ភ្នំពេញៈ កម្ពុជាបាននាំចេញម្រេចសម្គាល់ទីតាំងភូមិសាស្ត្រ (GI) និងម្រេចមិនមែន GI សរុប ១៤ ៥៦១,៦២ តោនក្នុងឆមាសទី ១ ឆ្នាំ ២០២០ កើនជិត ៤ ដង (៣៩៨,៦៧ ភាគរយ) បើធៀបរយៈពេលដូចគ្នាកាលពីឆ្នាំមុន។ នេះបើតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ។
ទិន្នន័យបង្ហាញថា កម្ពុជាបាននាំចេញម្រេចទៅគោលដៅចំនួន ១៦ ប្រទេស ទាំងទ្វីបអាស៊ី និងអឺរ៉ុបក្នុងនោះប្រទេសវៀតណាមជាទីផ្សារម្រេចឈានមុខគេ ១៤ ២៩២,៤៩ តោន និងតាមពីក្រោយដោយទីផ្សាររបស់ប្រទេសអាល្លឺម៉ង់ ១៦០,៥៧ តោន។
ក្រៅពីនេះរួមមាន ប្រទេសបែលហ្ស៊ិក មាន ១០,៦៣ តោន កាណាដា ០,៥២ តោន ឆែក ៦,១០ តោន បារាំង ១៩,១ តោន ឥណ្ឌា ៤២ តោន ជប៉ុន ២,៥៨ តោន កូរ៉េ ១,៥៥ តោន ប៉ូឡូញ ៧,៩ តោន រុស្ស៊ី ០,១៣ តោន ស៊ុយអែត ១,២៩ តោន ស្វ៊ីស ០,៤៨ តោន កោះតៃវ៉ាន់ ១៥ តោន អង់គ្លេស ១,២៤ តោន អារ៉ាប់ ០,០១ និងអាមេរិក ១,៧៥ តោន។
លោក ម៉ាក នី ប្រធានសហព័ន្ធម្រេច និងគ្រឿងទេសកម្ពុជាបានប្រាប់ ភ្នំពេញ ប៉ុស្តិ៍ កាលពីថ្ងៃទី ៨ ខែកក្កដាថា ទាំងតម្រូវការ និងតម្លៃម្រេចចាប់ផ្តើមមានភាពល្អប្រសើរនៅដើមឆ្នាំនេះដោយហេតុថាទិន្នផលម្រេចនៅក្នុងប្រទេសវៀតណាមដែលជាប្រទេសផលិត និងនាំចេញម្រេចធំមួយនៅក្នុងតំបន់បានធ្លាក់ចុះជាបន្តបន្ទាប់។
លោកប្រាប់ទៀតថា៖ «តម្លៃម្រេចអាចនឹងមានភាពល្អប្រសើរ ដោយសារទិន្នផលម្រេចរបស់វៀតណាមធ្លាក់ចុះដែលវៀតណាមនឹងធ្វើការបញ្ជាទិញពីកម្ពុជាដើម្បីបំពេញស្តុករបស់ខ្លួន អ៊ីចឹងតម្លៃម្រេចនឹងល្អពីឆ្នាំនេះតទៅ ហើយខ្ញុំសង្ឃឹមថាកសិករក៏នឹងចាប់ផ្តើមថែទាំម្រេចឡើងវិញ»។
លោកបានឱ្យដឹងថា បច្ចុប្បន្ន ម្រេចមិនមែន GI មានតម្លៃកើនឡើងបន្តិចក្នុងរង្វង់ ១៤ ០០០ រៀល ក្នុង ១ គីឡូក្រាម (ឆ្នាំមុន ១០ ០០០ រៀល)។
លោកបន្ថែមថា៖ «សមាជិករបស់សហព័ន្ធនៅតែបន្តបញ្ជាទិញម្រេចពីកសិករតាមផែនការរបស់គាត់ ប៉ុន្តែពួកគាត់មានឧបសគ្គដោយតម្លៃដឹកជញ្ជូនទាំងក្នុង និងក្រៅស្រុក ពិសេសការដឹកជញ្ជូនតាមសមុទ្រឡើងថ្លៃ ៣ ដងនាពេលនេះ»។
ចំណែកតម្លៃម្រេចកំពត GI មិនមានការប្រែប្រួលនោះទេគឺម្រេចខ្មៅថ្លៃ ១៥ ដុល្លារ ម្រេចក្រហមថ្លៃ ២៥ ដុល្លារ និងម្រេចសមានតម្លៃ ២៨ ដុល្លារក្នុង ១ គីឡូក្រាម។ នេះបើតាមលោក ងួន ឡាយ ប្រធានសមាគមលើកកម្ពស់ម្រេចកំពត GI។
លោក ងួន ឡាយ បានបន្តថា បរិមាណម្រេចកំពត ៧០ តោនត្រូវបានទិញដោយក្រុមហ៊ុននាំចេញកាលពីឆ្នាំ ២០២០។ សព្វថ្ងៃម្រេចកំពតត្រូវបាននាំចេញទៅកាន់បណ្តាប្រទេសជាង ៥០ ភាគច្រើនស្ថិតនៅទ្វីបអឺរ៉ុប។
កម្ពុជាបាននាំចេញកសិផលចំនួនជិត ៤,៥ លានតោនក្នុងឆមាសទី១ ឆ្នាំ ២០២១ កើនឡើងជិត ៨៥ ភាគរយធៀបនឹងរយៈពេលដូចគ្នាឆ្នាំ ២០២០ និងទទួលបានចំណូលជាង ២,៥៧ ពាន់លានដុល្លារ។ នេះបើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ផលិតផលកសិផលសំខាន់ៗដែលកម្ពុជានាំចេញមានដូចជា អង្ករ ស្រូវ ចេកស្រស់ ម្រេច ដំឡូងមី គ្រាប់ស្វាយចន្ទី គ្រាប់ពោត សណ្តែកសៀង សណ្តែកបាយ ប្រេងដូង ថ្នាំជក់ ម្ទេស និងបន្លែចម្រុះ ជាដើម៕ LA