ភ្នំពេញៈ ABA ដែលជាធនាគារពាណិជ្ជឈានមុខនៅកម្ពុជាបានប្រកាសពីការពង្រីក និងពង្រឹងកិច្ចសហប្រតិបត្តិការក្នុងការទទួលយកពាណិជ្ជករជាមួយក្រុមហ៊ុន UnionPay ដែលជាបណ្តាញទូទាត់សកលផ្តល់សេវាកាតទូទាត់ធំជាងគេលើពិភពលោក។
ABA បានដាក់ឱ្យប្រើប្រាស់ម៉ាស៊ីនទូទាត់ចរន្តជិត Contactless POS ជាង ១ ០០០ ម៉ាស៊ីន នៅតាមពាណិជ្ជករ UnionPay នៅតាមហាងអាហារ និងភេសជ្ជៈ ទីកន្លែងកម្សាន្ត និងហាងទំនិញនានានៅទូទាំងប្រទេសកម្ពុជា។ ABA គឺជាធនាគារចេញកាតច្រើនបំផុតមួយនៅកម្ពុជា ហើយបាននិងកំពុងចេញកាត UnionPay ចាប់តាំងពីឆ្នាំ ២០១៥។ ABA ក៏កំពុងទទួលយកពាណិជ្ជករសម្រាប់ក្រុមហ៊ុន UnionPay ចាប់តាំងពីឆ្នាំ ២០១៦ និងជាធនាគារដែលទទួលយកពាណិជ្ជករ UnionPay ដ៏ច្រើនបំផុតមួយនៅប្រទេសកម្ពុជា។
លោកស្រី លាង ចិន្តា អ្នកគ្រប់គ្រងប្រចាំកម្ពុជារបស់ក្រុមហ៊ុន UnionPay International នៅតំបន់អាស៊ីអាគ្នេយ៍ សង្កេតឃើញថា ប្រជាជនខ្មែរបានចាប់យកផលិតផលទូទាត់នវានុវត្តន៍ដូចជា ការទូទាត់ចរន្តជិត (Contactless) ការទូទាត់អនឡាញ និងការទូទាត់តាមកូដ QR ២-៣ ឆ្នាំហើយ។ UnionPay ខិតខំផ្តល់នូវផលិតផល និងសេវាទូទាត់ដែលឆ្លើយតបនឹងការផ្លាស់ប្តូរតម្រូវការសេវាទូទាត់របស់អតិថិជន និងអាជីវកម្ម។
លោកស្រីនិយាយថា៖ «យើងមានសេចក្តីសោមនស្សរីករាយដែលអាចពង្រីក និងពង្រឹងកិច្ចសហប្រតិបត្តិការជាមួយដៃគូដែលមានចិត្តដូចគ្នា និងជាធនាគារឈានមុខក្នុងវិស័យហិរញ្ញវត្ថុឌីជីថល ដូចជាធនាគារ ABA ដើម្បីពន្លឿនការផ្លាស់ប្តូររបស់ប្រទេសកម្ពុជាទៅរកសង្គមឌីជីថលមួយ»។
លោក Sanzhar Abdullayev នាយកគ្រប់គ្រងកាត និងសេវាទូទាត់អេឡិចត្រូនិករបស់ ABA និយាយថា៖ «គំនិតផ្តួចផ្តើមក្នុងការដាក់ឱ្យប្រើប្រាស់ម៉ាស៊ីនទូទាត់ចរន្តជិត និងកូដ QR របស់ UnionPay នៅតាមពាណិជ្ជករនានាប្រាកដជាមានផលវិជ្ជមានដល់ការរស់នៅរបស់អតិថិជនកម្ពុជា។
លោកបន្ថែមថា៖ «យើងជឿថា គំនិតផ្តួចផ្តើមនេះនឹងបង្កើនការប្រើប្រាស់សេវាហិរញ្ញវត្ថុដ៏ទំនើប និងលើកទឹកចិត្តឱ្យប្រើប្រាស់សេវាទូទាត់អេឡិចត្រូនិកកាន់តែច្រើន ជាពិសេសអំឡុងពេលការរីករាលដាលកូវីដ ១៩»។
ធនាគារ ABA បាននិងកំពុងដាក់ឱ្យប្រើប្រាស់កូដ QR របស់ UnionPay សម្រាប់ការទូទាត់នៅតាមពាណិជ្ជករជាង ១ ០០០ ទីតាំង នៅហាងជួញដូររាយ ហាងអាហារ និងភេសជ្ជៈ ទីកន្លែងកម្សាន្ត និងទីតាំងផ្សេងៗជាច្រើនទៀតនៅប្រទេសកម្ពុជា។ ម្យ៉ាងវិញទៀត ABA ចាប់ផ្តើមសេវាទទួលយកពាណិជ្ជករសម្រាប់ក្រុមហ៊ុន UnionPay International នៅលើប្រព័ន្ធទូទាត់អនឡាញ PayWay របស់ខ្លួននៅខែវិច្ឆិកា ឆ្នាំ ២០១៩៕