ភ្នំពេញៈ អង្គការសម្ព័ន្ធគណនេយ្យភាពសង្គមកម្ពុជា (ANSA) សង្ឃឹមថា ភាពជាដៃគូជាមួយគម្រោងសហគ្រិននារីសកម្ម WE Act អង្គការសង្គមស៊ីវិល វិស័យឯកជន និងរដ្ឋាភិបាល នឹងជួយលើកទឹកចិត្តសហគ្រិនស្រ្តីវ័យក្មេង និងយុវជន ឱ្យពួកគេទទួលបាននូវបរិយាកាសអាជីវកម្មកាន់តែប្រសើរ ពិសេសក្នុងអំឡុងពេលនៃការរីករាលដាលជំងឺកូវីដ១៩។
សេចក្តីប្រកាសព័ត៌មានរបស់ ANSA កាលពីថ្ងៃទី៩ ខែកក្កដា ឱ្យដឹងថា ក្នុងអំឡុងខែមីនា ឆ្នាំ ២០២១ ដល់ខែមីនា ឆ្នាំ ២០២២ អង្គការសម្ព័ន្ធគណនេយ្យភាពសង្គមកម្ពុជា ដែលផ្តល់មូលនិធិដោយទីភ្នាក់ងារជំនួយសហរដ្ឋអាមេរិក USAID តាមរយៈគម្រោងសហគ្រិននារីសកម្ម WE Act របស់អង្គការផេកកម្ពុជា បាននិងកំពុងអនុវត្តគម្រោង «សំឡេងសហគ្រិនស្រ្តីវ័យក្មេង និងយុវជន ដើម្បីបរិយាកាសអាជីវកម្មកាន់តែប្រសើរ»។
គម្រោងនេះ មានគោលបំណងសំខាន់ៗដូចជា ការបង្កើនសមត្ថភាពយុវជន និងសហគ្រិនស្រ្តីវ័យក្មេងឱ្យទទួលបាននូវព័ត៌មានចាំបាច់ក៏ដូចជាចំណេះដឹងទាក់ទងនឹងអភិបាលកិច្ច និងសហគ្រិនភាពប្រកបដោយបរិយាកាសការពន្លឿន និងភាពធន់ ព្រមទាំងភាពជាអ្នកដឹកនាំក្នុងនាមជាពលរដ្ឋដែលស៊ីសង្វាក់ទៅនឹងគោលនយោបាយរបស់រដ្ឋាភិបាល និងបទប្បញ្ញតិ្តស្តីពីការឆ្លើយតបជំងឺកូវីដ១៩, ការពង្រឹងយន្តការចូលរួមបែបស្ថាបនារបស់ប្រជាពលរដ្ឋប្រកបដោយប្រសិទ្ធភាព និងមានអត្ថន័យដើម្បីផ្តល់លទ្ធភាពឱ្យសហគ្រិនស្រ្តីវ័យក្មេង និងយុវជន បានរួមចំណែកស្វែងរកការគាំទ្រជុំវិញបញ្ហាចម្បងៗទាក់ទងទៅនឹងសហគ្រិនភាព ឬអភិបាលកិច្ចអាជីវកម្ម, និងការបង្កើតឱ្យមានយន្តការដោះស្រាយរួមទាំងផ្នែកអភិបាលកិច្ច និងការរួមចំណែកពីតួអង្គពាក់ព័ន្ធដែលមានឥទ្ធិពលទៅលើគោលនយោបាយ និងអាជីវកម្មដើម្បីគាំពារស្រ្តី និងយុវជនព្រមទាំងបង្កបរិយាកាសសម្រាប់ការអភិវឌ្ឍអាជីវកម្មនៅកម្ពុជា។
គម្រោង «សំឡេងសហគ្រិនស្រ្តីវ័យក្មេង និងយុវជន ដើម្បីបរិយាកាសអាជីវកម្មកាន់តែប្រសើរ» អនុវត្តក្នុងស្ថានភាពដ៏លំបាកដែលកម្ពុជា ជាពិសេស រាជធានីភ្នំពេញ ប្រឈមនឹងការរីករាលដាលនៃជំងឺកូវីដ១៩។ ការដាក់បញ្ចូលរវាងទិដ្ឋភាពអភិបាល ការអភិវឌ្ឍផ្នត់គំនិត ផែនការអាជីវកម្ម ការចែករំលែកបទពិសោធន៍ និងគំនិតច្នៃប្រឌិត ត្រូវបានក្លាយជាប្រធានបទដ៏សំខាន់ក្នុងការរៀនសូត្រសម្រាប់ក្រុមគោលដៅ ១១៥ នាក់នៅក្នុងរាជធានីភ្នំពេញ៕