The Phnom Penh Post Search

Search form




Logo of Phnom Penh Post newspaper Phnom Penh Post - PAC ប្តេជ្ញា​ធ្វើជា​ដៃគូ BFC ដើម្បី​កែលម្អ​លក្ខខណ្ឌ​ការងារ




PAC ប្តេជ្ញា​ធ្វើជា​ដៃគូ BFC ដើម្បី​កែលម្អ​លក្ខខណ្ឌ​ការងារ

Content image - Phnom Penh Post
ក្រុម​កម្មការិនី​កំពុង​ដេរ​សម្លៀកបំពាក់​ក្នុង​រោងចក្រ​មួយ​នៅ​ភ្នំពេញ​។ ភ្នំពេញ​ប៉ុស្តិ៍

PAC ប្តេជ្ញា​ធ្វើជា​ដៃគូ BFC ដើម្បី​កែលម្អ​លក្ខខណ្ឌ​ការងារ

ភ្នំពេញៈ គណៈកម្មាធិការ​ប្រឹក្សា​គម្រោង​ (PAC) នៃ​កម្មវិធី​រោងចក្រ​កាន់តែ​ប្រសើរ​ (BFC) ​នៅ​កម្ពុជា​បាន​ប្ដេជ្ញា​ថា​នឹង​រួមចំណែក​ក្នុង​ការធានា​សិទ្ធិ​ការងារ លក្ខខណ្ឌ​ការងារ និង​បង្កើន​សមត្ថភាព និង​ផលិតភាព​នៅក្នុង​វិស័យ​កាត់ដេរ​នៅ​កម្ពុជា​។ នេះ​បើ​យោងតាម​សេចក្ដី​ថ្លែងការណ៍​។

PAC គឺជា​តំណាង​មកពី​រដ្ឋាភិបាល​កម្ពុជា​ដែលមាន​ក្រសួង​ការងារ និង​បណ្ដុះបណ្ដាល​វិជ្ជាជីវៈ និង​ក្រសួង​ពាណិជ្ជកម្ម ព្រមទាំង​និយោជក​ពី​សមាគម​រោងចក្រ​កាត់ដេរ​កម្ពុជា​ (GMAC) និង​តំណាង​កម្មករ​មកពី​សម្ព័ន្ធ និង​សហព័ន្ធ​ផ្សេងៗ​គ្នា​ជាច្រើន​ទៀត​។

សេចក្ដី​ថ្លែងការណ៍ PAC បានចេញ​ផ្សាយ​កាលពី​ថ្ងៃទី​ ៧ ខែ​កក្កដា បានឱ្យដឹងថា PAC បន្ត​ធ្វើជា​ដៃគូ​ក្នុង​ការកែលម្អ​លក្ខខណ្ឌ​ការងារ​នៅក្នុង​វិស័យនេះ និង​ប្ដេជ្ញា​រួមចំណែក​ក្នុង​ការធានា​សិទ្ធិ​ការងារ លក្ខខណ្ឌ​ការងារ បង្កើន​សមត្ថភាព​ប្រកួតប្រជែង និង​ផលិតភាព​នៅក្នុង​វិស័យ​កាត់ដេរ ស្បែកជើង ទំនិញ​ធ្វើដំណើរ និង​ឧស្សាហកម្ម​កាបូប​របស់​កម្ពុជា​។

PAC ក៏បាន​ប្ដេជ្ញា​នឹង​ផ្ដោត​ការយកចិត្ត​ទុកដាក់​លើ​ការអភិវឌ្ឍ​សមត្ថភាព​រោងចក្រ​បន្ថែម​សម្រាប់​អនុលោមភាព​ប្រកប​ដោយ​ចីរភាព​ ដើម្បី​រក្សា​ផលិតភាព ការងារ​សមរម្យ និង​មាន​និរន្តរភាព​សម្រាប់​កម្លាំង​ពលកម្ម​នៅ​កម្ពុជា​។

