ភ្នំពេញៈ ស្ថាប័នរដ្ឋ ឯកជន និងអង្គការក្រៅរដ្ឋាភិបាលអន្តរជាតិសំខាន់ៗ បានរួមគ្នាបង្កើតលេខាធិការដ្ឋានថ្នាក់ជាតិ ដើម្បីតម្រង់ទិសផលិតកម្មស្រូវប្រកបដោយនិរន្តរភាព (SRP)។
តាមរយៈសេចក្តីប្រកាសរួមស្ថាប័នរដ្ឋ មានអគ្គនាយកដ្ឋានកសិកម្ម (GDA) វិស័យឯកជនមានសហព័ន្ធស្រូវអង្ករកម្ពុជា (CRF) និងអង្គការអន្តរជាតិមានដូចជា អង្គការសមាគមអភិរក្សសត្វព្រៃ (WCS) អង្គការ CIRAD និងអង្គការ Swisscontact បានចុះហត្ថលេខាលើកិច្ចព្រមព្រៀង (MoA) ដើម្បីគាំទ្រការបង្កើតលេខាធិការដ្ឋានថ្នាក់ជាតិថ្មីនេះ។
MoA នេះនឹងអភិវឌ្ឍ និងផ្សព្វផ្សាយគំរូក្នុងសហគមន៍ដែលជំរុញឱ្យមានការទទួលយកទ្រង់ទ្រាយធំនៃការអនុវត្តអាកាសធាតុវៃឆ្លាតល្អបំផុត ជាមួយការចូលរួមដ៏ទូលំទូលាយ និងថ្នាក់ដឹកនាំមកពីគ្រប់ស្ថាប័នតាមរយៈចង្វាក់តម្លៃ តាមភ្នាក់ងាររដ្ឋាភិបាល និងអង្គការសង្គមស៊ីវិលមិនរកប្រាក់ចំណេញ។
ក្នុងអំឡុងពេលចុះហត្ថលេខា លោក ងិន ឆាយ អគ្គនាយកនៃអគ្គនាយកដ្ឋានកសិកម្ម (GDA) បានសម្គាល់ថា SRP ស្របគ្នានឹងផែនការយុទ្ធសាស្ត្រអភិវឌ្ឍន៍វិស័យកសិកម្ម ឆ្នាំ ២០១៩-២០២៣ ស្ដីពីការលើកកម្ពស់ផលិតភាពកសិកម្ម ការធ្វើពិពិធកម្ម សមត្ថភាពប្រកួតប្រជែង និងការដាំដុះលក្ខណៈពាណិជ្ជកម្មសម្រាប់ទីផ្សារ។
លោកថ្លែងថា៖ «ស្ដង់ដា SRP គួរតែត្រូវបានអនុវត្តឱ្យបានច្រើនតាមដែលអាចធ្វើទៅបាននូវគ្រប់ប្រព័ន្ធអេកូស៊ីស្ដែម ដើម្បីលើកកម្ពស់ផលិតកម្មស្រូវនៅកម្ពុជា ធានាសុវត្ថិភាពស្បៀង និងបង្កើនប្រាក់ចំណេញ»។
លោក Wyn Ellis នាយកប្រតិបត្តិ SRP បានសាទរភាពជាដៃគូនេះ ដោយលើកឡើងថា កម្ពុជាមានឱកាសល្អក្នុងការជំរុញការអនុវត្តនេះ។
លោកបន្តថា ការទទួលពានរង្វាន់អង្ករផ្ការំដួលរបស់កម្ពុជាផ្ដល់ភាពត្រឹមត្រូវល្អបំផុតសម្រាប់ស្ដង់ដាពិភពលោក និងក្រុមហ៊ុនលក់រាយជាមួយនឹងអង្ករដែលបញ្ជាក់ពី SRP រួចហើយនៅលើទីផ្សារនៅអឺរ៉ុប។
លោក សុង សារ៉ន ប្រធានសហព័ន្ធស្រូវអង្ករកម្ពុជាបានបង្ហាញការគាំទ្ររបស់លោកចំពោះការសម្រេចបានកិច្ចព្រមព្រៀងនេះ។
លោកបន្តថា៖ «តាមរយៈកិច្ចព្រមព្រៀងនេះ វានឹងជំរុញបន្ថែមទៀតដល់វិស័យស្រូវអង្ករកម្ពុជាជាផ្នែកមួយនៃយុទ្ធសាស្ដ្ររបស់សហព័ន្ធស្រូវអង្ករកម្ពុជា ក្នុងការធ្វើពិពិធកម្មទីផ្សារ និងពិពិធកម្មការផលិតទៅជាពូជ និងក្រុម។ ជាពិសេសអង្ករនឹងទទួលបានទីផ្សារបន្ថែមសម្រាប់កសិករខ្នាតតូចនៅកម្ពុជា ដើម្បីបង្កើនតម្លៃស្រូវ»៕ LA