.jpg)
កម្មករលីអង្ករចេញពីលើរថយន្តយកទៅដាក់ក្នុងឃ្លាំង។ ហេង ជីវ័ន
ភ្នំពេញៈ លោក សុង សារ៉ន ប្រធានសហព័ន្ធស្រូវអង្ករកម្ពុជា (CRF) បានឱ្យដឹងថា កម្ពុជានឹងធ្វើពិពិធកម្មទីផ្សារអង្ករដោយផ្តោតលើទីផ្សារប្រទេសចិន និងបណ្តាប្រទេសតំបន់អាស៊ាន។
ការធ្វើពិពិធកម្មទីផ្សារនេះត្រូវបានធ្វើឡើង បន្ទាប់ពីការនាំចេញអង្កររបស់កម្ពុជាបានធ្លាក់ចុះជាបន្តបន្ទាប់នៅទីផ្សារសហគមន៍អឺរ៉ុបដោយហេតុថា កង្វះកុងតឺន័រនាំឱ្យតម្លៃដឹកជញ្ជូនតាមសមុទ្រឡើងថ្លៃខ្ពស់ក្នុងរយៈពេលជាង ១ ឆ្នាំ នៃវិបត្តិជំងឺកូវីដ ១៩។
លោក សុង សារ៉ន ប្រាប់ ភ្នំពេញ ប៉ុស្តិ៍ថា រដ្ឋាភិបាល និងសហព័ន្ធស្រូវអង្ករកម្ពុជា កំពុងគិតគូរពីការធ្វើពិពិធកម្មទីផ្សារដោយផ្តោតលើទីផ្សារអាស៊ីគឺប្រទេសចិន (ហុងកុង និងម៉ាកាវ) ដែលជាទីផ្សារធំជាងគេ។
លោកបន្តថា កម្ពុជានឹងបន្តជំរុញដល់ភាគីចិនឱ្យបង្កើនការទិញអង្ករពីកម្ពុជាបន្ថែមទៀត ក៏ដូចជាធ្វើពិពិធកម្មទីផ្សារអង្ករទៅកាន់បណ្តាប្រទេសតំបន់អាស៊ានផងដែរ។
លោកថ្លែងថា៖ «សហព័ន្ធស្រូវអង្ករនឹងរៀបចំកិច្ចប្រជុំជាមួយសមាជិក ដើម្បីរកយុទ្ធសាស្ត្រឆ្លើយតបនឹងផែនការបន្ទាប់ ទាំងការគិតគូរលើសន្និធិស្រូវ ដើម្បីរក្សាតម្លៃស្រូវនៅពេលប្រមូលផលខាងមុខ និងជួយដល់សមាជិកក្នុងទុនបង្វិលទិញស្រូវ ដើម្បីលើកស្នើដល់រដ្ឋាភិបាលក្នុងគោលបំណង ដើម្បីជួយវិស័យស្រូវអង្ករកម្ពុជា»។
លោកបន្ថែមថា ដំណោះស្រាយធំបន្ទាប់ គឺជួយទំនុកបម្រុង និងគាំទ្រដល់រោងម៉ាស៊ីនកិនស្រូវលើទុនក្នុងការទិញស្រូវ ដើម្បីរក្សាសន្និធិស្រូវអង្ករត្រៀមខ្លួនសម្រាប់ការនាំចេញនៅឆមាសទី ២ នៅពេលបញ្ហាកង្វះកុងតឺន័រលើពិភពលោកវិលត្រឡប់មកប្រក្រតីឡើងវិញ។
លោកប្រាប់ថា៖ «ចំពោះបញ្ហាដឹកជញ្ជូនតាមផ្លូវសមុទ្រសហព័ន្ធសង្ឃឹមថា ដំណោះស្រាយមួយដ៏សមរម្យទាក់ទងនឹងវិបត្តិដឹកជញ្ជូននេះនឹងច្បាស់ជាមាន ដោយសារតែប្រទេសធំៗក្នុងសកលលោកក៏នឹងចាប់ផ្តើមសកម្មភាពក្នុងការដោះស្រាយ»។
រាជរដ្ឋាភិបាលកម្ពុជាបាននិងកំពុងពន្លឿនការចរចាជាមួយភាគីចិនឱ្យបង្កើនកូតានាំចូលអង្ករពីកម្ពុជា ១០ ម៉ឺនតោនទៀត ខណៈរដ្ឋាភិបាលរំពឹងថានឹងសម្រេចបាននៅចុងឆ្នាំនេះ។ សព្វថ្ងៃចិនបានផ្តល់កូតានាំចូលអង្ករពីកម្ពុជាចំនួន ៤០ ម៉ឺនតោនក្នុង ១ ឆ្នាំ។ នេះបើតាម លោក ស៊ាង ថៃ អ្នកនាំពាក្យក្រសួងពាណិជ្ជកម្ម។
លោក ស៊ាង ថៃ បាននិយាយថាបច្ចុប្បន្នមានរោងម៉ាស៊ីនកិនស្រូវចំនួន ៤៤ របស់កម្ពុជាត្រូវបានទទួលស្គាល់ដោយអគ្គរដ្ឋបាលគយចិនលើសមត្ថភាពបទដ្ឋានស្តង់ដាសុវត្ថិភាពចំណីអាហាររបស់ប្រទេសចិន។ លោកប្រាប់ថា៖ «កេរ្តិ៍ឈ្មោះអង្ករកម្ពុជាកំពុងមានកិត្តិនាមល្អនៅប្រទេសចិន ជាក់ស្តែងក្រសួងពាណិជ្ជកម្មបានយកចិត្តទុកដាក់ផ្តល់អាទិភាពលើការផ្សព្វផ្សាយអង្ករកម្ពុជានៅទីផ្សារប្រទេសចិន»។
ចិនបានយល់ព្រមផ្តល់កូតានាំចូលអង្ករពីកម្ពុជាកើនឡើងជាបន្តបន្ទាប់ចាប់ពី ២០ ម៉ឺនតោនក្នុងឆ្នាំ ២០១៧ ដល់ ៤០ ម៉ឺនតោននៅឆ្នាំ ២០១៩។
CRF ឱ្យដឹងថា ទីផ្សារទទួលទិញអង្ករពីកម្ពុជានាំមុខក្នុងឆមាសទី១ គឺប្រទេសចិន និងតំបន់ស្វយ័តហុងកុង ម៉ាកាវ ៥១,៩%, បារាំង ១០,៥០%, និងហ្គាបុង ៧,៩៣%៕ LA
វីដេអូ៖
