ភ្នំពេញៈ «កិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់ស្តីពីការប្រកួតប្រជែង» ដែលនឹងដើរតួនាទីសំខាន់ក្នុងការជំរុញសមត្ថភាពផលិត និងនាំចេញផលិតផលកម្ពុជាទៅផ្សារអន្តរជាតិ ពិសេសប្រទេសចិន ត្រូវរំពឹងថានឹងចូលជាធរមាននៅថ្ងៃទី០១ ខែមករា ឆ្នាំ២០២២ បន្ទាប់ពីសេចក្តីព្រាងច្បាប់នេះត្រូវបានគណៈកម្មការជំនាញនៃរដ្ឋសភាជាតិកម្ពុជា ប្រកាសគាំទ្រទាំងស្រុង។
លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ដែលបានដឹកនាំគណៈប្រតិភូអន្តរក្រសួងចូលរួមកិច្ចប្រជុំការពារសេចក្តីព្រាងច្បាប់ស្តីពី«ការអនុម័តយល់ព្រមលើកិច្ចព្រមព្រៀងពាណិជ្ជកម្មសេរី កម្ពុជា-ចិន និងច្បាប់ស្តីពីការប្រកួតប្រជែង» ជាមួយលោកស្រី និន សាផុន ប្រធានគណៈកម្មការទី៩ នៃរដ្ឋសភា កាលពីថ្ងៃទី៨ ខែកក្កដា បានលើកឡើងថា ការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់ស្តីពីការប្រកួតប្រជែងនេះ ពិតជានឹងចូលរួមអនុវត្តយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាលនីតិកាលទី៦ នៃរដ្ឋសភា ស្របតាមចំណុចទី៤ ស្តីពីការពង្រឹងសមត្ថភាពកម្ពុជា ដើម្បីបន្តសមាហរណកម្មខ្លួនចូលក្នុងសេដ្ឋកិច្ចតំបន់ និងពិភពលោក។
លោកបន្តថា៖ «ជាពិសេស នៅក្នុងកាលៈទេសៈវិបត្តិជំងឺឆ្លងកូវីដ១៩ ច្បាប់ទាំង ២ នេះនឹងជួយដល់យុទ្ធសាស្រ្តស្តារឡើងវិញនូវសេដ្ឋកិច្ចកម្ពុជា ដែលបានរងការញាំញីយ៉ាងធ្ងន់ធ្ងរពីជំងឺកូវីដ១៩ ព្រមទាំងជួយឱ្យមានភាពសាំនៃសង្គម-សេដ្ឋកិច្ចក្នុងប្រក្រតីភាពថ្មីនៃសង្គមកម្ពុជា តាមរយៈកំណើននៃការនាំចេញទៅទីផ្សារចិន និងលំហូរវិនិយោគចូលមកកម្ពុជា ដែលនឹងជួយបង្កើតការងារ និងចំណូលជូនប្រជាពលរដ្ឋយើង»។
លោកស្រី និន សាផុន ប្រធានគណៈកម្មការទី៩ នៃរដ្ឋសភា បានសម្តែងការគាំទ្រទាំងស្រុងចំពោះសេចក្តីព្រាងច្បាប់ទាំង ២ នេះ និងបានកោតសរសើរចំពោះក្រុមការងារចរចាដែលបានខិតខំប្រឹងប្រែងបញ្ចប់ការចរចាប្រកបដោយជោគជ័យ និងរំពឹងថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-ចិន និងច្បាប់ស្តីពីការប្រកួតប្រជែង នឹងអាចចូលជាធរមានបាននៅថ្ងៃទី០១ ខែមករា ឆ្នាំ២០២២ ខាងមុខ។
ក្រសួងពាណិជ្ជកម្មកម្ពុជា ធ្លាប់អះអាងថា ទំនិញកម្ពុជាជាង ៣០០ មុខអាចនាំទៅចិន ដោយមិនគិតពន្ធនៅពេលកិច្ចព្រមព្រៀងពាណិជ្ជកម្មនេះចូលជាធរមាន។ ក្នុងចំណោមមុខទំនិញជាង ៣០០ នេះ គឺផលិតផលកសិកម្ម ៩៥ ភាគរយត្រូវរួចពន្ធសម្រាប់ការនាំចេញ។
កម្ពុជា និងចិន គ្រោងជំរុញទំហំពាណិជ្ជកម្មទ្វេភាគីឱ្យបានដល់ ១០ ពាន់លានដុល្លារនៅឆ្នាំ ២០២៣ ខាងមុខនេះ។
ទិន្នន័យក្រសួងពាណិជ្ជកម្មកម្ពុជាបង្ហាញថា ពាណិជ្ជកម្មទ្វេភាគីកម្ពុជា-ចិន ឆ្នាំ ២០២០ មានតម្លៃសរុប ៨ ១១៨,០៧ លានដុល្លារ ធ្លាក់ចុះ ៥,២ ភាគរយធៀបឆ្នាំ ២០១៩។ ការនាំចេញទំនិញពីកម្ពុជាទៅចិនមានតម្លៃ ១ ០៨៦,២៦ លានដុល្លារ កើនឡើង ៨,១១ ភាគរយ និងការនាំចូលមានតម្លៃ ៧ ០៣១,៨១ លានដុល្លារធ្លាក់ចុះ ៦,៩៧ ភាគរយ៕
វីដេអូ៖