ភ្នំពេញៈ អគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុ បានសម្រេចលើកលែងការបង់កម្រៃអាជ្ញាប័ណ្ណជើងសាគយឆ្នាំ ២០២១ និងឆ្នាំ ២០២២ ដល់វិស័យដឹកជញ្ជូន និងភ័ស្តុភារកម្មកម្ពុជា ដែលកំពុងតែរងផលប៉ះពាល់ដោយសារវិបត្តិកូវីដ ១៩។
សេចក្តីសម្រេចនេះធ្វើឡើងដោយយោងតាមសេចក្តីណែនាំរបស់រាជរដ្ឋាភិបាលកម្ពុជាអំពីវិធានការបន្ថែម ដើម្បីបន្តគ្រប់គ្រងផលប៉ះពាល់ទៅលើវិស័យសំខាន់ៗនៃសេដ្ឋកិច្ចក្នុងបរិការណ៍នៃវិបត្តិ និងការស្តារ និងការជំរុញកំណើនសេដ្ឋកិច្ចកម្ពុជានៅក្នុងអំឡុង និងក្រោយវិបត្តិជំងឺកូវីដ ១៩ ជុំទី៩។
លិខិតចុះហត្ថលេខាដោយលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាកាលពីថ្ងៃទី ៩ ខែកក្កដា បង្ហាញថាស្ថិតក្នុងស្ថានភាពជំងឺកូវីដ ១៩ នៅតែបន្តវិវឌ្ឍខ្លួនគួរឱ្យបារម្ភ និងដើម្បីបន្តជួយវិស័យដឹកជញ្ជូន និងភ័ស្តុភារកម្ម រដ្ឋាភិបាលកម្ពុជាបានសម្រេចលើកលែងការបង់កម្រៃអាជ្ញាប័ណ្ណជើងសាគយឆ្នាំ ២០២១ និងឆ្នាំ ២០២២។
លិខិតបញ្ជាក់ថា៖ «ចំពោះជើងសាគយដែលបានបង់កម្រៃអាជ្ញាប័ណ្ណជើងសាគយឆ្នាំ ២០២១ រួចហើយ ពុំតម្រូវឱ្យបង់កម្រៃអាជ្ញាប័ណ្ណជើងសាគយឆ្នាំ ២០២៣ ទៀតទេ»។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) បានស្វាគមន៍ និងគាំទ្រចំពោះសេចក្តីសម្រេចនេះដោយជឿថា នឹងជួយសម្រាលបន្ទុកបានមួយផ្នែកដល់អ្នកក្នុងវិស័យដឹកជញ្ជូន និងភ័ស្តុភារកម្ម។
លោក ចន្ធី បានប្រាប់ ភ្នំពេញ ប៉ុស្តិ៍ថា បច្ចុប្បន្នការបន្តរីករាលដាលជំងឺកូវីដ ១៩ បានធ្វើឱ្យអាជីវកម្មក្នុងវិស័យដឹកជញ្ជូន និងភ័ស្តុភារកម្មធ្លាក់ចុះយ៉ាងខ្លាំងដែលក្នុងចំណោមសមាជិកសមាគមចំនួន ១២០ ក្រុមហ៊ុន គឺមានប្រហែល ១០ ភាគរយប៉ុណ្ណោះ ដែលទទួលបានចំណូលខ្លះមកផ្គត់ផ្គង់ឱ្យដំណើរប្រតិបត្តិការអាជីវកម្ម។
ដោយឡែក ៦០ ភាគរយដែលកំពុងរងផលប៉ះពាល់ពីវិបត្តិនេះ គឺពុំមានប្រាក់ចំណេញទេ ពោលគឺពួកគេគ្រាន់តែអាចនៅរក្សានិរន្តរភាពអាជីវកម្មតែប៉ុណ្ណោះ ចំណែក ៣០ ភាគរយទៀតកំពុងប្រឈមនឹងបញ្ហាហិរញ្ញវត្ថុធ្ងន់ធ្ងរដែលអាចត្រូវផ្អាកបណ្តោះអាសន្ន បើការរីករាលដាលកូវីដ ១៩ បន្តពន្យារពេលយូរទៀត។
លោកបន្ថែមថា៖ «ការលើកលែងកម្រៃអាជ្ញាប័ណ្ណជើងសាគយនេះ គឺជាការត្រិះរិះដ៏ត្រឹមត្រូវរបស់ក្រសួងសេដ្ឋកិច្ច ក៏ដូចជាអគ្គនាយកដ្ឋានគយ និងរដ្ឋាករកម្ពុជា។ ក្នុងនាមសមាគមខ្ញុំសូមថ្លែងអំណរគុណរដ្ឋាភិបាលដែលតែងតែគិតគូរដល់អ្នកក្នុងវិស័យដឹកជញ្ជូន និងភ័ស្តុភារកម្មក្នុងស្ថានភាពដ៏លំបាកនេះ»។
បើតាមលោក ចន្ធី គិតមកដល់ពេលនេះ ក្រសួងពាណិជ្ជកម្មបានចុះបញ្ជីអាជ្ញាប័ណ្ណជើងសាគយបានចំនួនប្រមាណ ៥០០ អាជ្ញាប័ណ្ណ។
លោក គុណ ញឹម អគ្គនាយកគយ និងរដ្ឋាករកម្ពុជាបានថ្លែងក្នុងកិច្ចប្រជុំបូកសរុបការងារត្រីមាសទី១ ឆ្នាំ ២០២១ កាលពីខែមេសាថា ផែនការសកម្មភាពប្រចាំឆ្នាំ ២០២១ របស់អគ្គនាយកដ្ឋានគយ និងរដ្ឋាករគឺនឹងបន្តអនុវត្តនូវគោលនយោបាយ និងវិធានការនានារបស់រាជរដ្ឋាភិបាលក្នុងការទ្រទ្រង់ និងស្ដារសេដ្ឋកិច្ចដែលរងផលប៉ះពាល់ ដោយសារជំងឺកូវីដ ១៩ និងការបង្ការ និងបង្ក្រាបអំពើរត់គេចពន្ធ និងពង្រឹងអនុលោមភាព។
លោកបន្តថា៖ «អគ្គនាយកដ្ឋានគយ និងរដ្ឋាករក៏នឹងបន្តលើកកម្ពស់កិច្ចសម្រួលពាណិជ្ជកម្ម និងកែលម្អបរិយាកាសវិនិយោគតាមរយៈការធ្វើសាមញ្ញកម្មនីតិវិធីគយ និងប្រើប្រាស់បច្ចេកវិទ្យាព័ត៌មានក្នុងការងារគយ និងការចូលរួមសកម្មភាពសង្គមនានា»។
ការប្រមូលចំណូលរបស់អគ្គនាយកដ្ឋានគយ និងរដ្ឋាករក្នុងត្រីមាសទី១ ឆ្នាំ ២០២១ សម្រេចបាន ៦១៤,៨ លានដុល្លារធ្លាក់ចុះ ១៥,២ ភាគរយបើធៀបទៅរយៈពេលដូចគ្នាឆ្នាំ ២០២០។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
លទ្ធផលការប្រមូលចំណូលក្នុងត្រីមាសទី១ នេះ គឺសម្រេចបាន ២៦ ភាគរយ នៃផែនការឆ្នាំដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១៕ LA