ភ្នំពេញៈ រដ្ឋាភិបាលកម្ពុជានឹងពិនិត្យសេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជានៅថ្ងៃនេះ ខណៈក្រុមអ្នកវិនិយោគរំពឹងថា ច្បាប់វិនិយោគថ្មីនឹងផ្តល់ភាពអនុគ្រោះច្រើនបន្ថែមទៀតដល់វិនិយោគិនទៅលើអ្វីដែលមានស្រាប់ក្នុងច្បាប់ ដើម្បីបង្កើនសមត្ថភាពប្រកួតប្រជែងរបស់សហគ្រាសធុនតូច និងមធ្យម និងទាក់ទាញការវិនិយោគពីក្រៅប្រទេសមកបន្ថែមទៀត។
ទីស្តីការគណៈរដ្ឋមន្ត្រីនឹងបើកកិច្ចប្រជុំពេញអង្គដើម្បីពិភាក្សាលើសេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជានៅថ្ងៃទី ៩ ខែកក្កដានេះតាមប្រព័ន្ធ Zoom ដែលដឹកនាំដោយលោកនាយករដ្ឋមន្ត្រី ហ៊ុន សែន។ នេះបើតាមសេចក្តីជូនដំណឹង។
លោក លឹម ហេង អនុប្រធានសភាពាណិជ្ជកម្មកម្ពុជា (CCC) បានប្រាប់ភ្នំពេញប៉ុស្តិ៍ថា សភាពាណិជ្ជកម្ម គឺតួអង្គសំខាន់ក្នុងការផ្តល់ធាតុចូលទៅក្នុងច្បាប់ថ្មីនេះ ដើម្បីទទួលអត្ថប្រយោជន៍បន្ថែមទៅលើអ្វីដែលមានស្រាប់ក្នុងច្បាប់។
លោកសង្ឃឹមថា រដ្ឋាភិបាលនឹងអនុម័តធាតុចូលដែល CCC បានផ្តល់ទៅកាន់ក្រុមប្រឹក្សាអភិវឌ្ឍន៍កម្ពុជា នូវការអនុញ្ញាតឱ្យអនុគណៈកម្មាធិការវិនិយោគរាជធានី-ខេត្តអាចអនុម័តគម្រោងដែលមានទុនវិនិយោគក្រោម ១០ លានដុល្លារដើម្បីទាក់ទាញការវិនិយោគនៅតាមរាជធានីខេត្ត និងបង្កើនភាពប្រកួតប្រជែងរបស់រោងចក្រ សហគ្រាសក្នុងស្រុកផងដែរ។
លោកបន្ថែមថា បើធាតុចូលនេះត្រូវបានអនុម័ត វានឹងទាក់ទាញឱ្យមានលំហូរការវិនិយោគកាន់តែច្រើនទៅតាមបណ្តាខេត្តដែលជាប្រភពផលិត និងនាំចូលវត្ថុធាតុដើមសម្រាប់ប្រើប្រាស់ឱ្យរោងចក្រសហគ្រាស។
លោកប្រាប់ថា៖ «យើងឃើញហើយថា រោងចក្រ សហគ្រាសជាច្រើនប្រមូលផ្តុំគ្នានៅភ្នំពេញដែលត្រូវដឹកជញ្ជូនវត្ថុធាតុដើមមករោងចក្រ រួចផលិតនាំចេញទៅវិញដែលត្រូវចំណាយថ្លៃដើមខ្ពស់ អ៊ីចឹងប្រសិនបើថ្នាក់ខេត្តអាចអនុម័តត្រឹមទុនក្រោម ១០ លានដុល្លារ រោងចក្រ សហគ្រាសជាច្រើននឹងហូរចូលទៅបណ្តាខេត្ត ហើយវាក៏នឹងផ្តល់ប្រយោជន៍ដល់កម្មករនិយោជិតនៅទីនោះដោយមិនចាំបាច់ធ្វើចំណាកស្រុក ហើយអាចជួយកាត់បន្ថយភាពក្រីក្រប្រជាជនក្នុងតំបន់ផងដែរ»។
