ភ្នំពេញ: កម្ពុជា-សិង្ហបុរី ប្តេជ្ញាបន្តសហការជំរុញការអភិវឌ្ឍវិស័យហិរញ្ញវត្ថុដើម្បីភាពរីកចម្រើនពិសេសជាការរួមចំណែកដល់កំណើនសេដ្ឋកិច្ចកម្ពុជា។
ការប្តេជ្ញានេះបានធ្វើឡើងក្នុងជំនួបរវាងលោក ជា ចាន់តូ ទេសាភិបាលធនាគារជាតិនៃកម្ពុជា (NBC) ជាមួយលោកស្រី Teo Lay Cheng ឯកអគ្គរដ្ឋទូតថ្មីនៃប្រទេសសិង្ហបុរីប្រចាំនៅកម្ពុជាតាមប្រព័ន្ធអនឡាញកាលពីថ្ងៃទី ២៩ ខែ មិថុនា ឆ្នាំ ២០២១។
លោក ជា ចាន់តូ បានលើកឡើងពីស្ថានភាពសេដ្ឋកិច្ចរបស់កម្ពុជានាពេលបច្ចុប្បន្ន និងបញ្ហាប្រឈមនានា ព្រមទាំងបានថ្លែងអំណរគុណចំពោះរដ្ឋាភិបាលសិង្ហបុរី និងអាជ្ញាធររូបិយវត្ថុសិង្ហបុរី ដែលកន្លងមកបានផ្តល់កិច្ចសហការជាមួយធនាគារជាតិនៃកម្ពុជាពាក់ព័ន្ធនឹងនវានុវត្តន៍ហិរញ្ញវត្ថុ (Financial Innovation) និងជួយធនាគារជាតិនៃកម្ពុជាក្នុងការរៀបចំកម្មវិធីបច្ចេកវិទ្យាហិរញ្ញវត្ថុពិភពលោក ក្រោមរូបភាពជា Partner City នៃកម្មវិធីបច្ចេកវិទ្យាហិរញ្ញវត្ថុសិង្ហបុរី(Singapore FinTech Festival) ឆ្នាំ ២០២០ ប្រកបដោយជោគជ័យ។
លោកថ្លែងថា៖ «រំពឹងថាកិច្ចសហប្រតិបត្តិការរវាងប្រទេសទាំង ២ ជាពិសេសក្នុងវិស័យធនាគារនឹងបន្តរីកចម្រើនទៅមុខទៀត ដើម្បីជួយគាំទ្រ និងរួមចំណែកអភិវឌ្ឍវិស័យហិរញ្ញវត្ថុ និងសេដ្ឋកិច្ចកម្ពុជា»។
លោកស្រី Teo Lay Cheng បានថ្លែងអំណរគុណដល់ធនាគារជាតិនៃកម្ពុជា ដែលតែងតែផ្តល់កិច្ចសហការល្អប្រសើរជាមួយអាជ្ញាធររូបិយវត្ថុសិង្ហបុរី ព្រមទាំងបានសម្តែងការអបអរសាទរចំពោះលោក ជា ចាន់តូ ដែលត្រូវបានទស្សនាវដ្តីអន្តរជាតិមានមូលដ្ឋាននៅប្រទេសអង់គ្លេស បានផ្តល់ចំណាត់ថ្នាក់ជាថ្នាក់ដឹកនាំធនាគារកណ្តាលឆ្នើមឆ្នាំ ២០២១ នៅតំបន់អាស៊ីប៉ាស៊ីហ្វិក ក្នុងចំណោមទេសាភិបាល ៥ រូប លើពិភពលោក។
លោកស្រីបានវាយតម្លៃខ្ពស់ចំពោះសមិទ្ធផលដែលប្រព័ន្ធធនាគារកម្ពុជាសម្រេចបាននាពេលកន្លងមក ដែលបានរួមចំណែកយ៉ាងសំខាន់ក្នុងការគាំទ្រសកម្មភាពសេដ្ឋកិច្ច។
លោកស្រីក៏បានបង្ហាញពីកិច្ចខិតខំប្រឹងប្រែងបន្តទៀតក្នុងការពង្រឹងកិច្ចសហប្រតិបត្តិការក្នុងវិស័យហិរញ្ញវត្ថុរបស់ប្រទេសទាំង ២ និងបង្កលក្ខណៈឱ្យមានកិច្ចសហប្រតិបត្តិការកាន់តែទូលំទូលាយបន្ថែមទៀតរវាងអាជ្ញាធររូបិយវត្ថុសិង្ហបុរី និងធនាគារជាតិនៃកម្ពុជា។
កាលពីឆ្នាំ ២០១៩ ធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី (MAS) បានចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទ្វេភាគីលើនវានុវត្តន៍ហិរញ្ញវត្ថុសំដៅបង្កើតក្របខ័ណ្ឌកិច្ចសហប្រតិបត្តិការរវាងធនាគារកណ្តាលនៃប្រទេសទាំង ២ ដើម្បីជំរុញនវានុវត្តន៍ហិរញ្ញវត្ថុនៅក្នុងទីផ្សាររៀងៗខ្លួន។
នៅក្រោមអនុស្សរណៈនោះ NBC និង MAS អាចចែករំលែកព័ត៌មានអំពីនិន្នាការ និងការវិវត្តនៅក្នុងទីផ្សារបច្ចេកវិទ្យាហិរញ្ញវត្ថុដែលកំពុងរីកចម្រើនក៏ដូចជាបទប្បញ្ញត្តិទាក់ទងនឹងការបង្កើតថ្មីនៅក្នុងសេវាកម្មហិរញ្ញវត្ថុ។
កាលពីដើមខែឧសភា លោកស្រី ជា សិរី អគ្គនាយកបច្ចេកទេស NBC ក៏ត្រូវបានជ្រើសតាំងជាសមាជិកក្រុមប្រឹក្សាអន្តរជាតិនៃវិទ្យាស្ថានអន្តរជាតិ FinTech ដែលមានទីស្នាក់ការនៅសិង្ហបុរីផងដែរ៕ LA