សេចក្ដី​ថ្លែងការណ៍​បន្ត​ថា​៖ «​យើង​ជា​សមាជិក PAC នៃ​កម្មវិធី​រោងចក្រ​កាន់តែ​ប្រសើរ សូម​ទទួលស្គាល់​កិច្ចខិតខំ​ប្រឹងប្រែង​រួម និង​សមិទ្ធផល​ដែល​បាន​ធ្វើឡើង​រួមគ្នា​ជាមួយ BFC ក្នុង​អំឡុងពេល​រីករាលដាល​ជំងឺ​កូវីដ-១៩ ដើម្បី​គាំទ្រ​វិស័យ​កាត់ដេរ​នៅក្នុង​អំឡុងពេល​ដ៏ពិបាក​នេះ ហើយ​យើង​រក្សា​ការប្ដេជ្ញាចិត្តថា នឹង​គាំទ្រ​កម្មវិធី​រោងចក្រ​កាន់តែ​ប្រសើរ​នេះ​»​។

វិធីសាស្ដ្រ​របស់​កម្មវិធី​នេះ​រួមមាន​ចាប់ពី​ការបង្កើត​ឱ្យ​មាន​ការសន្ទនា​សង្គម​តាមរយៈ​គណៈកម្មាធិការ​ថ្នាក់​គ្រប់គ្រង​កម្មករ ទៅដល់​ការផ្ដល់សេវា​ប្រឹក្សា​តាម​តម្រូវការ​រោងចក្រ ដើម្បី​ជួយ​ពួកគេ​ដោះស្រាយ​បញ្ហា​ប្រឈម​ច្បាប់​ការងារ​ផ្ទាល់​របស់​ពួកគេ ឬ​ប្រើប្រាស់​របាយការណ៍​សាធារណៈ​ ដើម្បី​ជំរុញ​ការកែលម្អ​លក្ខខណ្ឌ​ការងារ​នៅ​រោងចក្រ និង​បរិយាកាស​កន្លែង​ធ្វើការងារ​នៅក្នុង​ឧស្សាហកម្ម​។

PAC ថែមទាំង​បាន​ប្ដេជ្ញាចិត្ត​ចំពោះ​វិធានការ​បង្ការ​ជំងឺ​កូវីដ​ ១៩ នៅក្នុង​វិស័យ​កាត់ដេរ និង​ដើម្បី​ធ្វើ​ការងារ​រួមគ្នា​លើ​ការស្ទុះ​ងើបឡើង​វិញ និង​ដើម្បី​ដោះស្រាយ​ផលវិបាក​ ដោយសារ​ការរីករាលដាល​ជំងឺ​កូវីដ​ ១៩​។ សម្រាប់​ការងារ​នេះ PAC ក៏​ប្ដេជ្ញាចិត្ត​ក្នុង​ការគាំទ្រ​បរិយាកាស​ដែល​តំណាង​ថៅកែ និង​កម្មករ អាច​ដោះស្រាយ​បញ្ហា​តាមរយៈ​ការសន្ទនា​សង្គម​ប្រកប​ដោយ​ប្រសិទ្ធភាព និង​ភាពចាស់ទុំ​។

ការរីករាលដាល​ជំងឺ​កូវីដ​ ១៩ កំពុង​ធ្វើឱ្យមាន​បញ្ហា​ប្រឈម​ចំពោះ​ឧស្សាហកម្ម​ទូទៅ​ពិភពលោក និង​នៅ​កម្ពុជា​ផង​ដែរ​។ ដើម្បី​ស្ទុះ​ងើបឡើង​វិញ​ពី​ការរីករាលដាល​ជំងឺ​នេះ PAC នឹង​បន្ត​ចូលរួម​ជាមួយ​ភាគី​ពាក់ព័ន្ធ​នៅក្នុង​ឧស្សាហកម្ម រួមមាន រោងចក្រ​ផលិត និង​អ្នកទិញ ដើម្បី​ធ្វើ​ការងារ​សម្រាប់​ឧស្សាហកម្ម​នេះ ដែលមាន​វប្បធម៌​ប្រតិបត្តិការ​ដ៏ល្អ និង​ការអនុលោមភាព​ប្រកបដោយ​ចីរភាព​ត្រូវ​មាន​នៅក្នុង​វិស័យនេះ​។

