ភ្នំពេញៈ គណៈរដ្ឋមន្ត្រីបានអនុម័តលើសេចក្តីព្រាងច្បាប់ស្តីពី «វិនិយោគនៃព្រះរាជាណាចក្រកម្ពុជា» ដើម្បីជំនួសច្បាប់ចាស់ដែលកំពុងអនុវត្តជិត ២ ទសវត្សរ៍កន្លងមកជាមួយនឹងសុទិដ្ឋិនិយមថា ច្បាប់ថ្មីនេះនឹងដើរតួនាទីសំខាន់ក្នុងការបង្កើននូវកាលានុវត្តភាពថ្មីៗដើម្បីស្រូបទាញវិនិយោគិនក្នុង និងក្រៅប្រទេសឱ្យមកបណ្តាក់ទុននៅកម្ពុជាកាន់តែច្រើន។
ការអនុម័តនេះបានធ្វើឡើងក្នុងកិច្ចប្រជុំពេញអង្គគណៈរដ្ឋមន្ត្រី តាមរយៈប្រព័ន្ធអនឡាញ (Zoom) កាលពីថ្ងៃសុក្រ ទី ៩ ខែកក្កដា ឆ្នាំ ២០២១ ដែលដឹកនាំដោយលោកនាយករដ្ឋមន្ត្រី ហ៊ុន សែន។
លោក ហ៊ុន សែន ថ្លែងថា៖ «សំណើច្បាប់នេះគឺជាមូលដ្ឋានគតិយុត្តសម្រាប់ទាក់ទាញ និងផ្តល់វិសាលភាពដល់វិនិយោគិនងាយស្រួលក្នុងកិច្ចវិនិយោគមកកាន់កម្ពុជា។ កម្ពុជាយល់ឃើញថា អ្នកវិនិយោគត្រូវការសន្តិភាព ស្ថិរភាព ដែលជាអាទិភាពនៃការសម្រេចចិត្តយកកម្ពុជាជាទិសដៅវិនិយោគ ទោះបីជាស្ថានភាពអន្តរជាតិប្រឈមក្នុងវិស័យនយោបាយ និងពាណិជ្ជកម្មយ៉ាងណាក៏ដោយ»។
យោងតាមសេចក្តីប្រកាសព័ត៌មានលទ្ធផលសម័យប្រជុំពេញអង្គគណៈរដ្ឋមន្ត្រី សេចក្តីព្រាងច្បាប់ស្តីពីវិនិយោគនៃព្រះរាជាណាចក្រកម្ពុជា ដែលបានតាក់តែងថ្មីនេះ គឺដើម្បីជំនួសច្បាប់ស្តីពីវិនិយោគនៃព្រះរាជាណាចក្រកម្ពុជា ដែលចូលជាធរមានតាំងពីឆ្នាំ ១៩៩៤ និងឆ្នាំ ២០០៣។
សេចក្តីព្រាងច្បាប់ស្តីពីវិនិយោគថ្មី ដែលមាន ១២ ជំពូក និង ៤២ មាត្រានេះធ្វើឡើងក្នុងគោលបំណងបង្កើនភាពទាក់ទាញ និងប្រសើរជាងមុននៃការវិនិយោគនៅកម្ពុជា ដោយឈរលើមូលដ្ឋានឯករាជ្យម្ចាស់ការ ស្ថានភាពជាក់ស្តែងរបស់វិនិយោគិន និងសេដ្ឋកិច្ចដែលនឹងបង្កើតក្របខ័ណ្ឌគតិយុត្តដែលមានភាពបើកចំហ មានតម្លាភាពអាចប៉ាន់ប្រមាណទុកជាមុនក៏ដូចជា ពង្រឹងភាពទាក់ទាញ និងសមត្ថភាពបំពេញបន្ថែម ជាពិសេសបានគិតគូរពីការផ្តល់ការលើកទឹកចិត្តដល់វិស័យអាទិភាពកម្រិតបច្ចេកវិទ្យា និងបច្ចេកទេស ការបង្កើតការងារ ការបណ្តុះបណ្តាលជំនាញការសិក្សាស្រាវជ្រាវការអភិវឌ្ឍ និងនវានុវត្តន៍ និងសហគ្រាសធុនតូច និងមធ្យម។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាឱ្យដឹងថា សេចក្តីព្រាងច្បាប់នេះរៀបចំឡើងក្នុងគោលបំណងបង្កើតនូវក្របខ័ណ្ឌគតិយុត្តដែលបើកចំហ មានតម្លាភាពអាចប៉ាន់ប្រមាណទុកជាមុន ប្រកបដោយភាពអំណោយផលល្អសម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគដោយបុគ្គលសញ្ជាតិខ្មែរ ឬបរទេស ប្រកបដោយគុណភាព ប្រសិទ្ធភាព និងប្រសិទ្ធផល សំដៅអភិវឌ្ឍសង្គម សេដ្ឋកិច្ចនៅកម្ពុជា។
