.jpg)
ក្រុមហ៊ុនហ្គោលអេហ្វអិកស៍ អ៊ិនវេសម៉ិន (GoldFX Investment Co., Ltd)។ រូបថត ហ្វេសប៊ុក
ភ្នំពេញៈ និយតករមូលបត្រកម្ពុជា (ន.ម.ក.) បានដាក់នូវវិធានការបន្តបន្ទាប់ឱ្យក្រុមហ៊ុនហ្គោលអេហ្វអិកស៍ អ៊ិនវេសម៉ិន (GoldFX Investment Co., Ltd) រកដំណោះស្រាយជាមួយអតិថិជនករណីបាត់បង់ទុនវិនិយោគដែលគេរំពឹងថាវិធានការនេះនឹងបន្តផ្តល់សេចក្តីទុកចិត្តដល់វិនិយោគិនលើវិស័យនេះ។
សេចក្តីប្រកាសព័ត៌មានរបស់ ន.ម.ក. កាលពីថ្ងៃទី ១៦ កក្កដា ឱ្យដឹងថា កន្លងមកក្រុមហ៊ុន GoldFX បានទូទាត់ប្រាក់វិនិយោគទៅឱ្យអតិថិជនទាំងនេះតាមគណនីជួញដូរនីមួយៗរួចរាល់ហើយ ប៉ុន្តែដោយ ន.ម.ក. បានទទួលពាក្យបណ្តឹងជាបន្តបន្ទាប់ចំនួនជិត ៨០០ បណ្តឹងហើយរហូតមកដល់ពេលនេះ។ ក្នុងករណីនេះ ន.ម.ក. តម្រូវឱ្យក្រុមហ៊ុន GoldFX ដោះស្រាយជាបន្ទាន់ជាមួយនឹងអតិថិជនដែលបានបើកគណនីជួញដូរឧបករណ៍និស្សន្ទតាមរយៈវេទិកាជួញដូររបស់ក្រុមហ៊ុនសមភាគីកណ្តាលស្របច្បាប់។
សេចក្តីប្រកាសព័ត៌មានបានបញ្ជាក់ថា៖ «ដោយពិនិត្យឃើញថា ក្រុមហ៊ុន GoldFX មានអតិថិជនផ្សេងទៀតក្រៅពីក្រុមអតិថិជនខាងលើនេះ ក្នុងគោលដៅបន្ទាន់នៃកិច្ចការពារផលប្រយោជន៍របស់វិនិយោគិន ន.ម.ក. បានជំរុញ និងណែនាំឱ្យក្រុមហ៊ុន GoldFX ព្យួរប្រតិបត្តិការ តែមិនឱ្យបិទក្រុមហ៊ុន និងត្រូវដោះស្រាយទូទាត់ប្រាក់វិនិយោគឱ្យអតិថិជនទាំងនោះវិញជាបន្ទាន់»។
លោក ញឹម កុសល ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ហ្គោលដេន អេហ្វអិកស៍ លីង ឃែភីថល (Golden FX Link Capital) ដែលជាក្រុមហ៊ុនឈ្មួញជើងសាឧបករណ៍និស្សន្ទនៅកម្ពុជា ប្រាប់ភ្នំពេញប៉ុស្តិ៍ថា រាល់ក្រុមហ៊ុនឈ្មួញជើងសាឧបករណ៍និស្សន្ទដែលទទួលអាជ្ញាប័ណ្ណពីនិយតករមូលបត្រកម្ពុជា គឺត្រូវបានផ្តល់ការទុកចិត្តរួចទៅហើយ ប៉ុន្តែទាមទារឱ្យវិនិយោគិនដែលដាក់ទុនវិនិយោគត្រូវមានការសិក្សាស្រាវជ្រាវឱ្យបានច្បាស់លាស់ជាមុនសិន។
លោកបន្តថា៖ «អ្នកវិនិយោគត្រូវតែសិក្សាឱ្យច្បាស់អំពីក្រុមហ៊ុនវិនិយោគ ដែលនេះជាកិច្ចការរវាងបុគ្គលផ្ទាល់ខ្លួនរបស់គាត់ជាមួយក្រុមហ៊ុន។ ពួកខ្ញុំជាតំណាងឱ្យក្រុមហ៊ុន ដូចនេះយើងខ្ញុំមិនអាចនិយាយករណីនេះខុស ឬក៏ត្រូវនោះទេ»។
លោកបញ្ជាក់ថា៖ «តាមពិតអ្នកវិនិយោគគួរតែមានទំនុកចិត្តវិនិយោគលើវិស័យនេះតាំងពីដើម ព្រោះច្បាប់របស់យើងបានគ្រប់គ្រងទៅលើក្រុមហ៊ុនជួញដូរនេះរួចហើយ គ្រាន់តែថា នៅពេលអតិថិជនសម្រេចវិនិយោគ ពួកគាត់ត្រូវគិតគូរពីស្តង់ដា និងសិក្សាស្រាវជ្រាវឱ្យបានគ្រប់គ្រាន់»។
លោកក៏បានគាំទ្រចំណាត់ការរបស់និយតករមូលបត្រកម្ពុជាក្នុងករណីនេះ និងប្តេជ្ញាបន្តគោរពតាមរាល់ការណែនាំពី ន.ម.ក.។
ក្រុមហ៊ុន GoldFX ទទួលបានអាជ្ញាប័ណ្ណធ្វើអាជីវកម្មជាឈ្មួញជើងសាឧបករណ៍និស្សន្ទពី ន.ម.ក.។ តាមបទប្បញ្ញត្តិក្រុមហ៊ុនត្រូវបានអនុញ្ញាតឱ្យធ្វើការជួញដូរឧបករណ៍និស្សន្ទក្នុងនាមជាភ្នាក់ងាររបស់អតិថិជនខ្លួន (ធ្វើតាមការបញ្ជាទិញ-លក់របស់អតិថិជន) និងផ្តល់ប្រឹក្សាអំពីការវិនិយោគលើឧបករណ៍និស្សន្ទ។
ចំពោះចំណាត់ការលើពាក្យបណ្តឹងទាំងអស់នេះ ន.ម.ក. បានអញ្ជើញតំណាងក្រុមហ៊ុន GoldFX មកបំភ្លឺ ព្រមទាំងអ្នកតំណាងម្ចាស់បណ្តឹង និងម្ចាស់បណ្តឹងជាបន្តបន្ទាប់ឱ្យចូលមកផ្តល់ព័ត៌មាន និងផ្តល់ឯកសារពាក់ព័ន្ធចាំបាច់ដើម្បីបន្តនីតិវិធីតាមច្បាប់ជាធរមាន៕ LA
