីអភិវឌ្ឍវិស័យកសិកម្មប្រកបដោយចីរភាព និរន្តរភាព និងវិបុលភាព»។
លោករដ្ឋមន្ត្រីក៏បានអំពាវនាវដល់ដៃគូអភិវឌ្ឍន៍ និងវិស័យឯកជនចូលរួមសហការទាំងបច្ចេកទេស និងហិរញ្ញវត្ថុ ដើម្បីពង្រីកផលិតភាពផលិតកម្ម។
កាលពីឆ្នាំ ២០២០ ក្រុមហ៊ុនផលិតជីបានចំនួន ២ ៥០៧ តោន ហើយក្នុងរយៈពេល ៦ ខែដើមឆ្នាំ ២០២១ នេះក្រុមហ៊ុនផលិតបាន ១ ០៣៥ តោន (ជីគ្រាប់ ទឹក និងម្សៅកំបោរ) ដែលលក់ក្នុងតម្លៃ ២៥០ ដុល្លារក្នុង ១ តោន (តម្លៃនេះអាស្រ័យទៅតាមថ្លៃសេវាដឹកជញ្ជូន)។ នេះបើតាម លោក យុន សុផាត។
ទិន្នន័យក្រសួងពាណិជ្ជកម្មបានឱ្យដឹងថា ក្នុងឆ្នាំ ២០២០ កម្ពុជាបាននាំចូលផលិតផលជីកសិកម្ម ថ្នាំសម្លាប់សត្វល្អិត និងស្មៅក្នុងទឹកប្រាក់សរុប ៣២៧,៥៧ លានដុល្លារកើន ១,២៥ ភាគរយធៀបនឹងឆ្នាំ ២០១៩ ដែលមាន ៣២៣,៥៤ លានដុល្លារ៕ LA
