ភ្នំពេញៈ ធនាគារជាតិនៃកម្ពុជា (NBC) នឹងធ្វើការដកហូតក្រដាសប្រាក់រៀលមានការខូចខាត ឬបាត់បង់ទ្រង់ទ្រាយ ប៉ុន្តែនៅតែរក្សាការប្តូរថ្មីនូវក្រដាសប្រាក់រៀលចាស់ ទក់ ឬរហែកដោយមិនគិតកម្រៃសេវានៅគ្រប់បញ្ជរបេឡាសាខាធនាគារជាតិនៃកម្ពុជារាជធានី-ខេត្ត (លើកលែងស្នាក់ការកណ្តាល) នៅរៀងរាល់ម៉ោងធ្វើការ។
សេចក្តីប្រកាសព័ត៌មានស្តីពីការលើកកម្ពស់គុណតម្លៃប្រាក់រៀល ដែលផ្សព្វផ្សាយថ្ងៃទី ១៣ ខែកក្កដាឱ្យដឹងថា ក្នុងករណីក្រដាសប្រាក់រៀលមានការខូចខាត ឬបាត់បង់ទ្រង់ទ្រាយដូចមានចែងក្នុងមាត្រា ៥១ មាត្រា ៥២ និងមាត្រា ៥៣ នៃច្បាប់ស្តីពីការរៀបចំ និងការប្រព្រឹត្តទៅនៃធនាគារជាតិនៃកម្ពុជា (១៩៩៦) ធនាគារជាតិសូមរក្សាសិទ្ធិដកហូតដោយគ្មានសំណង។
សេចក្តីប្រកាសព័ត៌មានបន្តថា មាត្រា ៥១ ចែងថា «ធនាគារកណ្តាលអាចបដិសេធមិនប្តូរក្រដាសប្រាក់ និងកាសបើសិនរូបភាពវាលែងមានភាពច្បាស់លាស់ បាត់បង់រូបភាពដើម ឬធ្លុះធ្លាយ ឬដែលបាត់បង់ទំហំ ៣០ ភាគរយ ឬលើសពីនេះ។ រូបិយវត្ថុទាំងនេះត្រូវដកចេញពីចរាចរណ៍ ហើយបំផ្លាញចោលដោយគ្មានសំណងចំពោះម្ចាស់ទេ លើកលែងតែករណីពិសេសដែលធនាគារកណ្តាលអាចយល់ព្រមសងមួយចំណែក ឬទាំងអស់»។
មាត្រា ៥២ ចែងថា «ក្រដាសប្រាក់ក្លែងក្លាយដែលយកមកបង់ ឬប្តូរត្រូវរឹបអូសដោយគ្មានសំណង ហើយត្រូវជូនព័ត៌មានទៅអាជ្ញាធរមានសមត្ថកិច្ច»។ ចំណែកមាត្រា ៥៣ បានចែងថា «ម្ចាស់ប្រាក់មិនអាចទាមទារពីធនាគារកណ្តាលឱ្យសងចំពោះក្រដាសប្រាក់ ឬកាលណាដែលខ្លួនធ្វើឱ្យបាត់បង់ ឬធ្វើឱ្យអន្តរាយនោះឡើយ។ ធនាគារកណ្តាលអាចដកហូតដោយគ្មានថ្នូរនូវក្រដាសប្រាក់ដែលមានការខូចខាតរូបភាពក្រៅ ពិសេសចំពោះក្រដាសប្រាក់ណាដែលមានសរសេរ លាបពណ៌ បោះពុម្ព បោះត្រា ឬបិទវត្ថុស្អិតពីលើ ឬឆ្លុះធ្លាយ ឬបាត់រូបភាពដោយប្រការណាក៏ដោយ»។
ក្នុងស្ថានភាពនៃការរីករាលដាលជំងឺកូវីដ ១៩ ធនាគារជាតិនៃកម្ពុជាបានលើកទឹកចិត្តឱ្យសាធារណជនទាំងអស់ប្រើការទូទាត់តាមប្រព័ន្ធអេឡិចត្រូនិក និងប្រើប្រាស់ក្រដាសប្រាក់រៀលប្រកបដោយអនាម័យ។
