.jpg)
តំបន់សេដ្ឋកិច្ចពិសេសក្រុងព្រះសីហនុ។ រូបថត សហការី
ព្រះសីហនុៈ ទោះបីស្ថានភាពនៃការឆ្លងរាលដាលជំងឺកូវីដ ១៩ នៅកម្ពុជាមិនទាន់មានភាពធូរស្រាលចាប់តាំងពីព្រឹត្តិការណ៍សហគមន៍ ២០ កុម្ភៈរហូតមកដល់ពេលនេះ ក៏បរិមាណនៃការនាំចូល និងនាំចេញទំនិញរបស់តំបន់សេដ្ឋកិច្ចពិសេសក្រុងព្រះសីហនុ SSEZ (Industril Park of SihanoukVille Special Economic Zone) ក្នុងឆមាសទី ១ ឆ្នាំ ២០២១ នៅរក្សាបានកំណើនជិត ៥០ ភាគរយបើធៀបនឹងរយៈពេលដូចគ្នាឆ្នាំមុន។
ទិន្នន័យនៅលើបណ្តាញសង្គមផ្លូវការរបស់ SSEZ ឱ្យដឹងថា គិតចាប់ពីខែមករា ដល់ខែមិថុនា ឆ្នាំ ២០២១ សហគ្រាសក្នុងតំបន់សេដ្ឋកិច្ចពិសេសក្រុងព្រះសីហនុ ទទួលបានបរិមាណនាំចូល និងនាំចេញសរុប ៩៩៤ លានដុល្លារ កើនឡើង ៤៩,៩២ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ៦៦៣ លានដុល្លារ។
ប្រធានក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុ លោក Chen Jiangang កាលពីពេលកន្លងមកបាននិយាយថា ស្ថិរភាពនយោបាយ និងកំណើនសេដ្ឋកិច្ចបានធ្វើឱ្យ SSEZ ទទួលបានកំណើនការចូលវិនិយោគជាបន្តបន្ទាប់។ ជាមួយគ្នានេះ SSEZ កំពុងខិតខំទាក់ទាញវិនិយោគពីក្រៅប្រទេសឱ្យបានកាន់តែច្រើនទៀតចូលទៅបណ្តាក់ទុននៅទីនោះ។
លោកប្រាប់ទៀតថា ជាមួយនឹងភាពវិជ្ជមានជាបន្តបន្ទាប់នេះ SSEZ ក៏មានគម្រោងក្នុងការចុះបញ្ជីនៅក្នុងផ្សារមូលបត្រកម្ពុជាផងដែរ។
លោកអះអាងថា៖ «ក្រុមហ៊ុនតំបន់សេដ្ឋកិច្ចពិសេសក្រុងព្រះសីហនុកំពុងរៀបចំឯកសារចុះបញ្ជីផ្សារភាគហ៊ុនកម្ពុជាក្នុងបំណងបង្កើនភាពទាក់ទាញការវិនិយោគបន្ថែម ជាពិសេសពីតំបន់អឺរ៉ុប និងអាមេរិក»។
គិតត្រឹមខែវិច្ឆិកា ឆ្នាំ ២០២០ តំបន់សេដ្ឋកិច្ចពិសេសក្រុងព្រះសីហនុមានក្រុមហ៊ុនវិនិយោគសរុប ១៦៥ ដោយបង្កើតការងារបាន ៣០ ០០០ កន្លែង។ នេះបើតាមលោក Chen។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ ភ្នំពេញ ប៉ុស្តិ៍ នាថ្ងៃទី ១២ ខែកក្កដាថា ទោះបីស្ថានភាពកម្ពុជាក៏ដូចជាពិភពលោកកំពុងជួបប្រទះនូវវិបត្តិជំងឺកូវីដ ១៩ ក៏ការនាំចេញរបស់កម្ពុជាក្នុងឆមាសទី ១ ឆ្នាំ ២០២១ មិនបានថមថយនោះទេ ពិសេសផលិតផលកសិកម្ម គ្រឿងបង្គុំអេឡិចត្រូនិក និងកង់ជាដើម។
ជាមួយគ្នានេះកម្ពុជាក៏បាននិងកំពុងធ្វើពិពិធកម្មទំនិញនាំចេញរបស់ខ្លួនឱ្យកាន់តែមានភាពសម្បូរបែបទៅទីផ្សារអន្តរជាតិ។ លោកបន្ថែមទៀតថា ការសម្រេចបាននូវកិច្ចព្រមព្រៀងពាណិជ្ជកម្មសេរីជាមួយនឹងប្រទេសចិន ក៏ជាចំណែកដែលនឹងជួយលើកកម្ពស់សមត្ថភាពនាំចេញរបស់កម្ពុជា។
លោកថ្លែងថា៖ «នេះជាវឌ្ឍនភាពមួយដែលបង្ហាញពីភាពរឹងមាំរបស់កម្ពុជា ដោយមិនតែសម្រាប់តំបន់សេដ្ឋកិច្ចពិសេសនោះទេ»។
លោកបន្ថែមទៀតថា នៅពេលមានកំណើននៃការនាំចេញ ការនាំចូលផលិតផលវត្ថុធាតុដើមសម្រាប់កែច្នៃក៏នឹងកើនឡើងព្រមគ្នា។
បន្ថែមពីលើនេះ លោកអះអាងថា ការអនុម័តលើច្បាប់វិនិយោគកម្ពុជារបស់គណៈរដ្ឋមន្ត្រីកាលពីសប្តាហ៍មុនក៏នឹងក្លាយជាកម្លាំងចលករថ្មីមួយទៀត ដែលនឹងធ្វើឱ្យចំនួនការចូលមកបណ្តាក់ទុននៅកម្ពុជាមានចំនួនច្រើននៅពេលខាងមុខ។
ទិន្នន័យក្រសួងសេដ្ឋកិច្ច និងហិរញ្ញវត្ថុបង្ហាញថា ក្នុងរយៈពេល ៥ ខែដំបូងឆ្នាំ ២០២១ កម្ពុជាបាននាំចេញទំនិញ (ដកមាសចេញ) ក្នុងតម្លៃ ៥ ៩៥០ លានដុល្លារ(ស្មើ ២០,៧ ភាគរយនៃ ផសស) កើន ១៤,១ ភាគរយធៀបនឹងរយៈពេលដូចគ្នាឆ្នាំមុន ដែលរួមចំណែកភាគច្រើនដោយកំណើននៃការនាំចេញកង់ និងទំនិញផ្សេងទៀត ក្រៅពីផលិតផលវាយនភណ្ឌ។
រីឯការនាំចូលទំនិញ (ដកមាសចេញ) មានតម្លៃ ៨ ៦៦៤ លានដុល្លារ (ស្មើ ៣០,២ ភាគរយនៃផសស) កើនឡើង ១៧ ភាគរយ ដោយសារកំណើននៃការនាំចូលក្រណាត់ គ្រឿងសំណង់ ប្រេងឥន្ធនៈ និងទំនិញផ្សេងៗ៕ LA
