ភ្នំពេញៈ ក្រសួងទេសចរណ៍នឹងជ្រើសរើសភូមិឆ្នើមចំនួន ៣ ធ្វើជាបេក្ខភាពតំណាងប្រទេសកម្ពុជាចូលរួមការប្រកួតប្រជែង «ភូមិទេសចរណ៍ឆ្នើម» (Best Tourism Village) ដែលរៀបចំដោយអង្គការទេសចរណ៍ពិភពលោក (UNWTO) ក្នុងឱកាសនៃសម័យប្រជុំនៅទីក្រុងម៉ារ៉ាខាស ប្រទេសម៉ារ៉ុក នាខែតុលា ឆ្នាំ ២០២១។
លិខិតទីស្តីការគណៈរដ្ឋមន្ត្រីចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋលេខាធិការប្រចាំការកាលពីថ្ងៃទី ១៣ ខែកក្កដា ឱ្យដឹងថា រដ្ឋាភិបាលសម្រេចអនុញ្ញាតឱ្យក្រសួងទេសចរណ៍សហការជាមួយក្រសួងស្ថាប័នពាក់ព័ន្ធដូចជា ក្រសួងមហាផ្ទៃ អាជ្ញាធររាជធានី-ខេត្ត និងភាគីពាក់ព័ន្ធផ្សេងទៀតធ្វើការជ្រើសរើសភូមិទេសចរណ៍ឆ្នើមចំនួន ៣ ដាក់ជាបេក្ខភាពក្នុងកម្មវិធីប្រឡងប្រណាំង «ភូមិទេសចរណ៍ឆ្នើម» ដែលផ្តួចផ្តើមឡើងដោយ UNWTO។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ភ្នំពេញប៉ុស្តិ៍កាលពីថ្ងៃទី ១៨ ខែកក្កដាថា នេះជាគម្រោងរបស់អង្គការទេសចរណ៍ពិភពលោក ដើម្បីជ្រើសរើសរកភូមិទេសចរណ៍ឆ្នើម ចូលរួមប្រកួតប្រជែងជាលក្ខណៈអន្តរជាតិ។ ភូមិទេសចរណ៍ឆ្នើមសំដៅកន្លែងដែលមានសក្តានុពលទេសចរណ៍ដូចជា ភាពទាក់ទាញ មានការការពារ និងអភិរក្សវប្បធម៌ ទំនៀមទម្លាប់ប្រពៃណី សម្បត្តិបេតិកភណ្ឌ ព្រមទាំងការចូលរួមរបស់ប្រជាជនក្នុងតំបន់។
លោកថ្លែងថា៖ «បើកម្ពុជាទទួលជយលាភីពីការប្រកួតនេះ វានឹងផ្តល់អត្ថប្រយោជន៍ច្រើនដូចជា ការចែករំលែកបទពិសោធនៃការអភិវឌ្ឍភូមិគំរូនៅប្រទេសនានា ព្រមទាំងអាចបង្កើតនូវផលិតផលទេសចរណ៍ថ្មីៗសម្រាប់ទ្រទ្រង់សេដ្ឋកិច្ចក្នុងតំបន់ និងឱកាសការងារថ្មីៗបន្ថែមដល់ប្រជាជន»។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ថា ការជ្រើសរើសយកភូមិទេសចរណ៍ឆ្នើមទៅប្រកួតប្រជែងលក្ខណៈពិភពលោកបែបនេះនឹងផ្តល់ផលប្រយោជន៍ច្រើនសម្រាប់វិស័យទេសចរណ៍នៅកម្ពុជា។
លោកបន្តថា ដើម្បីអាចក្លាយជាភូមិទេសចរណ៍ឆ្នើម លុះត្រាភូមិទាំងនោះត្រូវមានលក្ខណៈមួយចំនួនដូចជា ការរក្សាបាននូវសម្បត្តិវប្បធម៌ដើម មានសុខសុវត្ថិភាពល្អ និងមានបរិស្ថានស្អាត។
