.jpg)
ក្រសួងពាណិជ្ជកម្ម និងធនាគារវីង ប្រជុំទ្វេភាគីស្តីពីការតភ្ជាប់ប្រព័ន្ធទូទាត់តាមបែបឌីជីថលរបស់ធនាគារវីង និងថ្នាលអេឡិចត្រូនិកតាមអនឡាញ កាលពីម្សិលមិញ។ រូបថត ក្រសួងពាណិជ្ជកម្ម
ភ្នំពេញៈ ក្រសួងពាណិជ្ជកម្មនឹងសហការជាមួយធនាគារវីង (ខេមបូឌា) ដើម្បីធ្វើការតភ្ជាប់ប្រព័ន្ធទូទាត់តាមបែបឌីជីថលជាមួយថ្នាលទីផ្សារអេឡិចត្រូនិក Cambodiatrade.com របស់ក្រសួង ដើម្បីបង្កើនភាពងាយស្រួល និងកាត់បន្ថយពេលវេលាជូនអតិថិជន និងសហគ្រាសធុនតូច និងមធ្យមក្នុងការធ្វើពាណិជ្ជកម្មតាមប្រព័ន្ធអេឡិចត្រូនិកនៅប្រទេសកម្ពុជា។
ផែនការនៃកិច្ចសហការនេះបានធ្វើឡើងកាលពីព្រឹកថ្ងៃទី ៧ ខែ កក្កដា ឆ្នាំ ២០២១ ក្នុងជំនួបរវាងលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម និងលោក Manu Rajan នាយកប្រតិបត្តិនៃធនាគារវីងតាមរយៈប្រព័ន្ធវីដេអូ (Zoom) ដើម្បីពិភាក្សាគ្នាស្វែងរកលទ្ធភាពរៀបចំកិច្ចសហប្រតិបត្តិការពីការតភ្ជាប់ប្រព័ន្ធទូទាត់តាមបែបឌីជីថលរបស់ធនាគារវីង។
លោកស្រី តឹករ៉េត កំរង បានថ្លែងអំណរគុណដល់ធនាគារវីង ដែលមានបំណងធ្វើកិច្ចសហប្រតិបត្តិការជាមួយក្រសួងពាណិជ្ជកម្មតាមរយៈការតភ្ជាប់ប្រព័ន្ធទូទាត់តាមបែបឌីជីថលរបស់ធនាគារវីង និងថ្នាលអេឡិចត្រូនិករបស់ក្រសួងពាណិជ្ជកម្ម Cambodiatrade.com។
លោកស្រីថ្លែងថា៖ «ក្រសួងពាណិជ្ជកម្មរីករាយក្នុងការធ្វើសហប្រតិបត្តិការជាមួយធនាគារវីង និងស្នើឱ្យក្រុមការងារបច្ចេកទេសទាំងពីរសហការគ្នាឱ្យបានល្អ ដើម្បីធានាឱ្យបាននូវការតភា្ជប់ប្រព័ន្ធទូទាត់តាមបែបឌីជីថលរបស់ធនាគារវីង និងថ្នាលអេឡិចត្រូនិក CambodiaTrade ឱ្យទទួលបានជោគជ័យ។
បើយោងតាមក្រសួងពាណិជ្ជកម្ម បច្ចុប្បន្នផ្សារខេមបូឌា ត្រេដ (CambodiaTrade) ត្រូវបានបើកសម្រាប់ការចុះឈ្មោះជាបឋមជូនសហគ្រាសធុនតូច និងមធ្យមកម្ពុជា ដែលមានបំណងចង់ដាក់លក់ផលិតផលនៅលើថ្នាលបច្ចេកវិទ្យានេះទៅកាន់អតិថិជនក្នុងស្រុក និងក្រៅប្រទេស។
ក្រសួងពាណិជ្ជកម្មបានដាក់ឱ្យដំណើរការ Cambodia Trade កាលពីពាក់កណ្តាលខែមិថុនា កន្លងមកក្នុងគោលបំណងដើម្បីជួយដល់សហគ្រាសធុនតូច និងមធ្យមនៅកម្ពុជាក្នុងការលក់ផលិតផលតាមប្រព័ន្ធអនឡាញដល់អតិថិជនសក្តានុពលទាំងក្នុងស្រុក និងទីផ្សារក្រៅស្រុក។ នេះបើតាមសេចក្តីប្រកាសព័ត៌មាន។
ដើម្បីមានសិទ្ធិប្រើប្រាស់ផ្សារនេះសហគ្រាសធុនតូច និងមធ្យមត្រូវតែបំពេញតាមលក្ខន្តិកៈតម្រូវ គឺជាក្រុមហ៊ុន ឬសហគ្រាសដែលបានចុះឈ្មោះជាផ្លូវការជាមួយក្រសួងពាណិជ្ជកម្ម ឬមានលិខិតអនុញ្ញាតប្រកបអាជីវកម្មមានវិញ្ញាបនបត្រពន្ធប៉ាតង់ (Patent Certificate) និងលេខអត្តសញ្ញាណសារពើពន្ធ (VAT Certificate) មានសុពលភាព និងលក់ផលិតផលដែលផលិតនៅក្នុងប្រទេសកម្ពុជា។
អ្នកស្រី កែវ មុំ ប្រធានសមាគមសហគ្រិនស្ត្រីប្រាប់ភ្នំពេញប៉ុស្តិ៍កាលពីពេលថ្មីៗនេះថា ការដាក់ឱ្យដំណើរការនេះជាការគិតគូរដ៏ល្អរបស់ក្រសួងក្នុងការលើកទឹកចិត្តដល់អ្នកផលិតក្នុងស្រុកឱ្យលក់ផលិតនៅលើប្រព័ន្ធអនឡាញបាន។
អ្នកស្រីបាននិយាយថា៖ «ខ្ញុំសង្ឃឹមថា វានឹងជួយដល់វិស័យសហគ្រាសធុនតូច និងមធ្យម និងជំរុញចែកចាយផលិតផលខ្មែរឱ្យបានកាន់តែធំទូលាយនៅលើទីផ្សារ ទាំងថ្នាក់ជាតិ និងអន្តរជាតិ»៕ LA
