ភ្នំពេញៈ ក្រុមហ៊ុន Thunes ដែលជាបណ្តាញទូទាត់សកលឈានមុខគេលើពិភពលោកមានមូលដ្ឋាននៅសិង្ហបុរីបានប្រកាសភាពជាដៃគូផ្លូវការជាមួយធនាគារ ABA ដែលនឹងអនុញ្ញាតឱ្យប្រជាពលរដ្ឋកម្ពុជានៅក្រៅប្រទេសអាចផ្ញើប្រាក់ត្រឡប់មក វិញពីជុំវិញសកលលោកបានរហ័សក្នុងតម្លៃទាបជាងមុន។
យោងតាមសេចក្ដីប្រកាសព័ត៌មានរបស់ធនាគារ ABA ដែលចេញផ្សាយកាលពីថ្ងៃទី ១៣ ខែកក្កដា ឥឡូវនេះជាមួយបណ្តាញសកល ទូលំទូលាយ និងសមត្ថភាពថ្មីបំផុតរបស់ក្រុមហ៊ុន Thunes ប្រជាពលរដ្ឋកម្ពុជាដែលរស់នៅ ធ្វើការ និងសិក្សានៅក្រៅប្រទេសអាចផ្ញើប្រាក់ត្រឡប់មកប្រទេសវិញបានភ្លាមៗក្នុងតម្លៃទាប។
កាលពីមុនអតិថិជនដែលធ្វើការផ្ទេរប្រាក់ពីក្រៅប្រទេសមកកម្ពុជាវិញត្រូវចំណាយថ្លៃសេវាខ្ពស់ជាមធ្យមជិត ១២ ភាគរយសម្រាប់ការផ្ទេរប្រាក់ ២០០ ដុល្លារ និងត្រូវរង់ចាំរយៈពេល ២-៣ ថ្ងៃទើបបានមកដល់ដៃរបស់អ្នកទទួល។
លោក Andrew Stewart នាយកបណ្តាញសកល Thunes បានឱ្យដឹងថា ភាពជាដៃគូជាមួយ ABA គឺជាជំហានជោគជ័យដ៏សំខាន់ ខណៈពេលដែលក្រុមហ៊ុន Thunes បន្តធ្វើឱ្យប្រសើរឡើងនូវការចូលមកកម្ពុជាដែលជាប្រទេសមួយក្នុងចំណោមប្រទេសមានសេដ្ឋកិច្ចរីកចម្រើនលឿនបំផុតរបស់សកលលោក។
លោក Andrew ថ្លែងថា៖ «យើងខ្ញុំមានសេចក្តីរីករាយក្នុងការផ្តល់សេវាទូទាត់តាមពេលវេលាជាក់ស្តែងដែលឈានមុខគេក្នុងទីផ្សារនេះ ដោយគាំទ្រដល់សហគមន៍ក្នុងប្រទេស និងក្រៅប្រទេសពឹងផ្អែកលើការផ្ទេរប្រាក់រហ័ស និងសុវត្ថិភាពសម្រាប់តម្រូវការ និងប្រតិបត្តិការប្រចាំថ្ងៃរបស់ខ្លួន»។
លោក Zhiger Atchabarov នាយកប្រតិបត្តិការអន្តរជាតិ ABA បានឱ្យដឹងថា៖ «យើងទទួលយកឱកាសនេះដើម្បីប្រើប្រាស់នូវល្បឿន ប្រសិទ្ធភាព និងវិសាលភាពផ្តល់សេវាជាសកលរបស់ក្រុមហ៊ុន Thunes ក្នុងការឆ្លើយតបនឹងតម្រូវការរបស់អតិថិជនរបស់យើងឱ្យកាន់តែប្រសើរជាងមុន។ ការបង្កើននវានុវត្តន៍ឌីជីថល និងសេវាគុណតម្លៃបន្ថែម ដើម្បីផលប្រយោជន៍សហគមន៍កម្ពុជា គឺជាស្នូលនៃចក្ខុវិស័យរបស់ធនាគារ»។
ធនាគារជាតិនៃកម្ពុជាបានរាយការណ៍កាលពីខែមិថុនាថា ប្រទេសកម្ពុជាបានទទួលប្រាក់ផ្ញើមកផ្ទះ ១,២ ពាន់លានដុល្លារពីកម្មករធ្វើចំណាកស្រុកនៅក្រៅប្រទេសកាលពីឆ្នាំមុន ដែលបង្ហាញការធ្លាក់ចុះចំនួន ១៧ ភាគរយបើធៀបនឹង ១,៥ ពាន់លានដុល្លារកាលពីឆ្នាំ ២០១៩៕ LA