លោកប្រាប់ថា៖ «កម្មវិធីនេះអាចនឹងជួយទាក់ទាញចំណាប់អារម្មណ៍របស់ពិភពលោកឱ្យមកចាប់អារម្មណ៍លើកម្ពុជាកាន់តែច្រើន ពិសេសបើភូមិទេសចរណ៍ឆ្នើមកម្ពុជាត្រូវបានគេជ្រើសរើស»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍-កម្ពុជាបានប្រាប់ថា កម្មវិធីបែបនេះនឹងជួយជំរុញឱ្យភូមិដែលមានសក្តានុពលទេសចរណ៍នីមួយៗខិតខំធ្វើការអភិរក្ស និងអភិវឌ្ឍន៍បន្ថែមលើអ្វីដែលខ្លួនមានឱ្យកាន់តែប្រសើរ។ ការពង្រឹងខ្លួនដើម្បីចូលរួមក្នុងកម្មវិធីលក្ខណៈពិភពលោកនឹងមិនត្រឹមតែអាចទាក់ទាញភ្ញៀវទេសចរក្រៅប្រទេសប៉ុណ្ណោះទេ សូម្បីភ្ញៀវក្នុងស្រុកក៏អាចស្រូបទាញបានច្រើនដែរ។
អ្នកស្រីអះអាងថា៖ «វិស័យឯកជនពិតជាពេញចិត្ត និងគាំទ្រឱ្យមានកម្មវិធីនេះ ព្រោះនៅពេលមានការប្រកួតប្រជែងភូមិនីមួយៗតែងតែនាំគ្នារៀបចំទីតាំងរបស់ខ្លួន ទោះពេលនេះប្រទេសកម្ពុជានៅមិនទាន់បើកទទួលភ្ញៀវបរទេសក៏ដោយ»។
ប្រធានសមាគមសណ្ឋាគារកម្ពុជា លោក ឌិន សុមេធារិទ្ធ បាននិយាយថា ការជ្រើសរើស «ភូមិទេសចរណ៍ឆ្នើម» នឹងចូលរួមចំណែកច្រើនសម្រាប់វិស័យទេសចរណ៍ និងសណ្ឋាគារ ក៏ដូចជាកេរ្តិ៍ឈ្មោះរបស់ប្រទេសកម្ពុជា ព្រោះសម្រាប់កិច្ចការផ្ទៃក្នុង គឺតាមភូមិនីមួយៗអាជ្ញាធរ ក៏ដូចជាប្រជាពលរដ្ឋនឹងខិតខំរៀបចំកន្លែងខ្លួនឱ្យមានភាពល្អប្រសើរ និងមានសេដ្ឋកិច្ចមូលដ្ឋានកាន់តែរឹងមាំ ចំណែកកិច្ចការខាងក្រៅ គឺភូមិដែលត្រូវគេជ្រើសរើសនឹងអាចមានឱកាសក្នុងការចាប់ដៃគូជាមួយភូមិនៅក្រៅប្រទេស ដើម្បីរៀនសូត្រពីគ្នាទៅវិញទៅមករបៀបក្នុងការអភិវឌ្ឍមូលដ្ឋាន និងរឹតចំណងមិត្តភាពរវាងគ្នា និងគ្នា។
លោកលើកឡើងថា៖ «តាមរយៈកម្មវិធីនេះគេអាចបង្កើតឱ្យមានការចងសម្ព័ន្ធជាភូមិទេសចរណ៍គំរូលក្ខណៈអន្តរជាតិ ដើម្បីអភិវឌ្ឍវិស័យទេសចរណ៍ និងសណ្ឋាគារឡើងវិញនៅពេលខាងមុខ»។
ការកំណត់នៃការដាក់ពាក្យសុំចូលរួមប្រកួត «ភូមិទេសចរណ៍ឆ្នើម» របស់ UNWTO នឹងត្រូវបញ្ចប់នាថ្ងៃទី ៣១ ខែសីហា ឆ្នាំ ២០២១ ហើយលទ្ធផលនឹងត្រូវប្រកាសនៅខែតុលា ឆ្នាំ ២០២១ ក្នុងកិច្ចប្រជុំលើកទី ២៤ នៃមហាសន្និបាត UNWTO នៅក្នុងទីក្រុងម៉ារ៉ាខាស ប្រទេសម៉ារ៉ុក៕ LA