ភ្នំពេញៈ ក្រសួងទេសចរណ៍នឹងជំរុញឱ្យមានការប្រើបច្ចេកវិទ្យាឌីជីថលលើការទូទាត់រហ័សក្នុងវិស័យទេសចរណ៍នៅកម្ពុជា ដើម្បីជាការរួមចំណែកស្តារវិស័យទេសចរណ៍ឡើងវិញក្នុងអំឡុង និងក្រោយវិបត្តិជំងឺកូវីដ ១៩ ស្របពេលដែលរដ្ឋាភិបាលគ្រោងនឹងបើកដំណើរការវិស័យទេសចរណ៍ឡើងវិញសម្រាប់ទេសចរបរទេសចាក់វ៉ាក់សាំងរួចក្នុងត្រីមាសទី ៤ ឆ្នាំនេះ។
ការលើកឡើងនេះត្រូវបានធ្វើឡើងក្នុងសិក្ខាសាលាថ្នាក់ជាតិស្តីពីការស្តារឡើងវិញវិស័យទេសចរណ៍កម្ពុជា ក្នុងអំឡុង និងក្រោយវិបត្តិជំងឺកូវីដ ១៩ ដែលមានការចូលរួមពីវាគ្មិនពីស្ថាប័នរដ្ឋ ឯកជន តំណាងការិយាល័យសម្របសម្រួលទេសចរណ៍មេគង្គ និងភាគីពាក់ព័ន្ធតាមប្រព័ន្ធវីដេអូ កាលពីថ្ងៃទី ១ ខែកក្កដា។
លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍បានថ្លែងថា សិក្ខាសាលានេះធ្វើឡើងនៅក្នុងគោលបំណង ដើម្បីផ្លាស់ប្តូរបទពិសោធ និងប្រមូលព័ត៌មានពីគ្រប់ភាគីពាក់ព័ន្ធលើផែនការស្តារវិស័យទេសចរណ៍ឡើងវិញ ដើម្បីប្រែក្លាយបញ្ហាប្រឈមនៃជំងឺកូវីដ ១៩ ឱ្យទៅជាឱកាសនៅក្នុងវិស័យទេសចរណ៍។ ការពិភាក្សានេះក៏មានលើកពីផែនការទទួលកញ្ចប់ទេសចរណ៍ចាក់វ៉ាក់សាំងការពារកូវីដ ១៩ នៅត្រីមាសទី ៤ ឆ្នាំនេះផងដែរ។
លោកបន្ថែមថា៖ «ក្រសួងនឹងជំរុញបច្ចេកវិទ្យាឌីជីថលលើការទូទាត់រហ័សក្នុងវិស័យទេសចរណ៍កម្ពុជា ដែលចាំបាច់មានការចូលរួមពីវិស័យឯកជនដែលជាភាគីសំខាន់ក្នុងការរៀបចំប្រព័ន្ធបច្ចេកវិទ្យាថ្មីៗ និងនវានុវត្តន៍សំដៅសម្រួលដំណើរទេសចរណ៍តាំងពីការចាប់ផ្តើមដំណើររហូតដល់បញ្ចប់»។
លោកបន្ថែមថា ការពិភាក្សាក៏បានរំលេចពីភាពចាំបាច់ក្នុងការអភិវឌ្ឍបច្ចេកវិទ្យាទូទាត់រហ័ស និងងាយស្រួល គឺមានភាពចាំបាច់ក្នុងដំណាក់កាលរីករាលដាលជំងឺកូវីដ ១៩ សំដៅកាត់បន្ថយការប្រើក្រដាសប្រាក់ និងមានភាពងាយស្រួលក្នុងការទូទាត់ គ្រប់គ្រងចរន្តសាច់ប្រាក់ និងមានសុវត្ថិភាព។
លោក Federic H.Proulx នាយកប្រតិបត្តិ AngkorpassTechnology Co.,Ltd ដែលជាក្រុមហ៊ុនបច្ចេកវិទ្យាបានបង្កើតកម្មវិធី App លើទូរស័ព្ទ «Wonderpass» ដើម្បីបម្រើឱ្យវិស័យទេសចរណ៍ បានបង្ហាញជំហរថា ក្រុមហ៊ុនលោកនឹងវិនិយោគលើវិស័យបច្ចេកវិទ្យាការទូទាត់រហ័ស និងងាយស្រួលនៅក្នុងវិស័យទេសចរណ៍នៅកម្ពុជា។
លោកលើកឡើងថា៖ «វិស័យទេសចរណ៍នៅកម្ពុជានឹងមានការរីកចម្រើនខ្លាំងនៅក្រោយវិបត្តិកូវីដ ១៩ ហើយការទូទាត់រហ័សនឹងចូលរួមចំណែកយ៉ាងសំខាន់ ដែលមិនត្រឹមតែការទូទាត់រហ័សទេ ប៉ុន្តែវានឹងអាចឈានដល់ការគ្រប់គ្រងព្រឹត្តិការណ៍ទេសចរណ៍ និងកីឡាទេសចរណ៍ជាដើម»។
ប្រព័ន្ធទូទាត់បានរួមចំណែកយ៉ាងសំខាន់ក្នុងការគាំទ្រដល់ការអភិវឌ្ឍសេដ្ឋកិច្ចតាមរយៈការផ្តល់នូវហេដ្ឋារចនាសម្ព័ន្ធហិរញ្ញវត្ថុប្រកបដោយប្រសិទ្ធភាព និងសុវត្ថិភាពសម្រាប់សម្រួលដល់ប្រតិបត្តិការផ្ទេរប្រាក់ទូទាត់ក្នុងសកម្មភាពទិញ លក់ទំនិញ និងសេវា និងការជួញដូរនៅក្នុងទីផ្សារហិរញ្ញវត្ថុ។ នេះបើតាមរបាយការណ៍ធនាគារជាតិនៃកម្ពុជា (NBC)។
របាយការណ៍ឱ្យដឹងថា៖ «ប្រព័ន្ធទូទាត់បានផ្តល់នូវមធ្យោបាយងាយស្រួល សុវត្ថិភាព រហ័ស និងមានកម្រៃសមរម្យសម្រាប់ផ្ទេរមូលនិធិជាអេឡិចត្រូនិកក្នុងចំណោមភ្នាក់ងារសេដ្ឋកិច្ចដែលបានរួមចំណែកឱ្យដំណើរការផ្គត់ផ្គង់រូបិយវត្ថុរបស់ធនាគារកណ្តាលកាន់តែមានប្រសិទ្ធភាព»។
រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា ក្នុងរយៈពេល ១ ខែមិថុនាពេញ ភ្ញៀវក្នុងស្រុកចំនួនជាង ៣ សែននាក់បានដើរកម្សាន្តនៅទូទាំងប្រទេសកើន ៧៨,៥៨ ភាគរយធៀបនឹងខែឧសភាឆ្នាំនេះ។
លោកថ្លែងថា៖ «គោលដៅទេសចរណ៍តំបន់ឆ្នេរ ពិសេសខេត្តកំពត កែប និងខេត្តព្រះសីហនុ ព្រមទាំងគោលដៅអេកូទេសចរណ៍ ទេសចរណ៍ធម្មជាតិ និងកសិទេសចរណ៍ គឺជាគោលដៅសំខាន់ដែលបានស្រូបទាញយកចរន្តភ្ញៀវទេសចរផ្ទៃក្នុងបានច្រើន»៕ LA