ភ្នំពេញៈ ក្រុមប្រឹក្សាពាណិជ្ជកម្មកម្ពុជា (CBC) ដែលទើបបង្កើតឡើងថ្មីៗមានស្នាក់ការនៅទីក្រុងបាងកក និងសមាគមជំរុញកិច្ចសន្យាបន្តថៃ (Thai Subcon) បានចុះអនុស្សរណ:យោគយល់គ្នា (MoU) ដើម្បីរួមគ្នាលើកកម្ពស់ការធ្វើពាណិជ្ជកម្ម និងវិនិយោគរវាងប្រទេសទាំង ២ ដែលនេះគឺជាកិច្ចខិតខំប្រឹងប្រែងមួយសម្រាប់ការរួមចំណែកអនុវត្តយុទ្ធសាស្ដ្រការទូតសេដ្ឋកិច្ចរបស់ប្រទេសកម្ពុជា។
ពិធីចុះហត្ថលេខាត្រូវបានធ្វើឡើងតាមប្រព័ន្ធអនឡាញកាលពីថ្ងៃទី ១៣ ខែកក្កដា។ ពិធីនេះត្រូវបានធ្វើក្រោមអធិបតីភាពលោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ និងធ្វើសាក្សីដោយលោក ហេង សុវណ្ណារិទ្ធិ អនុព័ន្ធពាណិជ្ជកម្មកម្ពុជា។ MoU នេះត្រូវបានចុះហត្ថលេខាតាមប្រព័ន្ធអនឡាញរវាងលោក សម្បត្តិ សុធា ប្រធាន CBC និងលោក KiattisakJirakajornwong ប្រធាន Thai Subcon។
លោក សម្បត្តិ សុធា បានឱ្យដឹងថា ការបង្កើតបណ្ដាញកិច្ចសហប្រតិបត្តិការដ៏រឹងមាំមួយជាមួយអង្គការពាក់ព័ន្ធ និងកិច្ចសហប្រតិបត្តិការ គឺជាកត្តាប្រកបដោយជោគជ័យក្នុងការបំពេញបេសកកម្មរបស់លោក។
លោកថ្លែងថា៖ «គោលបំណង MoU រវាងក្រុមប្រឹក្សាពាណិជ្ជកម្មកម្ពុជា និង Thai Subcon គឺដើម្បីផ្ដល់ និងផ្លាស់ប្តូរព័ត៌មានដែលជាប់ពាក់ព័ន្ធការតភ្ជាប់ការអភិវឌ្ឍពាណិជ្ជកម្ម និងវិនិយោគនៃសមាជិកភាគីទាំង ២ ដើម្បីផ្លាស់ប្តូរកិច្ចសហប្រតិបត្តិការ ឬសកម្មភាពអភិវឌ្ឍន៍រួម និងការពង្រីកបណ្ដាញអាជីវកម្ម»។
លោកបន្តថា៖ «យើងនឹងគាំទ្ររួមគ្នាដល់សកម្មភាពទាំងអស់នៃបណ្ដាញទីផ្សារ ដើម្បីផ្សព្វផ្សាយឱកាសអាជីវកម្ម និងការវិនិយោគរបស់ពួកគេ ការផ្លាស់ប្តូរវប្បធម៌ និងការតភ្ជាប់សង្គមផងដែរ»។
លោកលើកឡើងទៀតថា៖ «តាងនាមឱ្យក្រុមប្រឹក្សាពាណិជ្ជកម្មកម្ពុជា ខ្ញុំមានក្ដីរីករាយខ្លាំងបំផុត ដែលមើលឃើញការផ្តួចផ្ដើមទំនាក់ទំនងនេះ ហើយនឹងធានាឱ្យប្រាកដថា នេះគឺគ្រាន់តែជាជំហានដំបូងបំផុតប៉ុណ្ណោះ សម្រាប់អង្គការទាំង ២ ក្នុងការអភិវឌ្ឍបន្ថែមទៀតកាន់តែជិតស្និទ្ធ និងកិច្ចសហការប្រកបដោយផ្លែផ្កានៅពេលអនាគតដ៏ខ្លីខាងមុខ»។
បច្ចុប្បន្ន Thai Subcon មានសមាជិកជាង ៤០០ ដែលគ្របដណ្ដប់លើបណ្ដុំឧស្សាហកម្មដ៏ទូលំទូលាយចាប់ពីគ្រឿងបន្លាស់រថយន្ត គ្រឿងម៉ាស៊ីនកែច្នៃអាហារ និងអេឡិចត្រូនិក។
លោក Kiattisak Jirakajornwong បានឱ្យដឹងថា Thai Subcon មានចក្ខុវិស័យច្បាស់លាស់ រួមជាមួយនឹងការប្ដេជ្ញាចិត្តក្នុងការលើកកម្ពស់ និងអភិវឌ្ឍសមត្ថភាពរបស់សមាជិក សមាគមដើម្បីបង្កើនសក្ដានុពលការផលិតឱ្យកាន់តែទូលំទូលាយ ការគ្រប់គ្រងទីផ្សារ និងលទ្ធកម្ម។
លោកនិយាយថា៖ «យើងអាចផ្ដល់លទ្ធភាពទៅដល់សមាជិកនូវប្រភពបច្ចេកវិទ្យា និងនវានុវត្តន៍។ នៅពេលនេះ យើងបម្រើជាផ្នែកកណ្ដាលក្នុងការតភ្ជាប់សមាជិករបស់យើងជាមួយនាយកដ្ឋានរដ្ឋ អង្គការក្នុងស្រុក និងអន្តរជាតិ។ យើងមានជំនឿថា ការធ្វើទីផ្សារ ព្រមទាំងបណ្ដាញសម្ព័ន្ធភាព គឺមានសារៈសំខាន់សម្រាប់កំណើនជាប្រចាំនៃសមាជិករបស់យើង»។
លោកបញ្ជាក់ថា៖ «ខ្ញុំផ្ទាល់តំណាងឱ្យ Thai Subcon សន្យាថា នឹងសម្រេចឱ្យបាន និងធ្វើឱ្យមានរូបរាង MoU នេះឡើងសម្រាប់អត្ថប្រយោជន៍របស់សមាគមទាំង ២ និងសម្រាប់សុច្ឆន្ទៈរបស់ប្រទេសកម្ពុជា និងប្រទេសថៃផងដែរ»។
ទំហំពាណិជ្ជកម្មរវាងកម្ពុជា និងថៃ សម្រេចបាន ៧,២៣៦ ពាន់លានដុល្លារកាលពីឆ្នាំ ២០២០ ធ្លាក់ចុះ ២៣,១៧ ភាគរយធៀបនឹងឆ្នាំ ២០១៩ ដោយសារតែការរំខានពីការរីករាលដាលជំងឺកូវីដ ១៩៕LA