ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ តាមរយៈអគ្គនាយកដ្ឋានគយ និងរដ្ឋាករកម្ពុជា បានអនុញ្ញាតឱ្យបញ្ចេញទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយចាប់ពីថ្ងៃចុះហត្ថលេខានេះតទៅ។ នេះបើតាមសេចក្តីណែនាំរបស់អគ្គនាយកដ្ឋានគយ និងរដ្ឋាករកម្ពុជាចុះថ្ងៃទី ២៩ មិថុនា ឆ្នាំនេះ។
ការអនុញ្ញាតនេះ ស្របតាមបទប្បញ្ញាត្តិនៃប្រកាសលេខ សហវ.ប្រក ចុះថ្ងៃទី ២២ ខែ មិថុនា ឆ្នាំ ២០២១ របស់ក្រសួងសេដ្ឋកិច្ច និងហិរញ្ញវត្ថុស្តីពីការអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយរបស់អគ្គនាយកដ្ឋានគយ និងរដ្ឋាករកម្ពុជា។
សេចក្តីណែនាំបានឱ្យដឹងថា អគ្គនាយកដ្ឋានគយ និងរដ្ឋាករកម្ពុជាអាចអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនញពីគយ ឬការជំពាក់បែបបទគយដោយអាចតម្រូវឱ្យតម្កល់និមុត្តិធានាជាសាច់ប្រាក់ ឬជាទម្រង់ ផ្សេង ស្របតាមបទប្បញ្ញាត្តិនៃប្រកាសនិមុត្តិធានា។
ទំនិញដែលអាចអនុញ្ញាត គឺទំនិញនាំចូលក្រសួង ស្ថាប័នរដ្ឋ និងទំនិញនាំចូលក្នុងក្របខ័ណ្ឌហិរញ្ញវត្ថុ និងទំនិញនាំចូលរបស់គម្រោងវិនិយោគសាធារណៈ ដែលនឹងត្រូវទទួលបានការអនុម័តពីក្រុមប្រឹក្សាអភិវឌ្ឍន៍កម្ពុជា និង/ឬក្រសួងសេដ្ឋកិច្ច និងហិរញ្ញវត្ថុក្នុងការដាក់ពន្ធ និងអាករជាបន្ទុករបស់រដ្ឋ។
ទំនិញនាំចូលជាសម្ភារសាងសង់ បរិក្ខារសំណង់ សម្ភារបរិក្ខារផលិតកម្ម និងធាតុចូលផលិតកម្មរបស់គម្រោងវិនិយោគឯកជននានា។ ទំនិញនាំចូលជាកម្មវត្ថុនៃការបង់ពន្ធអាករ ដែលមានតម្រូវការបន្ទាន់ ឬចាំបាច់ ប៉ុន្តែពុំទាន់មានការឯកភាពគ្នាលើទិដ្ឋភាពបច្ចេកទេសគយ ដូចជាតម្លៃគិតពន្ធគយ ចំណាត់ថ្នាក់ទំនិញ ឬដើមកំណើតទំនិញជាដើម។
ទំនិញដែលត្រូវរង់ចាំសេចក្តីសម្រេចលើការតវ៉ា ឬទំនិញដែលត្រូវបានឃាត់ទុកបណ្តោះអាសន្ន និងទំនិញផ្សេងៗទៀត ដែលទទួលបានការអនុញ្ញាតពីក្រសួងសេដ្ឋកិច្ច និងហិរញ្ញវត្ថុ។
លើកលែងតែមានការសម្រេចដោយឡែកពីក្រសួងសេដ្ឋកិច្ច និងហិរញ្ញវត្ថុ ការអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយ មិនត្រូវអនុញ្ញាតចំពោះការនាំចូលទំនិញមួយចំនួន រួមមានទំនិញហាមឃាត់ និងជាប់កម្រិតកំណត់ដែលមិនទាន់ទទួលបានការអនុញ្ញាតឱ្យនាំចូលពីក្រសួង ស្ថាប័នមានសមត្ថកិច្ច។
ការអនុញ្ញាតឱ្យយកទំនិញពីគយមុនពេលបញ្ចប់បំពេញបែបបទបញ្ចេញទំនិញពីគយត្រូវបានផ្តល់ជូនក្នុងរយៈពេលចំនួន ៩០ ថ្ងៃ ក្រោយពេលទទួលទំនិញ ឬគិតចាប់ពីថ្ងៃចុះបញ្ជិកាប្រតិវេទន៍គយចំពោះទំនិញនាំចូលក្រសួង ស្ថាប័នរដ្ឋ និងទំនិញនាំចូលជាសម្ភារសាងសង់ បរិក្ខារសំណង់ សម្ភារបរិក្ខារផលិតកម្ម និងធាតុចូលផលិតកម្មរបស់គម្រោងវិនិយោគឯកជននានា។
ការអនុញ្ញាតក្នុងរយៈពេល ៤៥ ថ្ងៃ ក្រោយពេលទទួលទំនិញ ឬគិតចាប់ពីថ្ងៃចុះបញ្ជិកាប្រតិវេទន៍គយចំពោះទំនិញដែលត្រូវរង់ចាំសេចក្តីសម្រេចលើការតវ៉ា ឬទំនិញដែលត្រូវបានឃាត់ទុកបណ្តោះអាសន្ន និងទំនិញផ្សេងៗទៀត ដែលទទួលបានការអនុញ្ញាតពីក្រសួងសេដ្ឋកិច្ច និងហិរញ្ញវត្ថុ។
អគ្គនាយកដ្ឋានគយ និងរដ្ឋាករកម្ពុជា អាចពន្យាររយៈពេលបានចំនួន ២ លើក នៃរយៈពេលដែលត្រូវបានអនុញ្ញាតដំបូងតាមការស្នើសុំជាលាយលក្ខណ៍អក្សររបស់ម្ចាស់ទំនិញក្នុងករណីមានហេតុផលសមស្របតាមច្បាប់ និងបទប្បញ្ញាត្តិជាធរមាន។ ការពន្យារពេលរយៈពេលបន្ថែមទៀតត្រូវមានការអនុញ្ញាតពីក្រសួងសេដ្ឋកិច្ច និងហិរញ្ញវត្ថុ។
សេចក្តីណែនាំបានបញ្ជាក់ថា ក្នុងករណីមិនបានបញ្ចប់ការបំពេញបែបបទបញ្ចេញទំនិញពីគយលើសកាលកំណត់ ៩០ ថ្ងៃ គិតចាប់ពីរយៈពេលនៃការអនុញ្ញាតចុងក្រោយ ម្ចាស់ទំនិញត្រូវទទួលរងការពិន័យរដ្ឋបាល និងទោសទណ្ឌផ្សេងៗ ស្របតាមបទប្បញ្ញាត្តិនៃច្បាប់ស្តីពីគយ និងច្បាប់ផ្សេងទៀត ហើយនិមុត្តិធានាត្រូវបង្វែរចូលថវិកាជាតិបើសិនជាមាន៕