ភ្នំពេញៈ និយ័តករ​មូលបត្រ​កម្ពុជា (SERC) នៃ​ក្រសួង​សេដ្ឋកិច្ច និង​ហិរញ្ញវត្ថុ​បាន​ចុះអនុស្សរណៈ​យោគយល់​គ្នា​ជាមួយ​ក្រុមហ៊ុន រេដ ប្រិជ ឯ.ក (Redbridge Co., Ltd.) ​ដើម្បី​រួមចំណែក​អភិវឌ្ឍន៍​វិស័យ​មូលបត្រ​នៅ​កម្ពុជា​បាននិង​កំពុង​រីកចម្រើន​ជា​លំដាប់ ។

លោក ស៊ូ សុជាតិ ប្រតិភូ​រាជរដ្ឋាភិបាល​ទទួល​បន្ទុក​អគ្គនាយក​នៃ ន.ម.ក បាន​ចុះហត្ថលេខា​ជាមួយ​នឹង​អ្នកស្រី ម៉ៅ សុខា ​(Mov Sokha CEO of Redbridge) អគ្គនាយក​ក្រុមហ៊ុន រេដ ប្រិជ ស្តីពី «​ការពិគ្រោះយោបល់ និង ការផ្តល់​ជំនួយ​បច្ចេកទេស​ក្នុង​ការរៀបចំ​គោលការណ៍​ណែនាំ​ពាក់ព័ន្ធ​នឹង​បច្ចេកវិទ្យា​ព័ត៌មាន​សម្រាប់​អាជីវកម្ម​ឧបករណ៍​និស្សន្ទ » ​កាលពី​ថ្ងៃទី ១៥ ខែ កក្កដា តាមប្រព័ន្ធ​អនឡាញ ។

លោក សុជាតិ បានលើក​ឡើង​ថា អនុស្សរណៈ​នេះ​ត្រូវបាន​រៀបចំ​ឡើង​ក្នុង​គោលបំណង​ចូលរួម​ចំណែក​អភិវឌ្ឍវិស័យ​មូលបត្រ​នៅ​កម្ពុជា ដែល​ក្រុមហ៊ុន រេដប្រិជ នឹង​ជួយ​ផ្តល់​ប្រឹក្សាយោបល់​ចំណេះដឹង​បទពិសោធន៍ និង​ជំនាញ​វិជ្ជាជីវៈ​ដល់​អាជីវកម្ម​ឧបករណ៍​និស្សន្ទ​នៅ​កម្ពុជា ។

លោក​បាន​ឱ្យ​ដឹងទៀត​ថា តាមរយៈ​អនុស្សរណៈ​នេះ​ក្រុមហ៊ុន​ក៏​នឹង​ផ្តល់​ជំនួយ​បច្ចេកទេស​ដល់ ន.ម.ក. ក្នុង​ការរៀបចំ​នូវ​គោលការណ៍​ណែនាំ​ពាក់ព័ន្ធ​នឹង​បច្ចេកវិទ្យា​ព័ត៌មាន​សម្រាប់​អាជីវកម្ម​ឧបករណ៍​និស្សន្ទ ។

លោក​ថ្លែង​ថា៖ «​គោលការណ៍​ណែនាំ​នេះ​នឹង​ក្លាយ​ជា​មគ្គុទេសក៍​បច្ចេកវិទ្យា​ព័ត៌មាន​សម្រាប់​ក្រុមហ៊ុន​ដែល​ទទួល​បាន​អាជ្ញាបណ្ណ និង​ការអនុញ្ញាត​ពី ន.ម.ក. ធ្វើ​អាជីវកម្ម​ឧបករណ៍​និស្សន្ទ»៕