សេចក្ដី​ថ្លែងការណ៍​បាន​បញ្ជាក់ថា​៖ «​ទាក់ទង​នឹង​បញ្ហា​នេះ​យើង​អំពាវនាវ​ឱ្យមាន​សកម្មភាព​រួម​ពី​ដៃគូ​ឧស្សាហកម្ម​ទាំងអស់​នៅ​កម្ពុជា និង​អន្តរជាតិ​ដើម្បី​គាំទ្រ​វិស័យ​កាត់ដេរ​កម្ពុជា ទ្រទ្រង់​ឧស្សាហកម្ម និង​ជីវិត​របស់​កម្មករ​ក្នុងអំឡុងពេល​ការរីករាលដាល​ជំងឺ​កូវីដ-១៩ ទូទាំង​ពិភពលោក​»​។

លោក ខេន លូ អគ្គលេខាធិការ GMAC ប្រាប់​ភ្នំពេញ​ប៉ុស្ដិ៍​កាលពី​ខែកុម្ភៈ អំពី​ផែនការ​របស់​រដ្ឋាភិបាល​ក្នុង​ការពង្រីក​ការគ្របដណ្ដប់​របស់​គម្រោង BFC ដើម្បី​ដាក់បញ្ចូល​រោងចក្រ​ទំនិញ​ធ្វើដំណើរ និង​រោងចក្រ​កាបូប​។

លោក​ថ្លែងថា​៖ «​នេះ​ជា​ការចង្អុលបង្ហាញ​យ៉ាង​ច្បាស់លាស់​នៃ​ការប្ដេជ្ញាចិត្ត​របស់​រដ្ឋាភិបាល​នៅក្នុង​ការធានា​ឱ្យ​ប្រាកដថា ក្រុមហ៊ុននាំចេញ​ក្នុង​វិស័យ​ ២ ​នេះ ប្រកាន់ខ្ជាប់​អនុលោមភាព​ខ្ពស់​នៃ​ច្បាប់​ការងារ​ក្នុងប្រទេស និង​ស្ដង់ដា​ការងារ​អន្តរជាតិ​»​។
លោក​លើកឡើង​ថា​៖ «GMAC គឺជា​ហត្ថលេខី​នៃ​អនុស្សរណៈ​នៃ​ការយោគយល់​គ្នា​ជាមួយ BFC ក៏ដូចជា​ក្រសួង​ការងារ និង​ក្រសួង​ពាណិជ្ជកម្ម​។ យើង​គាំទ្រ​ដល់​គំនិត​ផ្តួចផ្ដើម​នេះ​»​។

យោងតាម ILO គម្រោង BFC ជាប់​ពាក់ព័ន្ធ​កម្មករ និង​រដ្ឋាភិបាល​ក្នុង​ការកែលម្អ​លក្ខខណ្ឌ​ការងារ និង​ពង្រឹងសមត្ថភាព​ប្រកួតប្រជែង​របស់​ឧស្សាហកម្ម​កាត់ដេរ​។ បច្ចុប្បន្ន​មាន​រោងចក្រ​ចំនួន​ ៥៥៧ មាន​កម្មករ​ចំនួន ៦១៤ ២៤២ ​នាក់ និង​យីហោ និង​ក្រុមហ៊ុន​លក់រាយ​ចំនួន​ ៥៩ បានដាក់​បញ្ចូល​ក្នុង​គម្រោង​នេះ​៕ LA

អត្ថបទគួរចាប់អារម្មណ៍