ភ្នំពេញៈ រដ្ឋមន្រ្តីក្រសួងទេសចរណ៍ លោក ថោង ថុន ក្នុងរយៈពេល ១ ខែមិថុនាពេញ ភ្ញៀវទេសចរក្នុងស្រុកជាង ៣ សែននាក់បានដើរកម្សាន្តនៅទូទាំងប្រទេសកើន ៧៨,៥៨ ភាគរយ បើធៀបនឹងខែឧសភាឆ្នាំនេះ។
កំណើនភ្ញៀវទេសចរក្នុងស្រុកនេះ បន្ទាប់ពីរដ្ឋាភិបាល កាលពីថ្ងៃទី ២៥ ខែមេសា ឆ្នាំនេះ បានសម្រេចបញ្ចប់ការហាមឃាត់ការធ្វើដំណើរនិងការបញ្ចប់ការបិទរមណីយដ្ឋានទេសចរណ៍ទូទាំងប្រទេស លើកលែងតែរមណីយដ្ឋាននៅក្នុងខេត្ត-ក្រុងដែលត្រូវបានបិទខ្ទប់។
លោករដ្ឋមន្រ្តី ឱ្យដឹងថា ក្នុងខែមិថុនានេះ ភ្ញៀវទេសចរសរុបចំនួន ៣៤៦ ៥១៨ នាក់ ក្នុងនោះ ភ្ញៀវជាតិ ៣៤២ ១០៩ នាក់ និងភ្ញៀវបរទេសផ្ទៃក្នុង ៤ ៤០៩ នាក់។ ចំនួននេះមានការកើនឡើងធៀបនឹងខែឧសភា ប៉ុន្តែបើធៀបនឹងខែមិថុនា ឆ្នាំមុន ធ្លាក់ចុះ ៤៣,៤ ភាគរយ។
លោកថ្លែងថា៖ «គោលដៅទេសចរណ៍តំបន់ឆ្នេរ ពិសេសខេត្តកំពត ខេត្តកែប និងខេត្តព្រះសីហនុ ព្រមទាំងគោលដៅអេកូទេសចរណ៍ ទេសចរណ៍ធម្មជាតិ និងកសិទេសចរណ៍គឺជាគោលដៅសំខាន់ដែលបានស្រូបទាញចរន្តភ្ញៀវទេសចរផ្ទៃក្នុងបានច្រើន»។
រដ្ឋាភិបាលកម្ពុជារំពឹងថា នឹងបើកទេសចរណ៍ជាបណ្តើរៗក្នុងត្រីមាសទី៤ ឆ្នាំ ២០២១ ដោយផ្តោតអាទិភាពការអនុវត្តគម្រោងក្នុងជំហានទី ១ នៅតំបន់អង្គរនៃខេត្តសៀមរាប៕