.jpg)
ភ្ញៀវទេសចរឡើងទស្សនាកំពូលកណ្តាលប្រាសាទអង្គរវត្ត។ ហុង មិនា
ភ្នំពេញៈ ខេត្តហ៊ូប៉េ (Hubei) ដែលជាមជ្ឈមណ្ឌលភូមិសាស្ត្រសេដ្ឋកិច្ច និងដឹកជញ្ជូនរបស់ប្រទេសចិន ចង់បង្កើតចំណងមេត្រីភាព (Sister City) ជាមួយខេត្តចំនួន ៣ របស់កម្ពុជាដែលជាខេត្តមានសក្តានុពលទេសចរណ៍ និងពាណិជ្ជកម្ម ដើម្បីបង្កើនកិច្ចសហប្រតិបត្តិការអភិវឌ្ឍន៍លើគ្រប់វិស័យរវាងគ្នានឹងគ្នា។
បើយោងតាមលិខិត លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី ២ ខែកក្កដា ឱ្យដឹងថា ប្រទេសចិនបានស្នើសុំកម្ពុជាបង្កើតចំណងមេត្រីភាព (Sister City) រវាងខេត្ត Hubei ជាមួយខេត្តសៀមរាប ខេត្តកំពត និងក្រុងព្រះសីហនុ។
សំណើរបស់ប្រទេសចិនធ្វើឡើងយោងតាមលិខិតលេខ ១៤៤/២១ សអក.ឆឈ ចុះថ្ងៃទី ១ ខែមិថុនា ឆ្នាំ ២០២១ របស់ស្ថានអគ្គកុងស៊ុលកម្ពុជានៅទីក្រុងឆុងឈីង។
លិខិតរបស់ក្រសួងការបរទេសកម្ពុជា គឺស្នើបន្តទៅកាន់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយបានបញ្ជាក់ថា មន្ទីរការបរទេសខេត្តហ៊ូប៉េ ប្រទេសចិន ស្នើសុំបង្កើតចំណងមេត្រីភាព (Sister City) រវាងខេត្តហ៊ូប៉េ ប្រទេសចិន ជាមួយខេត្តសៀមរាប ខេត្តកំពត និងក្រុងព្រះសីហនុ នៅក្នុងគោលបំណង ដើម្បីបង្កើតភាពស្និទ្ធស្នាល និងបង្កើនកិច្ចសហប្រតិបត្តិការក្នុងការអភិវឌ្ឍលើគ្រប់វិស័យ ដើម្បីផលប្រយោជន៍នៃប្រជាជនរបស់ខេត្តខាងលើ។
លិខិតនេះបានឱ្យដឹងទៀតថា ខេត្តហ៊ូប៉េ ជាមជ្ឈមណ្ឌលភូមិសាស្ត្រសេដ្ឋកិច្ច និងដឹកជញ្ជូនរបស់ចិន និងជាខេត្តដែលស្ថិតក្នុងផែនការអភិវឌ្ឍន៍ខ្សែក្រវាត់ និងផ្លូវផងដែរ។ បន្ថែមពីនេះក្រុមហ៊ុនធំៗនៅខេត្តនេះក៏កំពុងវិនិយោគនៅកម្ពុជាលើវិស័យហេដ្ឋារចនាសម្ព័ន្ធ និងធនធាន ថាមពល ជាដើម។
លោក គី សេរីវឌ្ឍ អ្នកសិក្សាស្រាវជ្រាវផ្នែកសេដ្ឋកិច្ចនៃរាជបណ្ឌិត្យសភាកម្ពុជា បានកត់សម្គាល់ថា ខេត្តសៀមរាប ខេត្ត កំពត និងក្រុងព្រះសីហនុ គឺជាតំបន់ដែលមានសក្តានុពលខ្លាំងលើវិស័យទេសចរណ៍ ចំណែកខេត្តហ៊ូប៉េ មានសក្តានុពលខ្លាំងផ្នែកកសិកម្មទំនើប។
លោកបានប្រាប់ ភ្នំពេញ ប៉ុស្តិ៍ថា តាមរយៈការភ្ជាប់តំបន់ជាបងប្អូនគ្នានេះនឹងផ្តល់អត្ថប្រយោជន៍យ៉ាងច្រើនឱ្យគ្នាទៅវិញទៅមកលើវិស័យកសិកម្ម និងទេសចរណ៍។
លោកប្រាប់ថា៖ «ខ្ញុំយល់ថា ការភ្ជាប់គ្នាគឺជារឿងល្អ យើងឃើញថាខេត្តសៀមរាប គឺមានសក្តានុពលទេសចរណ៍វប្បធម៌ ហើយខេត្តហ៊ូប៉េ មានសក្តានុពលកសិកម្មទំនើប អ៊ីចឹងយើងអាចទទួលបានផលប្រយោជន៍នៅពេលយើងភ្ជាប់ជាមួយគ្នា។ យើងអាចបានផលប្រយោជន៍លំហូរភ្ញៀវទេសចរមកកម្សាន្តនៅកម្ពុជាផងដែរ»។
លោកបានបន្ថែមថា ចំពោះសក្តានុពលខេត្តហ៊ូប៉េ គឺកសិករចិនភាគច្រើនដាំផ្កានៅខេត្តនេះ ដូចនេះផ្កានឹងមានលំហូរយ៉ាងច្រើនមកកម្ពុជាសម្រាប់បម្រើឱ្យវិស័យទេសចរណ៍។
លោកលើកឡើងថា៖ «តំបន់មួយចំនួននៅខេត្តសៀមរាប គឺជាតំបន់វាលទំនាបដែលអំណោយផលដល់វិស័យកសិកម្ម ដូចនេះកសិកម្មសម្រាប់បម្រើឱ្យវិស័យទេសចរណ៍តាមបែបទំនើបដែលមានបន្លែផ្លែឈើសរីរាង្គ គឺសក្តានុពលរបស់កម្ពុជានៅពេលភ្ជាប់ជាតំបន់បងប្អូនជាមួយខេត្តហ៊ូប៉េ»។
តាមរយៈគម្រោងខ្សែក្រវាត់ និងផ្លូវលំហូរគម្រោងវិនិយោគជាច្រើននៅប្រទេសកម្ពុជា ដូចជាគម្រោងវិនិយោគតំបន់សេដ្ឋកិច្ចពិសេសនៅខេត្តព្រះសីហនុ គម្រោងផ្លូវល្បឿនលឿនភ្នំពេញ-ក្រុងព្រះសីហនុ គម្រោងផ្គត់ផ្គង់ទឹកស្អាតជនបទ និងគម្រោងពហុកីឡដ្ឋានជាតិមរតកតេជោ ជាដើម។ នេះបើតាមលោក Wang Wentian ឯកអគ្គរដ្ឋទូតចិនប្រចាំកម្ពុជា៕ LA