កន្លងមកអនុគណៈកម្មាធិការវិនិយោគរាជធានី-ខេត្តអាចអនុម័តគម្រោងវិនិយោគក្រោម ២ លានដុល្លារ ប៉ុណ្ណោះនៃច្បាប់ចាស់។ នេះបើយោងតាមលោក លឹម ហេង។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យម (FASMAC) បានស្វាគមន៍ និងគាំទ្រចំពោះការបង្កើតច្បាប់វិនិយោគិនថ្មីនេះ ដោយលោករំពឹងថា ច្បាប់នេះនឹងជួយលើកកម្ពស់ភាពប្រកួតប្រជែងសហគ្រាសធុនតូច និងមធ្យមក្នុងស្រុកបន្ថែមទៀត។
លោកនិយាយថា៖ «ទិសដៅរបស់រដ្ឋាភិបាល គឺដើម្បីជួយដល់សហគ្រាសធុនតូច និងមធ្យមដែលជាឆ្អឹងខ្នងទ្រទ្រង់កំណើនសេដ្ឋកិច្ចជាតិ»។
អ្នកស្រី កែវ មុំ ប្រធានក្រុមប្រឹក្សាភិបាលក្រុមហ៊ុន លីលីហ៊្វូដ អ៊ិនដាសទ្រី ខូ អិលធីឌី សង្ឃឹមថា ច្បាប់ថ្មីនឹងជួយអូសទាញអ្នកវិនិយោគជាច្រើនមកវិនិយោគនៅកម្ពុជានៅពេលច្បាប់នេះត្រូវបានអនុម័តជាផ្លូវការនាពេលខាងមុខនេះ។
អ្នកស្រីប្រាប់ថា៖ «ខ្ញុំសង្ឃឹមថានឹងផ្តល់ឱកាសកាន់តែច្រើនដល់សហគ្រាសធុនតូច និងមធ្យមផលិតកែច្នៃវត្ថុធាតុដើម ឬផលិតផលពាក់កណ្តាលដើម្បីផ្គត់ផ្គង់ឱ្យឧស្សាហកម្មធំៗដែលនឹងចូលមកបណ្តាក់ទុននៅកម្ពុជា ព្រមទាំងបង្កើតឱកាសការងារកាន់តែច្រើន និងជួយសេដ្ឋកិច្ចជាតិផងដែរ»។
យោងតាម លោក លឹម ហេង ចំណុចពិសេសរបស់ច្បាប់វិនិយោគថ្មីនេះមានការលើកទឹកចិត្តច្រើនជាងច្បាប់ចាស់លើការជំរុញឱ្យប្រើប្រាស់ផលិតផលក្នុងស្រុក ដែលសហគ្រាសធុនតូច និងមធ្យមជាច្រើនបានផលិតនាំចេញ។
ច្បាប់នេះក៏នឹងផ្តល់ភាពអនុគ្រោះពន្ធលើការប្រើប្រាស់វត្ថុធាតុដើមក្នុងស្រុកដែលវត្ថុធាតុដើមមួយចំនួននឹងក្លាយជាបន្ទុករបស់រដ្ឋ ហើយច្បាប់នេះក៏បានផ្តល់ការលើកទឹកចិត្តខ្លាំងទៅលើការបណ្តុះបណ្តាលធនធានមនុស្សផងដែរ។ លោករំពឹងថា ច្បាប់នេះអាចនឹងចូលធរមាននៅដំណាច់ឆ្នាំ ២០២១ នេះ។
ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងចំនួន ៧០ ជាមួយនឹងទុនវិនិយោគសរុបចំនួន ២ ៤២៨ លានដុល្លារ ក្នុងឆមាសទី១ ឆ្នាំ ២០២១។ នេះបើយោងតាមការគណនារបស់កាសែតភ្នំពេញ ប៉ុស្តិ៍ ចំពោះតែគម្រោងត្រូវបាន CDC បង្ហោះនៅលើទំព័រហ្វេសប៊ុកផ្លូវការចាប់ពីខែមករា ដល់ដំណាច់ខែមិថុនា ឆ្នាំនេះ៕ LA