ភ្នំពេញៈ ដោយស្ថានភាពជំងឺកូវីដ ១៩ នៃព្រឹត្តិការណ៍សហគមន៍ ២០ កុម្ភៈ នៅតែបន្តវិវឌ្ឍខ្លួនគួរឱ្យបារម្ភដែលបានបង្កើននូវសម្ពាធផ្នែកសង្គមសេដ្ឋកិច្ច រាជរដ្ឋាភិបាលបានសម្រេចដាក់ចេញនូវវិធានការជាបន្តទៀត ដើម្បីជួយលំនឹងអាជីវកម្ម ធុរកិច្ចក្នុងវិស័យដែលទទួលរងផលប៉ះពាល់ធ្ងន់ធ្ងរ។ នេះបើតាមសេចក្តីប្រកាសព័ត៌មានរបស់រដ្ឋាភិបាលបានផ្សាយនៅថ្ងៃទី ៣០ ខែមិថុនា។
រាជរដ្ឋាភិបាលកម្ពុជានឹងបន្តផ្តល់ប្រាក់ឧបត្ថម្ភ ៤០ ដុល្លារ ក្នុង ១ ខែសម្រាប់កម្មករនិយោជិតម្នាក់ក្នុងវិស័យកាត់ដេរវាយនភណ្ឌ ស្បែកជើង ផលិតផល ធ្វើដំណើរ កាបូប និងវិស័យទេសចរណ៍សម្រាប់រយៈពេល ៣ ខែបន្ថែមទៀត (កក្កដា-កញ្ញា)។ ម្ចាស់រោងចក្រ សហគ្រាសក្នុងវិស័យរៀបរាប់ខាងលើត្រូវបន្ថែម ៣០ ដុល្លារ ឱ្យកម្មករនិយោជិត ម្នាក់ (សរុបចំនួន ៧០ ដុល្លារក្នុង ១ ខែ)។
សេចក្តីប្រកាសព័ត៌មានបន្តថា រដ្ឋាភិបាលបន្តផ្តល់ប្រាក់ឧបត្ថម្ភ ៤០ ដុល្លារក្នុង ១ ខែជូនកម្មករ និយោជិត ១ នាក់ដែលបំពេញការងារក្នុងសណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ សម្រាប់រយៈពេល ៣ ខែបន្ថែមទៀត (កក្កដា-កញ្ញា)។ សហគ្រាស និងអាជីវកម្មក្នុងវិស័យទេសចរណ៍ត្រូវរួមចំណែកតាមគោលការណ៍ស្ម័គ្រចិត្ត និងតាមលទ្ធភាពជាក់ស្តែងបន្ថែមលើអ្វីដែលរាជរដ្ឋាភិបាលបានផ្តល់ជូន។
រដ្ឋាភិបាលក៏បន្តលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាព អាជីវកម្មនៅក្នុងរាជធានីភ្នំពេញ ខេត្តសៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែត សម្រាប់រយៈពេល ៣ ខែទៀត (កក្កដា ដល់កញ្ញា)។
ប៉ុន្តែអាជីវកម្មទាំងនេះ នៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់គ្រប់គ្រងអាករលើតម្លៃបន្ថែម (E-VAT) ជារៀងរាល់ខែក្នុងអំឡុងពេលនៃការលើកលែងនេះ។
ប្រធានសមាគមភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន ឱ្យដឹងថា វិធានការជុំទី ៩ នឹងជួយដល់អាជីវកម្មក្នុងវិស័យទេសចរណ៍បន្តរស់នៅក្នុងស្ថានភាពដ៏លំបាកនេះ។
អ្នកស្រីនិយាយថា៖ «វិធានការនេះអាចជួយកាត់បន្ថយការចំណាយរបស់អាជីវកម្មក្នុងវិស័យទេសចរណ៍បានមួយផ្នែកពិសេស កម្មករ-និយោជិតដែលបន្តទទួលបានប្រាក់ឧបត្ថម្ភខ្លះ»។
