.jpg)
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ចុះហត្ថលេខាជាមួយរដ្ឋមន្ត្រីក្រសួងពាណិជ្ជកម្មចិន លោក Zhong Shan តាមប្រព័ន្ធអនឡាញកាលពីថ្ងៃទី ១២ ខែ តុលា ឆ្នាំ ២០២០។ រូបថត SPM
ភ្នំពេញៈ ក្រសួងពាណិជ្ជកម្មកម្ពុជារំពឹងថា កិច្ចព្រមព្រៀងពាណិជ្ជកម្មសេរីទ្វេភាគី (FTA) កម្ពុជា-ចិន ដែលតំណាងរដ្ឋាភិបាលប្រទេសទាំង ២ បានចុះហត្ថលេខាកាលពីដើមត្រីមាសទី៤ ឆ្នាំ ២០២០ នឹងត្រូវរដ្ឋសភាផ្តល់សច្ចាប័នក្នុងពេលឆាប់ៗ ខណៈកម្ពុជាសង្ឃឹមថា ការចូលជាធរមាននៃកិច្ចព្រមព្រៀងនេះនឹងធ្វើឱ្យទីផ្សារនាំចេញពីកម្ពុជាមានទំហំកាន់ធំ ពិសេសផលិតផលកសិកម្ម។ នេះបើយោងតាមអ្នកនាំពាក្យក្រសួងពាណិជ្ជកម្ម។
កិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន ត្រូវបានរដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ ចុះហត្ថលេខាជាមួយរដ្ឋមន្ត្រីក្រសួងពាណិជ្ជកម្មចិន លោក Zhong Shan តាមប្រព័ន្ធអនឡាញកាលពីថ្ងៃទី ១២ ខែ តុលា ឆ្នាំ ២០២០ ដោយមានលោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងការបរទេសចិន លោក Wang Yi ជាសាក្សី។
លោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជាបានប្រាប់ភ្នំពេញប៉ុស្តិ៍នាថ្ងៃទី ៥ ខែកក្កដាថា បន្ទាប់ពីថ្នាក់ដឹកនាំក្រសួងពាណិជ្ជកម្មកម្ពុជាបានចុះហត្ថលេខាជាមួយភាគីចិនរួចមក បច្ចុប្បន្នក្រសួងកំពុងខិតខំមួយជំហានទៀតទាក់ទងនឹងការរៀបចំឯកសារ និងនីតិវិធីផ្សេងៗ ដើម្បីត្រៀមខ្លួនចូលទៅបំភ្លឺនៅគណៈកម្មការជំនាញរដ្ឋសភា មុននឹងឈានទៅទទួលការអនុម័តពីរដ្ឋសភា។
លោកថ្លែងថា៖ «ទាក់ទងនឹងការស្នើសុំសច្ចាប័នលើកិច្ចព្រមព្រៀងពាណិជ្ជកម្មសេរីកម្ពុជា ចិន ដែលចុះហត្ថលេខាកាលពីខែតុលា ២០២០ ក្រសួងពាណិជ្ជកម្មបានរៀបចំឯកសារតាមនីតិវិធី ដោយបានឆ្លងគណ:រដ្ឋមន្ត្រី និងផ្ញើទៅរដ្ឋសភា។ ក្រសួងពាណិជ្ជកម្ម និងក្រសួងពាក់ព័ន្ធត្រៀមខ្លួននឹងចូលបំភ្លឺនៅគណៈកម្មការជំនាញ ក៏ដូចជាកិច្ចប្រជុំពេញអង្គតាមការកោះអញ្ជើញពីរដ្ឋសភា»។
លោកបានបន្តថា នៅពេលប្រទេសទាំង ២ ផ្តល់សច្ចាប័ន កម្ពុជារំពឹងនឹងទទួលបាននូវអត្ថប្រយោជន៍ជាច្រើនដូចជា ការទទួលបានទីផ្សារកាន់តែធំដោយសារមានកម្មវិធីបញ្ចុះពន្ធដែលកម្ពុជាទទួលបានភាពអនុគ្រោះច្រើនជាងអ្វីដែលកម្ពុជាផ្ដល់ឱ្យភាគីចិន, លំហូរទំនិញពីកម្ពុជានឹងមានភាពងាយស្រួលជាងមុន និងឱកាសទាក់ទាញវិនិយោគពីក្រៅប្រទេសចូលមកវិនិយោគ ព្រមទាំងរួមចំណែកជំរុញការនាំចេញផលិតផលកសិកម្មកម្ពុជាទៅទីផ្សារប្រទេសចិនផងដែរ។
