ភ្នំពេញៈ ការនាំចេញអង្ករទៅទីផ្សារអន្តរជាតិបាននិងកំពុងប្រឈមបញ្ហាធំៗ ៥ ដែលទាមទារឱ្យអ្នកប្រឡូកក្នុងវិស័យនេះផ្ទាល់ត្រូវគិតគូរឱ្យបានច្បាស់ទៅលើការរៀបចំយុទ្ធសាស្ត្រ ដើម្បីឆ្លើយតប និងធ្វើយ៉ាងណាជំរុញឱ្យវិស័យនេះមានភាពប្រកួតប្រជែង និងនិរន្តរភាព ពិសេសក្នុងបរិបទនៃជំងឺកូវីដ ១៩ ដែលពិភពលោកនៅមិនទាន់អាចគ្រប់គ្រងជំងឺនេះបាននៅឡើយ។
នេះជាការលើកឡើងរបស់លោក សុង សារ៉ន ប្រធានសហព័ន្ធស្រូវអង្ករកម្ពុជា (CRF) ក្នុងកិច្ចប្រជុំវិសាមញ្ញរបស់សហព័ន្ធស្រូវអង្ករកម្ពុជា ក្រោមប្រធានបទ «ភាពបន្សាំសេដ្ឋកិច្ចលើការនាំចេញអង្ករកម្ពុជា ក្នុងបរិបទកូវីដ ១៩» ដែលធ្វើឡើងតាមប្រព័ន្ធអនឡាញកាលពីថ្ងៃទី ១៣ ខែកក្កដា។
បញ្ហាប្រឈមធំៗទាំងនោះរួមមាន តម្លៃដឹកជញ្ជូនតាមសមុទ្រនៅតែបន្តឡើង, កង្វះកុងតឺន័រ, តម្លៃទីផ្សារអង្ករ (អង្ករក្រអូប) អន្តរជាតិបន្តធ្លាក់ចុះ, តម្លៃធាតុចូលឡើងថ្លៃ និងកង្វះទុនសម្រាប់ទិញស្រូវ (ពិសេសរោងម៉ាស៊ីនសល់ស្តុកចាស់)។
លោក សុង សារ៉ន បានប្រាប់ភ្នំពេញប៉ុស្តិ៍កាលពីថ្ងៃទី ១៥ ខែកក្កដាថា ការឆ្លងរាលដាលជំងឺកូវីដ ១៩ នៅគ្រប់ប្រទេសលើពិភពលោក កំពុងបង្កជាឧបសគ្គដល់សមត្ថភាពនាំចេញអង្ករកម្ពុជា ដែលទាមទារឱ្យអ្នកនៅក្នុងវិស័យស្រូវអង្ករកម្ពុជា ពិសេសក្រុមហ៊ុនជាសមាជិក CRF ដែលជាតួអង្គប្រឡូកក្នុងកិច្ចការងារនេះផ្ទាល់ត្រូវគិតគូររៀបចំយុទ្ធសាស្ត្រឱ្យបានហ្មត់ចត់ដើម្បីត្រៀមឆ្លើយតបនឹងបញ្ហាដែលកំពុងកើតមាននឹងអាចកើតមានជាយថាហេតុនៅពេលខាងមុខប្រកបដោយប្រសិទ្ធភាព។ លោកបន្តថា បន្ថែមពីលើនេះ CRF ក៏មានផែនការយកបញ្ហាទាំងនេះឱ្យរដ្ឋាភិបាលជួយដោះស្រាយផងដែរ។
លោកថ្លែងថា៖ «ជាមួយនឹងបញ្ហាប្រឈមនេះ សហព័ន្ធនឹងបន្តយកទៅពិភាក្សាជាមួយរដ្ឋាភិបាល ដើម្បីរកដំណោះស្រាយដល់ក្រុមហ៊ុនដែលជាសមាជិកអ្នកនាំចេញដែលកំពុងជួបបញ្ហាទាំងអស់នេះ»។
លោកបន្តថា បញ្ហាប្រឈមដែលបណ្តាលពីឥទ្ធិពលកូវីដ-១៩ ក៏បាននិងកំពុងបំផ្លាញដល់ផែនការដែល CRF បានកំណត់កាលពីឆ្នាំ ២០២០ ក្នុងការនាំចេញអង្ករឱ្យបានរង្វង់ ៨០ ម៉ឺនតោនក្នុងឆ្នាំ ២០២១។ លោកបញ្ជាក់ថា៖ «យើងមិនមានក្តីរំពឹងថាការនាំចេញអង្ករនឹងកើនឡើងដូចការរំពឹងទុកកាលពីឆ្នាំ ២០២០ ទេ ព្រោះការដឹកជញ្ជូនមិនទាន់មានភាពធូរស្រាល»។
