.jpg)
លោក អ៊ុក សោភ័ណ ឯកអគ្គរាជទូតកម្ពុជាប្រចាំនៅប្រទេសថៃ និងលោក Nikolaos Kaimenakis ឯកអគ្គរដ្ឋទូតវិសាមញ្ញ និងពេញសមត្ថភាពក្រិកប្រចាំព្រះរាជាណាចក្រកម្ពុជា ក្នុងពិធីចុះហត្ថលេខាលើអនុស្សរណៈយោគយល់គ្នានៅទីក្រុងបាងកក កាលពីថ្ងៃទី ៨ ខែកក្កដា។ រូបថត ស្ថានទូតកម្ពុជាប្រចាំប្រទេសថៃ
ភ្នំពេញៈ កម្ពុជា និងសាធារណរដ្ឋហេឡិននិក (ក្រិក) បានចុះអនុស្សរណៈយោគយល់គ្នា (MoU) ដើម្បីបង្កើតកិច្ចពិគ្រោះយោបល់ទ្វេភាគីសំដៅបង្កើតក្របខ័ណ្ឌនៃការពិភាក្សាលើបញ្ហាអាទិភាពរួមមាន នយោបាយ ការទូត សេដ្ឋកិច្ច ពាណិជ្ជកម្ម វិនិយោគ និងសង្គមវប្បធម៌។
លោក អ៊ុក សោភ័ណ ឯកអគ្គរាជទូតកម្ពុជាប្រចាំនៅប្រទេសថៃ និងលោក Nikolaos Kaimenakis ឯកអគ្គរដ្ឋទូតវិសាមញ្ញ និងពេញសមត្ថភាពក្រិកប្រចាំព្រះរាជាណាចក្រកម្ពុជាបានចុះហត្ថលេខាលើអនុស្សរណៈយោគយល់គ្នាកាលពីថ្ងៃទី ៨ ខែកក្កដា ឆ្នាំនេះនៅទីក្រុងបាងកក ប្រទេសថៃ។
ក្នុងឱកាសនោះ លោក អ៊ុក សោភ័ណ បានលើកឡើងពីទំនាក់ទំនងល្អរវាងកម្ពុជា និងក្រិកដោយបានបង្ហាញជំនឿចិត្តថា MoU នេះនឹងផ្ដល់ឱកាសដល់ប្រទេសទាំង ២ ក្នុងការបន្តពង្រឹង និងពង្រីកទំនាក់ទំនងមិត្តភាព។
លោកថ្លែងថា៖ «អនុស្សរណៈនេះក៏នឹងពង្រឹងកិច្ចសហប្រតិបត្តិការកាន់តែស៊ីជម្រៅថែមទៀតលើវិស័យអាទិភាពសំខាន់ៗនាពេលអនាគត»។
លោក Nikolaos Kaimerakis ឱ្យដឹងថា ប្រទេសក្រិក និងកម្ពុជាបានបង្កើតទំនាក់ទំនងជាមួយគ្នាជាយូរមកហើយ គ្រាន់តែប្រទេសទាំង ២ មិនបានទាញយកប្រយោជន៍ណាមួយពីទំនាក់ទំនងនេះ។
លោកនិយាយថា៖ «ពិធីចុះហត្ថលេខានៅថ្ងៃនេះ គឺជាការចាប់ផ្តើមក្នុងការឈានទៅរកការអង្គុយជុំគ្នាដើម្បីជជែកពីវិស័យសក្តានុពលនានាដែលប្រទេសទាំង ២ ត្រូវសហការគ្នា និងពិនិត្យមើលបញ្ហាប្រឈមទាំងឡាយដែលប្រទេសទាំង ២ អាចដោះស្រាយជាមួយគ្នា។ យើងចង់ឃើញប្រទេសទាំង ២ អាចរៀបចំកិច្ចប្រជុំពិគ្រោះយោបល់ក្នុងពេលឆាប់ៗខាងមុខ»។
ក្រិក គឺជាប្រទេសស្ថិតនៅអឺរ៉ុបភាគអាគ្នេយ៍ចុងភាគខាងត្បូងនៃឧបទ្វីបបាល់កង់ ត្រង់ចំណុចប្រសព្វនៃសមុទ្រ ៣ គឺ សមុទ្រ Aegean, lonian និង Cretan ដែលជាភូមិសាស្ត្រមួយប្រកបដោយសក្តានុពល ព្រោះជាច្រកឆ្លងកាត់រវាងទ្វីបអឺរ៉ុប អាស៊ី និងអាហ្វ្រិក។ ក្រិកក៏ជាសមាជិកមួយនៃសហភាពអឺរ៉ុបផងដែរ។
កម្ពុជា និងប្រទេសក្រិកបានបង្កើតទំនាក់ទំនងការទូតកាលពីថ្ងៃទី ៨ ខែ មេសា ឆ្នាំ ១៩៩៦៕ LA