វិធានការបន្តជួយវិស័យអាកាសចរណ៍បន្តលើកលែងការបង់ពន្ធអប្បបរមា (Minimum Tax) សម្រាប់រយៈពេល ៣ ខែបន្ថែមទៀត (កក្កដា ដល់កញ្ញា) ជូនដល់ក្រុមហ៊ុនអាកាសចរណ៍ ដែលបានចុះបញ្ជីនៅកម្ពុជាព្រមទាំងបន្តពន្យារការបង់ប្រាក់ជំពាក់កម្រៃអាកាសចរណ៍ស៊ីវិល សម្រាប់រយៈពេល ៣ ខែបន្ថែមទៀត (កក្កដា ដល់ ខែកញ្ញា) និងអនុញ្ញាតឱ្យក្រុមហ៊ុនអាកាសចរណ៍ទាំងនោះរៀបចំបង់ប្រាក់ជំពាក់នោះជាដំណាក់កាល ក្រោយពីរយៈពេលពន្យារនេះ។
វិធានការនេះក៏នឹងជួយវិស័យដឹកជញ្ជូន និងឡូជីស្ទីក ដោយលើកលែងកម្រៃអាជ្ញាប័ណ្ណជើងសាគយសម្រាប់ឆ្នាំ ២០២១ និង ២០២២។ ការពន្យារពេលនេះនឹងត្រូវផ្អែកលើការវាយតម្លៃជាបន្តបន្ទាប់នូវស្ថានភាពសង្គមសេដ្ឋកិច្ចជាក់ស្តែង។
លោក ជា ចាន់ដារ៉ា ប្រធានសមាគមពាណិជ្ជកម្មដឹកជញ្ជូនទំនិញ បានស្វាគមន៍ និងគាំទ្រដែលរដ្ឋាភិបាលបន្តដាក់ចេញវិធានការជាបន្តបន្ទាប់ក្នុងការជួយដល់វិស័យឯកជនក្នុងការសម្រាលបន្ទុកក្នុងអំឡុងពេលនៃការរាតត្បាតជំងឺកូវីដ ១៩។ ការលើកលែងកម្រៃអាជ្ញាប័ណ្ណជើងសាគយ គឺជាការកាត់បន្ថយការចំណាយខ្លះដល់ក្រុមហ៊ុនដឹកជញ្ជូនដែលរងផលប៉ះពាល់នៃសកម្មភាពអាជីវកម្មនៅក្នុងអំឡុងពេលនេះ។
លោកប្រាប់ថា៖ «ខ្ញុំគិតថារដ្ឋាភិបាលមានការគិតគូរវែងឆ្ងាយដល់វិស័យឯកជនចាប់តាំងពីមានជំងឺកូវីដ ១៩ នៃព្រឹត្តិការណ៍សហគមន៍ ២០ កុម្ភៈ រហូតមកបច្ចុប្បន្ន ដូចនេះវិធានការរដ្ឋាភិបាលពិតជាបានជួយកាត់បន្ថយចំណាយផ្សេងៗដល់ក្រុមហ៊ុនដឹកជញ្ជូននានាក្នុងអំឡុងពេលនេះ»។
ទន្ទឹមនឹងនេះ បេឡាជាតិសន្តិសុខសង្គម ក្នុងអំឡុងពេលព្យួរអាជីវកម្ម ឬផ្អាកដំណើរការអាជីវកម្មនឹងបន្តពន្យារការចាប់ផ្តើមអនុវត្តរបបសន្តិសុខសង្គមផ្នែកសោធនរយៈពេល ៦ ខែបន្តទៀតគឺរហូតដល់ដំណាច់ខែធ្នូ ឆ្នាំ ២០២១។ ការពន្យារពេលនេះនឹងត្រូវផ្អែកលើការវាយតម្លៃជាបន្តបន្ទាប់នូវស្ថានភាពសង្គមសេដ្ឋកិច្ចជាក់ស្តែង។
កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះនឹងបន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធប្រឆាំងនឹងជំងឺកូវីដ ១៩ សម្រាប់រយៈពេល ៣ ខែបន្ថែមទៀត (ខែកក្កដា ដល់កញ្ញា)៕ LA