.jpg)
ទីតាំងគម្រោងសាងសង់ហេដ្ឋារចនាសម្ព័នផ្លូវ និងប៉ុស្តិ៍ត្រួតពិនិត្យទំនិញនៅច្រកព្រំដែនអន្តរជាតិស្ទឹងបត់-បានណងអៀន។ រូបថត MPWT
ភ្នំពេញៈ កម្ពុជាកំពុងជំរុញការកសាងអគាររដ្ឋបាលច្រកទ្វារអន្តរជាតិស្ទឹងបត់ (កម្ពុជា) បានណងអៀង (ថៃ) ឱ្យបានលឿន ដើម្បីជួយសម្រួលដល់ការដឹកជញ្ជូនទំនិញឆ្លងព្រំដែនរវាងប្រទេសទាំង ២ ឱ្យកាន់តែមានភាពងាយស្រួល។
រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល នៅក្នុងពេលដឹកនាំគណៈប្រតិភូក្រសួង និងក្រុមការងារបច្ចេកទេសចុះទៅពិនិត្យវឌ្ឍនភាពការងារគម្រោងសាងសង់អគាររដ្ឋបាលច្រកទ្វារអន្តរជាតិស្ទឹងបត់បានណងអៀង កាលពីថ្ងៃទី ៣០ ខែមិថុនា បានឱ្យដឹងថា ការសាងសង់គម្រោងនេះត្រូវចំណាយថវិកា ២៦,៨៥ លានដុល្លារ ដែលជាឥណទានពីទីភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចប្រទេសជិតខាង (NEDA)។
លោក ចាន់ថុល បាននិយាយថា៖ «ការចុះពិនិត្យនេះធ្វើឡើងក្នុងគោលបំណងដើម្បីធ្វើយ៉ាងណាឱ្យបានសម្រេចតាមផែនការគ្រោងទុកដែលវានឹងជួយសម្រួលដល់ការដឹកជញ្ជូនឆ្លងកាត់ព្រំដែនកាន់តែងាយស្រួល និងរួមចំណែកលើកស្ទួយដល់កំណើនសេដ្ឋកិច្ចជាតិ»។
លោក វ៉ា ស៊ីមសុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ថា ការសាងសង់នៅពេលនេះទើបនឹងសម្រេចប្រហែល ១២ ភាគរយប៉ុណ្ណោះ ខណៈការសាងសង់ប៉ុស្តិ៍ត្រួតពិនិត្យទំនិញបណ្តោះអាសន្ន និងហេដ្ឋារចនាសម្ព័ន្ធនានាបាននិងកំពុងដំណើរការជាបន្តបន្ទាប់។
លោកបន្តថា៖ «ការរាតត្បាតជំងឺកូវីដ ១៩ នៅក្រុងប៉ោយប៉ែតបានធ្វើឱ្យប៉ះពាល់ដល់ដំណើរការគម្រោងខ្លះៗ។ ឯកឧត្តមរដ្ឋមន្ត្រីចុះទៅត្រួតពិនិត្យពីវឌ្ឍនភាពនៃការសាងសង់អគារ និងហេដ្ឋារចនាសម្ព័ន្ធផ្សេងៗនៅពេលនេះ គឺដើម្បីអាចឱ្យដំណើរការបណ្តោះអាសន្នសិននៅច្រកស្ទឹងបត់បាណង់អៀង»។
បើតាមលោក សុរិយា ការរៀបចំបើកច្រកនេះបណ្តោះអាសន្នគឺរដ្ឋបាលខេត្តបន្ទាយមានជ័យកំពុងធ្វើការជាមួយអាជ្ញាធរខេត្តស្រះកែវរបស់ថៃ។
យោងតាមកាសែត Bangkok Post ចេញផ្សាយកាលពីខែមុនបានឱ្យដឹងថា ការសាងសង់ផ្លូវពីខេត្តស្រះកែវរបស់ថៃតភ្ជាប់មកច្រកទ្វារអន្តរជាតិស្ទឹងបត់ក្នុងខេត្តបន្ទាយមានជ័យសម្រេចបាន ៧០ ភាគរយហើយ ដោយគ្រោងនឹងបញ្ចប់នៅខែកុម្ភៈ ឆ្នាំ ២០២២។ ផ្លូវនេះនឹងចំណាយថវិកាប្រមាណ ៦៣,៧១ លានដុល្លារ។
ពាណិជ្ជកម្មទ្វេភាគីកម្ពុជា-ថៃក្នុងត្រីមាសទី១ ឆ្នាំ ២០២១ មានតម្លៃសរុប ២ ០៩៧, ៣៤ លានដុល្លារ ធ្លាក់ចុះ ២១,៣៦ ភាគរយធៀបនឹងរយៈពេលដូចគ្នាឆ្នាំ ២០២០ ក្នុងនោះ កម្ពុជាបាននាំចេញទៅថៃមានចំនួន ៣២៩,៥៤ លានដុល្លារ ធ្លាក់ចុះ ៤៨,៩២ ភាគរយ ហើយកម្ពុជានាំចូលវិញមានតម្លៃ ១ ៧៦៧,៨ លានដុល្លារ ធ្លាក់ចុះ ១២,៥៧ ភាគរយ។ នេះបើតាមទិន្នន័យពីនាយកដ្ឋានពាណិជ្ជកម្មការបរទេសប្រទេសថៃ៕ LA