លោកបន្ថែមថា ខ្លឹមសារៈសំខាន់ៗក្នុងសេចក្តីព្រាងច្បាប់នេះ មានដូចជា ការបង្កើតរបបលើកទឹកចិត្តវិនិយោគ ការធ្វើទំនើបកម្ម ការបង្កើនផលិតភាពនៃឧស្សាហកម្មក្នុងស្រុក ការពង្រឹងការតភ្ជាប់ទៅខ្សែចង្វាក់ផ្គត់ផ្គង់ក្នុងតំបន់ និងសកលលោក ការផ្ទេរបច្ចេកវិទ្យា ការបង្កើនភាពប្រកួតប្រជែង ការធ្វើពិពិធកម្មសេដ្ឋកិច្ច និងការផ្តល់ការការពារសិទ្ធិ និងផលប្រយោជន៍ស្របច្បាប់ដល់វិនិយោគិននៅកម្ពុជា។
ជាមួយគ្នានេះសេចក្តីព្រាងច្បាប់ក៏មានចែងអំពីការដោះស្រាយវិវាទពាក់ព័ន្ធនឹងគម្រោងវិនិយោគ ការធ្វើប្រតិភូកម្មទៅរដ្ឋបាលរាជធានី-ខេត្ត ការបំព្រួញពេលវេលាក្នុងការចេញវិញ្ញាបនបត្រចុះបញ្ជី ការកាត់បន្ថយបន្ទុកដល់វិនិយោគិនចំពោះកាតព្វកិច្ចនៃអនុលោមភាពច្បាប់ (ការចុះអធិការកិច្ចរបស់ក្រសួងស្ថាប័ន) ការបង្កើតរបបលើកទឹកចិត្តផ្នែកពន្ធ (ការលើកទឹកចិត្តមូលដ្ឋាន, ការលើកទឹកចិត្តបន្ថែម និងលើកទឹកចិត្តពិសេស)។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់ប្រាប់ភ្នំពេញ-ប៉ុស្តិ៍ថា វិស័យឯកជនរំពឹងថា ច្បាប់នេះនឹងឆាប់ចូលជាធរមាន ព្រោះច្បាប់នេះនឹងមានភាពបត់បែនស្របនឹងបរិបទថ្មីនៃការវិវឌ្ឍផ្នែកបច្ចេកវិទ្យា និងការធ្វើពាណិជ្ជកម្មជាអន្តរជាតិ។ ម្យ៉ាងទៀតវាក៏ត្រូវបានរៀបចំឡើងនៅក្នុងអំឡុងពេលដែលសេដ្ឋកិច្ចពិភពលោកកំពុងស្ថិតក្នុងភាពមិនច្បាស់លាស់ដែលបណ្តាលមកពីវិបត្តិកូវីដ ១៩។
យោងតាមលោក លឹម ហេង កន្លងមកវិស័យឯកជនក៏ធ្លាប់បានផ្តល់ធាតុចូលក្នុងសេចក្តីព្រាងច្បាប់នេះដែរ។
ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងចំនួន ៧០ ក្រោមទុនវិនិយោគសរុប ២ ៤២៨ លានដុល្លារក្នុងឆមាសទី ១ ឆ្នាំ ២០២១។ នេះបើយោងតាមការគណនាដោយកាសែតភ្នំពេញប៉ុស្តិ៍ចំពោះតែគម្រោងត្រូវបាន CDC បង្ហោះលើទំព័រហ្វេសប៊ុកផ្លូវការចាប់ពីខែមករាដល់ដំណាច់ខែមិថុនា ឆ្នាំនេះ។
ក្នុងចំណោមនេះ CDC បានអនុម័តគម្រោងវិនិយោគវិស័យវាយនភណ្ឌកាត់ដេរសម្លៀកបំពាក់ ស្បែកជើង និងផលិតផលធ្វើដំណើរចំនួន ២៩ ជាមួយនឹងទុនវិនិយោគសរុប ១៩៤,៧១ លានដុល្លារ។
កាលពីឆ្នាំ ២០១៩ ការអនុម័តការវិនិយោគបានកត់ត្រាចំនួន ៩,៤០ ពាន់លានដុល្លារ ក្នុងនោះប្រទេសចិន វិនិយោគ ២,៧៥ ពាន់លានដុល្លារ បន្ទាប់មកទីក្រុងហុងកុង ៩១២,៥៥ លានដុល្លារ និងជប៉ុន ២៩៨,៨៤ លានដុល្លារ។ នេះបើតាម CDC៕ LA