.jpg)
លោក លឹម ហេង អនុប្រធានសភាពាណិជ្ជកម្មកម្ពុជា នាពេលកន្លងមក។ រូបថត ហ្វេសប៊ុក
ភ្នំពេញៈ សភាពាណិជ្ជកម្មកម្ពុជា (CCC) ដោយមានការគាំទ្រពីក្រសួងពាណិជ្ជកម្ម និងស្ថានទូតជប៉ុនប្រចាំនៅកម្ពុជាគ្រោងនឹងបង្កើតការិយាល័យតំណាងរបស់ខ្លួននៅប្រទេសជប៉ុនក្នុងឆ្នាំនេះ ដើម្បីដើរតួនាទីក្នុងការផ្តល់ព័ត៌មាន និងទំនាក់ទំនង ជាពិសេសវិស័យដែលមានសក្តានុពលក្នុងការទាក់ទាញវិនិយោគិនជប៉ុនឱ្យចូលមកវិនិយោគនៅកម្ពុជា។
លោក លឹម ហេង អនុប្រធាន CCC បានប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែកក្កដាថា ដោយមានការស្នើសុំពីវិនិយោគិនជប៉ុន និងស្ថានទូតជប៉ុនប្រចាំកម្ពុជាមកក្រសួងពាណិជ្ជកម្ម សភាពាណិជ្ជកម្មកម្ពុជាបានរៀបចំកិច្ចប្រជុំជាមួយភាគីពាក់ព័ន្ធអំពីផែនការនៃការបើកការិយាល័យតំណាងនេះ។
លោកនិយាយថា៖ «កន្លងមកខាងស្ថានទូតជប៉ុន និងធុរជនជប៉ុនគាត់បានស្នើសុំឱ្យសភាពាណិជ្ជកម្មយើងបើកការិយាល័យតំណាងនៅប្រទេសគាត់។ ក្រសួងពាណិជ្ជកម្ម និងសភាពាណិជ្ជកម្មកម្ពុជាបានពិភាក្សាគ្នារួចហើយនឹងរៀបចំទៅតាមលទ្ធភាព ដើម្បីបង្កើតការិយាល័យតំណាងនេះ ហើយនឹងធ្វើការជ្រើសរើសប្រធានតាមរយៈការបោះឆ្នោត ដើម្បីឱ្យមានតម្លាភាពក្នុងការឈរឈ្មោះតំណាងឱ្យកម្ពុជានៅប្រទេសជប៉ុន។ បច្ចុប្បន្នយើងកំពុងពន្លឿននីតិវិធីដើម្បីចេញឱ្យលឿន ដូច្នេះភាគីទាំងសងខាង គឺក្រសួងពាណិជ្ជកម្ម និងភាគីជប៉ុនកំពុងជំរុញលើកិច្ចការនេះ»។
យោងតាមលោក លឹម ហេង តាមពិតទៅសភាពាណិជ្ជកម្មកម្ពុជា គ្រោងនឹងបង្កើតការិយាល័យតំណាងរបស់ខ្លួនតាំងពីដើមឆ្នាំ ២០២០ នៅក្នុងប្រទេសកាណាដាមុនគេ ប៉ុន្តែដោយសារតែត្រូវរៀបចំនីតិវិធីជ្រើសរើសប្រធាន និងបញ្ហាការរីករាលដាលនៃជំងឺកូវីដ ១៩ ជាហេតុធ្វើឱ្យអ្វីៗត្រូវពន្យារពេលដល់សព្វថ្ងៃនេះ។
លោកអះអាងថា៖ «ការបើកការិយាល័យតំណាងសភាពាណិជ្ជកម្មកម្ពុជា នៅជប៉ុននេះគឺយើងចង់ធ្វើការផ្សព្វផ្សាយអំពីការអភិវឌ្ឍរបស់ប្រទេសយើង ច្បាប់វិនិយោគ គោលការណ៍ផ្សេង និងបទប្បញ្ញត្តិនានាដែលជាសក្តានុពល និងកាលានុវត្តភាពរបស់កម្ពុជា ដើម្បីកៀរគរវិនិយោគិនជប៉ុនឱ្យមកប្រទេសកម្ពុជាបានកាន់តែច្រើនបន្ថែមទៀត»។
លោកបន្ថែមថា តាមផែនការ ការិយាល័យតំណាងនេះនឹងបង្កើតឡើងក្នុងពេលឆាប់ៗ។
លោក សុធា សម្បត្តិ ប្រធានក្រុមប្រឹក្សាធុរកិច្ចកម្ពុជាប្រចាំនៅទីក្រុងបាងកក (CBC) បានស្វាគមន៍ចំពោះការបង្កើតការិយាល័យតំណាងរបស់សភាពាណិជ្ជកម្មកម្ពុជានៅប្រទេសជប៉ុន ដោយលោករំពឹងថា នឹងរួមចំណែកដើរតួនាទីនៅក្នុងការផ្សព្វផ្សាយអំពីកម្ពុជា ការទាក់ទាញវិនិយោគ និងជំរុញទំនាក់ទំនងសេដ្ឋកិច្ចកម្ពុជា ជប៉ុន។
លោកថ្លែងថា៖ «ខ្ញុំពិតត្រេកអរដែលយើងនឹងមានការិយាល័យតំណាងពាណិជ្ជកម្មរបស់សភាពាណិជ្ជកម្ម នៅប្រទេសជប៉ុនក្នុងពេលដ៏ខ្លីខាងមុខ។ វាមានភាពចាំបាច់ណាស់ក្នុងការផ្តល់ព័ត៌មានជាក់លាក់ និងផ្សព្វផ្សាយពីកម្ពុជាដែលស្របជាមួយផែនការយុទ្ធសាស្ត្រសេដ្ឋកិច្ចការទូតដែលរាជរដ្ឋាភិបាលយើងទើបដាក់ចេញ»។
ពាណិជ្ជកម្មទ្វេភាគីកម្ពុជា ជប៉ុន នៅក្នុងត្រីមាសទី ១ ឆ្នាំ ២០២១ សម្រេចបានក្នុងទឹកប្រាក់ជាង ៦៣៣ លានដុល្លារ កើនជិត ៨ ភាគរយបើធៀបនឹងរយៈពេលដូចគ្នាឆ្នាំ ២០២០ នៅក្នុងនោះការនាំចេញទំនិញពីកម្ពុជាមានតម្លៃ ៤៨៩,៦២ លានដុល្លារ កើន ២,៩ ភាគរយពីចំនួន ៤៧៥,៧៦ លានដុល្លារ និងការនាំចូលពីជប៉ុនមានតម្លៃ ១៤៣,៥ លានដុល្លារកើនឡើង ២៨,៥ ភាគរយពីចំនួន ១១១,៧១ លានដុល្លារ។ នេះបើតាមទិន្នន័យអង្គការពាណិជ្ជកម្មក្រៅប្រទេសជប៉ុន Jetro។
ចាប់ពីឆ្នាំ ១៩៩៤ ដល់ឆ្នាំ ២០១៨ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគរបស់ជប៉ុនចំនួន ១៣៧ គម្រោងមានទឹកប្រាក់ ២ ៤៨៦ លានដុល្លារ។ នេះបើយោងតាមក្រសួងពាណិជ្ជកម្ម៕ LA
