.jpg)
រថយន្តកុងតឺន័រដឹកទំនិញ ចេញពីកំពង់ផែភ្នំពេញ នាពេលកន្លងមក។ ហេង ជីវ័ន
ភ្នំពេញៈ វិស័យឯកជនបានស្វាគមន៍ និងគាំទ្រក្រសួងសេដ្ឋកិច្ច និងហិរញ្ញវត្ថុដែលបានដាក់ឱ្យអនុវត្តនីតិវិធីបញ្ចេញទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយ ខណៈនីតិវិធីនេះនឹងជួយសម្រួលកាត់បន្ថយពេលវេលា និងថ្លៃដើម ព្រមទាំងបង្កើនភាពប្រកួតប្រជែងផងដែរ។ នេះបើយោងតាមសេចក្តីណែនាំរបស់អគ្គនាយកដ្ឋានគយ និងរដ្ឋាករកម្ពុជា កាលពីថ្ងៃទី ២៩ មិថុនា ឆ្នាំ ២០២១។
ការអនុវត្តនីតិវិធីនេះធ្វើឡើងស្របតាមបទប្បញ្ញត្តិនៃប្រកាសលេខ សហវ.ប្រក ចុះថ្ងៃទី ២២ ខែមិថុនាឆ្នាំ ២០២១ របស់ក្រសួងសេដ្ឋកិច្ច និងហិរញ្ញវត្ថុ ស្តីពីការអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយរបស់អគ្គនាយកដ្ឋានគយ និងរដ្ឋាករកម្ពុជា។
សេចក្តីណែនាំឱ្យដឹងថា អគ្គនាយកដ្ឋានគយ និងរដ្ឋាករកម្ពុជាអាចអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយ ឬការជំពាក់បែបបទគយដោយអាចតម្រូវឱ្យតម្កល់និមុត្តិធានាជាសាច់ប្រាក់ ឬទម្រង់ផ្សេងស្របតាមបទប្បញ្ញត្តិនៃប្រកាសនិមុត្តិធានា។
ទំនិញដែលអាចអនុញ្ញាត គឺទំនិញនាំចូលក្រសួង ស្ថាប័នរដ្ឋ និងទំនិញនាំចូលក្នុងក្របខ័ណ្ឌហិរញ្ញវត្ថុ និងទំនិញនាំចូលរបស់គម្រោងវិនិយោគសាធារណៈដែលនឹងទទួលបានការអនុម័តពីក្រុមប្រឹក្សាអភិវឌ្ឍន៍កម្ពុជា និងក្រសួងសេដ្ឋកិច្ចក្នុងការដាក់ពន្ធ និងអាករជាបន្ទុករបស់រដ្ឋ។
ប្រភេទទំនិញនាំចូលជាសម្ភារសាងសង់ បរិក្ខារសំណង់ សម្ភារបរិក្ខាផលិតកម្ម និងធាតុចូលផលិតកម្មរបស់គម្រោងវិនិយោគឯកជននានា។ ទំនិញនាំចូលជាកម្មវត្ថុនៃការបង់ពន្ធអាករដែលមានតម្រូវការបន្ទាន់ ឬចាំបាច់ ប៉ុន្តែពុំទាន់មានការឯកភាពគ្នាលើទិដ្ឋភាពបច្ចេកទេសគយ ដូចជា តម្លៃគិតពន្ធគយ ចំណាត់ថ្នាក់ទំនិញ ឬដើមកំណើតទំនិញ ជាដើម។
ទំនិញដែលត្រូវរង់ចាំសេចក្តីសម្រេចលើការតវ៉ា ឬទំនិញដែលត្រូវបានឃាត់ទុកបណ្តោះអាសន្ន និងទំនិញផ្សេងៗទៀតដែលទទួលបានការអនុញ្ញាតពីក្រសួងសេដ្ឋកិច្ច និងហិរញ្ញវត្ថុ។
លើកលែងតែមានការសម្រេចដោយឡែកពីក្រសួងសេដ្ឋកិច្ច និងហិរញ្ញវត្ថុ ការអនុញ្ញាតឱ្យយកទំនិញពីគយមុនពេលបញ្ចប់ការបំពេញបែបបទបញ្ចេញទំនិញពីគយ មិនត្រូវអនុញ្ញាតចំពោះការនាំចូលទំនិញមួយចំនួន រួមមាន ទំនិញហាមឃាត់ និងជាប់កម្រិតកំណត់ដែលមិនទាន់ទទួលបានការអនុញ្ញាតឱ្យនាំចូលពីក្រសួង ស្ថាប័នមានសមត្ថកិច្ច។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញប្រាប់ ភ្នំពេញ ប៉ុស្តិ៍ កាលពីថ្ងៃទី ៤ ខែមិថុនាថា ការអនុវត្តនីតិវិធីនេះនឹងជួយសម្រួលពេលវេលាឱ្យបានឆាប់នៃការទទួលយកទំនិញពីគយ ពិសេសការកំណត់រយៈពេល ៩០ ថ្ងៃសម្រាប់ធ្វើការបំពេញបែបបទសង ដែលជាពេលវេលាមួយសមល្មមសម្រាប់អ្នកនាំចេញ។ នេះជាវិធានការល្អប្រសើរដើម្បីបន្ធូរបន្ថយនីតិវិធីដល់អ្នកនាំចេញ ព្រោះទំនិញមួយចំនួនគេត្រូវការប្រញាប់យកមកប្រើប្រាស់។
លោកនិយាយថា៖ «ក្នុងនាមប្រធានសមាគមខ្ញុំសូមសាទរដែលក្រសួងសេដ្ឋកិច្ច បានគិតគូរដើម្បីបង្កលក្ខណៈងាយស្រួលដល់អតិថិជន។ ខ្ញុំគិតថា ក្រសួងដាក់ចេញគោលការណ៍នេះគឺជួយសម្របសម្រួលយ៉ាងច្រើនពាក់ព័ន្ធការនាំចូលទំនិញឱ្យបានកាន់តែល្អប្រសើរជាលំដាប់»។
សេចក្តីណែនាំនេះឱ្យដឹងទៀតថា ការអនុញ្ញាតឱ្យយកទំនិញពីគយមុនពេលបញ្ចប់បំពេញបែបបទបញ្ចេញទំនិញពីគយត្រូវបានផ្តល់ជូនក្នុងរយៈពេលចំនួន ៩០ ថ្ងៃក្រោយពេលទទួលទំនិញ ឬគិតចាប់ពីថ្ងៃចុះបញ្ជិកាប្រតិវេទន៍គយចំពោះទំនិញនាំចូលក្រសួង ស្ថាប័នរដ្ឋ និងទំនិញនាំចូលជាសម្ភារសាងសង់ បរិក្ខារសំណង់ សម្ភារបរិក្ខារផលិតកម្ម និងធាតុចូលផលិតកម្មរបស់គម្រោងវិនិយោគឯកជននានា។
ការអនុញ្ញាតក្នុងរយៈពេល ៤៥ ថ្ងៃ ក្រោយពេលទទួលទំនិញ ឬគិតចាប់ពីថ្ងៃចុះបញ្ជិកាប្រតិវេទន៍គយចំពោះទំនិញដែលត្រូវរង់ចាំសេចក្តីសម្រេចលើការតវ៉ា ឬទំនិញដែលត្រូវបានឃាត់ទុកបណ្តោះអាសន្ន និងទំនិញផ្សេងៗទៀតដែលទទួលបានការអនុញ្ញាតពីក្រសួងសេដ្ឋកិច្ច៕ LA
វីដេអូ៖
