.jpg)
តម្លៃគ្រាប់ស្វាយចន្ទីប្រហាក់ប្រហែលឆ្នាំមុន ប៉ុន្តែទិន្នផលអាចធ្លាក់ចុះបន្តិចបន្តួច។ ហុង មិនា
ភ្នំពេញៈ តម្លៃគ្រាប់ស្វាយចន្ទីក្នុងឆមាសទី១ ឆ្នាំ ២០២១ នេះមានភាពប្រហាក់ប្រហែលឆ្នាំមុន ខណៈទិន្នផលប្រមូលបានអាចធ្លាក់ចុះបន្តិចបន្តួច។
លោក ខាន់ កុសល ម្ចាស់សិប្បកម្មកែច្នៃគ្រាប់ស្វាយចន្ទីខេត្តព្រះវិហារបានប្រាប់ ភ្នំពេញ ប៉ុស្តិ៍ នាថ្ងៃទី ១៣ ខែកក្កដា ថា តំបន់លោករស់នៅ គ្រាប់ស្វាយចន្ទីមានតម្លៃមធ្យមពី ១ ៦០០-១ ៧០០ ដុល្លារ ក្នុង ១ តោន គឺប្រហាក់ប្រហែលនឹងឆ្នាំមុន។ ចំណែកទិន្នផលកសិករប្រមូលបាន គឺទាបជាមុនដែលអាចមកពីកត្តាអាកាសធាតុ និងបច្ចេកទេសដាំដុះនៅមានកម្រិត។
លោកនិយាយថា៖ «តម្លៃឆ្នាំនេះមិនកើនឡើងទេ ចំណែកទិន្នផលអាចធ្លាក់ចុះខ្លះ ដោយមិនមែនតែនៅតំបន់ដែលខ្ញុំប្រមូលទិញនោះទេ»។
លោកបន្ថែមថា ជាមួយគ្នាការបញ្ជាទិញគ្រាប់ស្វាយចន្ទីពីសិប្បកម្មលោកគឺប្រហាក់ប្រហែលឆ្នាំមុនដដែល។
ប្រធានការិយាល័យអភិវឌ្ឍន៍ពាណិជ្ជកម្មនៃមន្ទីរពាណិជ្ជកម្មខេត្តព្រះវិហារ លោក ក្រូច បញ្ញាវន្ត បាននិយាយថា តម្លៃគ្រាប់ស្វាយចន្ទីនៅក្នុងខេត្តព្រះវិហារឆ្នាំនេះធ្លាក់ចុះខ្លះបើធៀបនឹងឆ្នាំមុន ដោយមានតម្លៃចន្លោះពី ៣ ៥០០-៥ ២០០ រៀល ក្នុង ១ គីឡូក្រាម ខណៈកាលពីឆ្នាំមុនពេលឡើងខ្ពស់មានរហូតដល់ជិត ៧ ០០០ រៀល។
បើតាមលោក បញ្ញាវន្ត៖ «ការធ្លាក់ចុះនេះអាចបណ្តាលមកពីការរីករាលដាលជំងឺកូវីដ ១៩ ដែលធ្វើឱ្យការបញ្ជាទិញទាំងសម្រាប់ការកែច្នៃក្នុងស្រុក និងនាំចេញ ធ្លាក់ចុះព្រមគ្នា»។
យោងតាមលោក បញ្ញាវន្ត ការប្រមូលផលស្វាយចន្ទី គឺចាប់ពីខែមករា ដល់ខែឧសភា ដោយជាមធ្យមក្នុងខេត្តព្រះវិហារ ផ្តល់ទិន្នផល ២,២ តោន ក្នុង ១ ហិកតា។ រដូវប្រមូលផលឆ្នាំនេះខេត្តព្រះវិហារប្រមូលផលគ្រាប់ស្វាយចន្ទីបានប្រមាណ ៤៥ ០០០ តោន។
លោកអះអាងថា៖ «ស្វាយចន្ទី គឺជាផលិតផលដែលមានសក្តានុពលខ្ពស់សម្រាប់កែច្នៃ និងនាំចេញទៅកាន់ទីផ្សារក្រៅប្រទេស ហេតុនេះសកម្មភាពការដាំដុះនឹងមានចំនួនកាន់តែច្រើននៅពេលខាងមុខ»។
ដោយឡែកប្រធានមន្ទីរពាណិជ្ជកម្មខេត្តត្បូងឃ្មុំ លោក តូច សុខន បានប្រាប់ថា តម្លៃគ្រាប់ស្វាយចន្ទីនៅខេត្តត្បូងឃ្មុំ បានកើនតិចតួច ដោយមានតម្លៃ ១ ៣០០-១ ៤០០ ដុល្លារក្នុង ១ តោន ខណៈនៅឆ្នាំមុន ១ ១០០ ដុល្លារ។ ការកើនឡើងនេះដោយសារតម្រូវការកើនខ្ពស់ជាងមុន។
របាយការណ៍ក្រសួងកសិកម្មឱ្យដឹងថា ក្នុងឆមាសទី ១ ឆ្នាំ ២០២១ កម្ពុជានាំចេញគ្រាប់ស្វាយចន្ទី ៨៤៣ ២៤៣,២៦ តោន កើន ៣៣៦,៤៣ ភាគរយបើធៀបនឹងរយៈពេលដូចគ្នាឆ្នាំ ២០២០៕ LA
