.jpg)
លោក ស៊ុន ចាន់ថុល ចូលរួមប្រជុំក្នុងវេទិកាសេដ្ឋកិច្ចពិភពលោកកាលពីថ្ងៃទី ២៩ ខែមិថុនា។ ក្រសួងសាធារណការ
ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បាននិយាយថា ប្រព័ន្ធឌីជីថលមានតួនាទីសំខាន់ក្នុងការកាត់បន្ថយផលប៉ះពាល់ពីជំងឺកូវីដ ១៩ និងជាដំណោះស្រាយប្រកបដោយប្រសិទ្ធភាព ដើម្បីទ្រទ្រង់សកម្មភាពសាធារណៈ និងពាណិជ្ជកម្ម។
ការលើកឡើងនេះត្រូវបានធ្វើឡើងនៅក្នុងវេទិកាសេដ្ឋកិច្ចពិភពលោកក្រោមប្រធានបទ «ការងើបឡើងវិញនៃសកម្មភាពពាណិជ្ជកម្ម៖ ការលើកកម្ពស់សេដ្ឋកិច្ចតំបន់ឡើងវិញជាមួយខ្សែចង្វាក់ផ្គត់ផ្គង់ប្រកបដោយភាពធន់» តាមប្រព័ន្ធអនឡាញកាលពីថ្ងៃទី ២៩ ខែមិថុនា។
លោក ស៊ុន ចាន់ថុល បានថ្លែងថា កម្ពុជាបានកំណត់អាទិភាពរបស់ខ្លួននៅក្នុងការជំរុញប្រព័ន្ធឌីជីថល ដើម្បីធានាបាននូវលំហូរដោយរលូននៃទំនិញ សេវា ការងារជំនាញ មូលធន និងទិន្នន័យ ដូចនេះកម្ពុជាចាំបាច់ត្រូវផ្តោតជាសំខាន់លើកិច្ចសហប្រតិបត្តិការច្បាប់ និងស្ថាប័ន ដើម្បីសម្របខ្លួននឹងបដិវត្តន៍ឌីជីថល សម្រាប់ពាណិជ្ជកម្ម ការវិនិយោគ កិច្ចសម្រួលពាណិជ្ជកម្ម សហគ្រាសខ្នាតតូច និងមធ្យម និងការអភិវឌ្ឍជំនាញឱ្យកាន់តែមានប្រសិទ្ធភាពជាងមុន។
លោកស្រី ជុំ ម៉ូនីកា នាយិកាក្រុមហ៊ុន Visa Inc ប្រចាំកម្ពុជា ដែលជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធឌីជីថល កាលពីពេលថ្មីៗនេះបានឱ្យដឹងថា ចាប់តាំងពីមានការផ្ទុះជំងឺកូវីដ ១៩ ការទូទាត់ប្រាក់តាមប្រព័ន្ធឌីជីថលតាមបណ្តាប្រទេសតំបន់អាស៊ានមានការកើនគួរឱ្យកត់សម្គាល់ ដោយការប្រើប្រាស់សាច់ប្រាក់សុទ្ធបានកាត់បន្ថយ ៤៤ ភាគរយ ធៀបនឹងមុនពេលមានជំងឺកូវីដ ១៩។ លោកស្រីបានបន្ថែមថា៖ «សុវត្ថិភាព និងបរិយាប័ន្នហិរញ្ញវត្ថុ គឺជាហេតុផលចម្បងសម្រាប់ការប្រើប្រាស់ការទូទាត់តាមឌីជីថល»។
បើតាមលោក ចាន់ថុល ដើម្បីសម្រេចចក្ខុវិស័យឆ្ពោះទៅរកសេដ្ឋកិច្ចឌីជីថលតំបន់ កម្ពុជាបានប្តេជ្ញាចាប់ផ្តើមអនុវត្តប្រព័ន្ធគយ ASYCUDA គម្រោងតភ្ជាប់ប្រព័ន្ធស្វយ័តប្រវត្តិកម្ម Port EDI ជាមួយនឹងប្រព័ន្ធ ASYCUDA ដើម្បីសម្រួលដល់ការដឹកជញ្ជូន និងពាណិជ្ជកម្ម ប្រកបដោយប្រសិទ្ធភាព។
ជាមួយគ្នានេះ កម្ពុជាក៏បានអនុម័តច្បាប់ស្តីពីការធ្វើពាណិជ្ជកម្មតាមប្រព័ន្ធអេឡិចត្រូនិក ព្រមទាំងបានដាក់ឱ្យដំណើរការជាផ្លូវការនូវប្រព័ន្ធចុះបញ្ជីពាណិជ្ជកម្មតាមអនឡាញតាមច្រកចេញចូលតែ ១ របស់អាស៊ាន ពិសេសកម្ពុជាបានប្រកាសជាផ្លូវការការអនុវត្តក្របខ័ណ្ឌគោលនយោបាយសង្គម និងសេដ្ឋកិច្ចឌីជីថលកម្ពុជាឆ្នាំ ២០២១-២០៣៥។
លោកបន្ថែមថា៖ «ឌីជីថលអាចជួយឱ្យរដ្ឋជាសមាជិកអាស៊ានធ្វើការរួមគ្នា ដើម្បីលើកកម្ពស់អាស៊ានជាសហគមន៍តភ្ជាប់ប្រព័ន្ធឌីជីថលតែ ១ និងជំរុញការតភ្ជាប់ខ្លួន ដើម្បីពន្លឿនការងើបឡើងវិញនៃការអភិវឌ្ឍសេដ្ឋកិច្ច និងសង្គម»។
បច្ចុប្បន្នមានប្រជាជនខ្មែរច្រើនជាង ៥៩ ភាគរយបានធ្វើប្រតិបត្តិការទូទាត់តាមប្រព័ន្ធអនឡាញដែលឆ្លុះបញ្ចាំងអំពីការលើកកម្ពស់សេវាទូទាត់ឌីជីថលស្របនឹងកិច្ចការងារលើកកម្ពស់បរិយាប័ន្នហិរញ្ញវត្ថុនៅកម្ពុជា។ នេះបើយោងតាមរបាយការណ៍ចុងក្រោយរបស់ធនាគារជាតិនៃកម្ពុជា៕ LA