លោកអះអាងថា៖ «កិច្ចព្រមព្រៀងនេះនឹងចំណេញច្រើនក្នុងការជំរុញផលិតកម្មក្នុងស្រុក ជាពិសេសវិស័យកសិកម្មមួយចំនួនដូចជា ចេក ស្វាយ ដំឡូង មៀន ស្វាយចន្ទី ជាដើម»។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ថា ចិនជាប្រទេសមានកំណើនសេដ្ឋកិច្ចល្អ និងមានទីផ្សារធំ ហេតុនេះនៅពេលកិច្ចព្រមព្រៀងពាណិជ្ជកម្មសេរីទ្វេភាគីចូលជាធរមាន វានឹងជួយធ្វើឱ្យវត្តមានផលិតផលកម្ពុជាមានកាន់តែច្រើននៅលើទីផ្សារប្រទេសចិន ពិសេសផលិតផលកសិកម្ម។ តាមរយៈកិច្ចព្រមព្រៀងនេះ កម្ពុជាក៏នឹងទទួលបានការវិនិយោគផ្ទាល់ដើម្បីនាំចេញទៅប្រទេសចិន ក៏ដូចជាទីផ្សារធំៗផ្សេងៗទៀត។
លោកបញ្ជាក់ថា៖ «កម្ពុជានឹងទទួលបានភាពវិជ្ជមាននៃកំណើនសេដ្ឋកិច្ចជាតិតាមរយៈកំណើនការចូលមកបណ្តាក់ទុន ការបង្កើតការងារថ្មីៗ និងការកើនឡើងសមត្ថភាពនាំចេញ»។
កាលពីដើមខែមិថុនា នៅក្នុងជំនួបពិភាក្សាគ្នានៅប្រទេសចិនរដ្ឋមន្ត្រីក្រសួងការបរទេស កម្ពុជា លោក ប្រាក់ សុខុន និងរដ្ឋមន្ត្រីការបរទេសចិន លោក Wang Yi បានសន្យារួមគ្នាថា នឹងខិតខំពន្លឿននីតិវិធីផ្ទៃក្នុងសម្រាប់ការផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីកម្ពុជា-ចិន ដើម្បីជំរុញពាណិជ្ជកម្ម វិនិយោគ និងទេសចរណ៍រវាងប្រទេសទាំង ២។
រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ ធ្លាប់បាននិយាយថា កិច្ចព្រមព្រៀងនេះនឹងធ្វើឱ្យកម្ពុជាដែលជាប្រទេសផលិតស្បៀង អាចបង្កើនការនាំចេញកសិផលចូលទៅទីផ្សារចិនបានកាន់តែច្រើន។ លោកបន្ថែមថា តាមរយៈកិច្ចព្រមព្រៀងនេះ កម្ពុជារំពឹងថា ការនាំចេញពីកម្ពុជាទៅចិន នឹងមានកំណើនប្រមាណ ២៥ ភាគរយ បន្ទាប់ពីកិច្ចព្រមព្រៀងនេះចូលជាធរមាន។
ក្រសួងពាណិជ្ជកម្មកម្ពុជាធ្លាប់អះអាងថា ទំនិញកម្ពុជាជាង ៣០០ មុខអាចនាំទៅចិន ដោយមិនគិតពន្ធនៅពេលកិច្ចព្រមព្រៀងពាណិជ្ជកម្មនេះចូលជាធរមាន។ ក្នុងចំណោមមុខទំនិញជាង ៣០០ នេះ គឺផលិតផលកសិកម្ម ៩៥ ភាគរយត្រូវរួចពន្ធសម្រាប់ការនាំចេញ។
កម្ពុជា និងចិន គ្រោងជំរុញទំហំពាណិជ្ជកម្មទ្វេភាគីឱ្យបានដល់ ១០ ពាន់លានដុល្លារនៅឆ្នាំ ២០២៣ ខាងមុខនេះ។
ទិន្នន័យក្រសួងពាណិជ្ជកម្មកម្ពុជាបង្ហាញថា ពាណិជ្ជកម្មទ្វេភាគីកម្ពុជា-ចិន ឆ្នាំ ២០២០ មានតម្លៃសរុប ៨ ១១៨,០៧ លានដុល្លារ ធ្លាក់ចុះ ៥,២ ភាគរយធៀបឆ្នាំ ២០១៩។ ការនាំចេញទំនិញពីកម្ពុជាទៅចិនមានតម្លៃ ១ ០៨៦,២៦ លានដុល្លារ កើនឡើង ៨,១១ ភាគរយ និងការនាំចូលមានតម្លៃ ៧ ០៣១,៨១ លានដុល្លារធ្លាក់ចុះ ៦,៩៧ ភាគរយ៕ LA
