ភ្នំពេញៈ រោងចក្រក្នុងឧស្សាហកម្មកាត់ដេរយ៉ាងហោច ១៥ បានចូលរួមក្នុងគម្រោង Switch Garment ដែលជាគម្រោងលើកកម្ពស់ការអនុវត្តថាមពលប្រកបដោយនិរន្តរភាព និងការវិនិយោគលើបច្ចេកវិទ្យាថាមពលស្អាតនៅក្នុងវិស័យកាត់ដេរនៅកម្ពុជា។
Switch Garment ត្រូវបានអនុវត្តរួមគ្នារវាងសមាគមរោងចក្រកាត់ដេរនៅកម្ពុជា (GMAC) និងវិទ្យាស្ថានកំណើនបៃតងសកល (GGGI) និងអង្គការ Geres Cambodia ដែលបានដាក់ឱ្យអនុវត្តកាលពីថ្ងៃទី ១១ ខែ កញ្ញា ឆ្នាំ ២០២០។
លោក លី តេកហេង អ្នកគ្រប់គ្រងទូទៅ GMAC និងជាប្រធានគម្រោង Switch Garment បានប្រាប់ ភ្នំពេញ ប៉ុស្តិ៍ថា សព្វថ្ងៃរោងចក្រ ១៥ បានចូលរួមអនុវត្តថាមពលប្រកបដោយនិរន្តរភាពនៃគម្រោង Switch Garmen។
លោកប្រាប់ថា៖ «យើងកំពុងជ្រើសរើសរោងចក្រ ៦ ថែមទៀត ដោយយើងមានគោលដៅដល់ ២០ រោងចក្រ ឬលើសពីនេះ។ យើងឃើញថា យីហោម៉ាកល្បីជាច្រើនបានចាប់អារម្មណ៍លើគម្រោងនេះទាំងរោងចក្រផលិតឱ្យម៉ាកយីហោល្បីៗ និងរោងចក្រវិនិយោគផ្ទាល់បានសុំយើងចូលរួមក្នុងគម្រោងនេះតែម្តង»។
លោកឱ្យដឹងទៀតថា GMAC បាននិងកំពុងជំរុញឱ្យសមាជិកប្រើប្រាស់ថាមពលសូឡាដំឡើងលើដំបូលអគារ ប៉ុន្តែរដ្ឋមិនលើកទឹកចិត្តឱ្យក្រុមហ៊ុនវិនិយោគដោយផ្ទាល់នោះទេ។
លោកនិយាយថា៖ «គម្រោងយើងទាក់ទងនឹងនិរន្តរភាពថាមពល ដូចនេះពួកគាត់ជាអ្នកវិនិយោគបានដឹងពីតម្លៃអគ្គិសនីនៅកម្ពុជា គឺថ្លៃជាងគេនៅក្នុងតំបន់ អ៊ីចឹងហើយគាត់សម្លឹងមើលថា តើជម្រើសផ្សេងអ្វីដែលអាចជួយដល់ការវិនិយោគរបស់គាត់ ដូចជា ការដំឡើងផ្ទាំងថាមពលសូឡានៅលើដំបូល និងការផ្លាស់ប្តូរពីការប្រើប្រាស់អុសដុតឡកម្តៅទៅជាជម្រើសថ្មីផ្សេងទៀតជាដើម»។
បើតាមលោក តេកហេង គម្រោងនេះមានរយៈពេល ៤ ឆ្នាំ គឺចាប់ពីឆ្នាំ ២០២០ ដល់ឆ្នាំ ២០២៤ ដែលជាជំនួយរបស់ Switch Asia នូវថវិកាចំនួន ២ ៩៩៥ ៧៤៨ អឺរ៉ូ៕ LA