លោក សាយ សូនី អនុប្រធាននាយកប្រតិបតិ្តគ្រឹះស្ថានមីក្រូហិរញ្ញវត្ថុប្រាសាក់ ម.ក បានប្រាប់ភ្នំពេញប៉ុស្តិ៍ថា នេះជាវិធានការកាត់បន្ថយក្រដាសប្រាក់រៀលចាស់ៗ ដើម្បីលើកកម្ពស់គុណតម្លៃប្រាក់រៀល។
លោកប្រាប់ថា៖ «នេះជាការលើកទឹកចិត្តឱ្យប្រជាជនប្រើក្រដាសប្រាក់រៀលថ្មី ដើម្បីលើកកម្ពស់គុណតម្លៃប្រាក់រៀល ក៏ដូចជាកាត់បន្ថយក្រដាសប្រាក់ចាស់ៗដែលមានហានិភ័យឆ្លងរោគ ពិសេសជំងឺកូវីដ ១៩»។
លោកបន្ថែមថា មីក្រូហិញ្ញវត្ថុប្រាសាក់ តែងតែចូលរួមយ៉ាងសកម្មជាមួយរដ្ឋាភិបាលក្នុងការលើកកម្ពស់ប្រាក់រៀល។
លោក តូច ចៅចេក ប្រធាននាយកប្រតិបត្តិធនាគារប្រៃសណីយ៍កម្ពុជាបានស្វាគមន៍ និងគាំទ្រចំពោះធនាគារជាតិដែលបានបន្តជំរុញលើកកម្ពស់គុណតម្លៃប្រាក់រៀល។ លោកបន្តថា ធនាគារប្រៃសណីយ៍បានបំពេញកាតព្វកិច្ចនេះយូរមកហើយ គឺតាំងពីឆ្នាំ ២០១៨ មកម្ល៉េះ។
លោកបន្តថា រាល់គ្រឹះស្ថានធនាគារទាំងអស់ត្រូវបំពេញកាតព្វកិច្ចសមតុល្យឥណទានយ៉ាងតិចបំផុត ១០ ភាគរយនៃទំហំឥណទានសរុប។ សម្រាប់ធនាគារប្រៃសណីយ៍ គឺមានសមតុល្យឥណទានប្រហែលជា ៧០០ លានដុល្លារ ក្នុងនោះមានប្រាក់រៀលយ៉ាងតិច ៧០ លានដុល្លារ។
លោកនិយាយថា៖ «ប្រជាជនយើង ចរាចរណ៍ប្រាក់រៀលភាគច្រើនគាត់មិនសូវចង់ទេ អ៊ីចឹងយើងបានចូលរួមច្រើនក្នុងការជំរុញមានចរាចរណ៍ប្រាក់រៀល យើងលើកទឹកចិត្តអ្នកដាក់ប្រាក់រៀលបញ្ញើសន្សំទទួលបានការប្រាក់ថ្លៃជាងប្រាក់ដុល្លារ ហើយអ្នកខ្ចីលុយខ្មែរវិញក៏អាចមានលទ្ធភាពទទួលបានអត្រាការប្រាក់ទាបផងដែរ ក្នុងករណីមានទំហំលុយដូចគ្នា រយៈពេលដូចគ្នា ទ្រព្យបញ្ចាំដូចគ្នា»។
សេចក្តីប្រកាសព័ត៌មានបានបន្ថែមថា ប្រាក់រៀលតំណាងឱ្យអត្តសញ្ញាណជាតិ អធិបតេយ្យភាពជាតិ ឯករាជភាពសេដ្ឋកិច្ច និងពង្រឹងសាមគ្គីភាពសង្គម។ ធនាគារជាតិនៃកម្ពុជាសង្ឃឹមថា គ្រប់ភាគីពាក់ព័ន្ធ ពិសេសប្រជាជនកម្ពុជានឹងបន្តស្មារតីសហការលើកកម្ពស់ប្រាក់រៀលជាតិ និងចូលរួមចំណែកយ៉ាងសកម្មក្នុងការប្រឆាំងនឹងទង្វើទាំងឡាយដែលប៉ះពាល់ដល់គុណតម្លៃប្រាក់រៀល៕ LA