ប្រធានក្រុមប្រឹក្សាភិបាលនៃ CRF លោក ហ៊ុន ឡាក់ បានប្រាប់ថា អ្នកនៅក្នុងវិស័យស្រូវ-អង្ករកម្ពុជាទាំងអស់ត្រូវតែចូលរួមគិត និងផ្តល់យោបល់ដល់សហព័ន្ធដើម្បីស្វែងរកលទ្ធភាព រកដំណោះស្រាយសមស្របណាមួយសម្រាប់វិស័យស្រូវអង្ករ ជាពិសេសស្ថានការណ៍ទៅខាងមុខ និងសម្រាប់រដូវកាលច្រូតកាត់នាពេលឆាប់ៗ។
លោកបន្តថា ជាមួយគ្នានេះ ក្រុមហ៊ុននាំចេញទាំងអស់ក៏ត្រូវពង្រឹង និងបង្កើននូវភាពប្រកួតប្រជែង (ខាងក្រៅ) និងការរួបរួមគ្នាក្នុងការចាប់យកទីផ្សារអន្តរជាតិធំៗឱ្យបានកាន់តែច្រើន ដើម្បីជួយឱ្យវិស័យស្រូវអង្ករកម្ពុជាកាន់តែមានភាពប្រកួតប្រជែង និងនិរន្តរភាព។
របាយការណ៍នាំចេញរបស់ CRF ប្រចាំឆមាសទី ១ ឱ្យដឹងថា ចាប់ពីខែមករា-មិថុនា ឆ្នាំ ២០២១ កម្ពុជានាំចេញអង្ករទៅទីផ្សារគោលដៅ ៤៩ លើពិភពលោកក្នុងបរិមាណសរុប ២៨០ ៤៥០ តោន ធ្លាក់ចុះ ២៩,៤៧ ភាគរយបើធៀបនឹងរយៈពេលដូចគ្នាឆ្នាំ ២០២០។ ដោយឡែកសម្រាប់ប្រាក់ដែលទទួលបានក្នុងឆមាសទី១ ឆ្នាំ ២០២១ មានចំនួន ២០២,៦៧ លានដុល្លារ ធ្លាក់ ២៣,៧១ ភាគរយ នារយៈពេលដូចគ្នាឆ្នាំ ២០២០។
យោងតាម CRF ការធ្លាក់ចុះនេះ ដោយសារការនាំចេញទៅទីផ្សារសហគមន៍អឺរ៉ុបកំពុងជួបនឹងបញ្ហាប្រឈមខ្លាំង ទាំងការដឹកជញ្ជូន កង្វះសម្បកកុងតឺន័រ និងការធ្លាក់ចុះយ៉ាងគំហុកនៃតម្លៃអង្ករក្រអូបរបស់កម្ពុជា ដែលពីមុនមានតម្លៃជាមធ្យម ៩០០ ដុល្លារ ក្នុង ១ តោន នៅពេលនេះនៅសល់ត្រឹម ៧៣០ ដុល្លារតែប៉ុណ្ណោះ។
លោក សុង សារ៉ន កាលពីដើមខែកក្កដានេះបាននិយាយថា រដ្ឋាភិបាល និងសហព័ន្ធស្រូវអង្ករកម្ពុជាកំពុងគិតគូរ ការធ្វើពិពិធកម្មទីផ្សារនាំចេញអង្ករទៅទីផ្សារតំបន់អាស៊ី គឺ ប្រទេសចិន (ហុងកុង-ម៉ាកាវ) ដែលជាទីផ្សារធំជាងគេ បន្ទាប់ពីការនាំចេញទៅទីផ្សារសហគមន៍អឺរ៉ុបជួបបញ្ហាជាច្រើន។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានឱ្យដឹងថា បច្ចុប្បន្នរដ្ឋាភិបាលកម្ពុជាកំពុងពន្លឿនការចរចាជាមួយភាគីចិន ដើម្បីបង្កើនកូតានាំចូលអង្ករពីកម្ពុជាចំនួន ១០ ម៉ឺនតោនបន្ថែមទៀតពីលើកូតា ៤០ ម៉ឺនតោនក្នុង ១ ឆ្នាំ ដែលទទួលបានពីរដ្ឋាភិបាលចិនរួចមកហើយ។
ទិន្នន័យក្រសួងកសិកម្មឱ្យដឹងថា ក្នុងឆ្នាំ ២០២០ កម្ពុជាបាននាំចេញអង្ករសរុប ៦៩០ ៨២៩ តោន ដោយមានតម្លៃជិត ៥៣៩ លានដុល្លារ កើន ១១,៤ ភាគរយ ធៀបនឹងឆ្នាំ ២០១៩។ ចិនឈរនៅលំដាប់ទី១ ជាប្រទេសនាំចូលអង្ករពីកម្ពុជាក្នុងបរិមាណ ២៨៩ ៤៣៩ តោនស្មើ ៤១,៩ ភាគរយនៃការនាំចេញអង្ករសរុប៕ LA