.jpg)
ក្រដាសប្រាក់រៀលដែលគេប្តូរនៅកន្លែងប្តូរប្រាក់នៅភ្នំពេញ។ ហេង ជីវ័ន
ភ្នំពេញៈ របាយការណ៍ថ្មីមួយរបស់ UNDP រកឃើញថា ចំណូលក្នុងស្រុកកាន់តែក្លាយជាប្រភពហិរញ្ញប្បទានសំខាន់បំផុតសម្រាប់ការអភិវឌ្ឍនៅកម្ពុជាដែលស្មើនឹង ១៩ ភាគរយនៃផលិតផលក្នុងស្រុកសរុបក្នុងឆ្នាំ ២០២០ និងបន្តកើនឡើងរហូតដល់ ២២,៥ ភាគរយ ត្រឹមឆ្នាំ ២០២៥។
នៅថ្ងៃទី ១៦ ខែកក្កដា ឆ្នាំ ២០២១ UNDP បានប្រកាសផ្សព្វផ្សាយរបាយការណ៍មួយក្រោមចំណងជើងថា «ការវាយតម្លៃលើធនធានហិរញ្ញប្បទានសម្រាប់ការអភិវឌ្ឍនៅកម្ពុជា (DFA)» បានធ្វើការវិភាគលើសមាសភាគ និងនិន្នាការនៃលំហូរចូលធនធានហិរញ្ញវត្ថុទាំងអស់របស់កម្ពុជា ដែលមានប្រភពពីវិស័យសាធារណៈ វិស័យឯកជន អន្តរជាតិ និងជាតិសម្រាប់គាំទ្រដល់ការវិនិយោគលើការងារអភិវឌ្ឍន៍នៅក្នុងប្រទេសនេះ។ ការសិក្សាថ្មីនេះ ក៏បានប៉ាន់ប្រមាណពីការខាតបង់ដែលទំនងជាកើតមានចំពោះកម្ពុជាបង្កឡើងដោយវិបត្តិជំងឺកូវីដ ១៩ ផងដែរ។
ខណៈពេលដែលលំហូរជំនួយអភិវឌ្ឍន៍ផ្លូវការ (ODA) នៅតែមានកម្រិតគួរកត់សម្គាល់ស្មើនឹងប្រមាណ ៧,៩ ភាគរយនៃ ផ.ស.ស ផ្នែកខ្លះនៃប្រភពហិរញ្ញប្បទាននេះបានងាកទៅរកកម្ចីវិញពោលគឺកម្ចីដែលពុំសូវមានលក្ខណៈសម្បទានដូចកាលពីមុន។
ជំងឺកូវីដ ១៩ បាននាំឱ្យមានការខាតបង់លំហូរហិរញ្ញប្បទានសរុបប្រមាណ ៣,៦ ពាន់លានដុល្លារស្មើនឹង ១៩,៨ ភាគរយនៃលំហូរហិរញ្ញវត្ថុសរុបសម្រាប់ឆ្នាំ ២០២០។ ប្រភពហិរញ្ញប្បទានដែលរងផលប៉ះពាល់ខ្លាំងជាងគេ រួមមាន ចំណូលនៅក្នុងស្រុក ការវិនិយោគដោយផ្ទាល់ពីបរទេស (FDI) និងការវិនិយោគឯកជន។
របាយការណ៍បានគូសបញ្ជាក់ពីសារៈសំខាន់នៃការធ្វើនវានុវត្តន៍គោលនយោបាយហិរញ្ញប្បទាន ដើម្បីបង្កើនសមត្ថភាពរបស់រដ្ឋក្នុងការគ្រប់គ្រងហិរញ្ញវត្ថុសាធារណៈ និងធានាឱ្យមានការបន្តលំហូរមូលធនឯកជនក្នុងកម្រិតខ្ពស់។ ដូច្នេះ គួរមានការសិក្សាបន្ថែមពីជម្រើសផ្សេងទៀតនៃយន្តការហិរញ្ញប្បទានបៃតងដែលអាចយកប្រើប្រាស់ ដើម្បីសម្រេចគោលដៅអភិវឌ្ឍន៍ប្រកបដោយចីរភាព (SDGs)។
លោក Nick Beresford នាយក UNDP ប្រចាំកម្ពុជាឱ្យដឹងថា នេះជាលើកទី១ ហើយដែលមានការបង្កើតជាម៉ូដែល ដើម្បីបង្ហាញឱ្យឃើញពីរូបភាពពេញលេញនៃលំហូរចូលហិរញ្ញវត្ថុ ដែលគេរំពឹងថានឹងទទួលបានពីគ្រប់ប្រភពទាំងអស់សម្រាប់កម្ពុជាជាមួយនឹងភាពជាក់លាក់បែបនេះ។
នៅពេលដែលគេអាចសម្រួលការរឹតត្បិត ដោយសារជំងឺកូវីដ ១៩ គេរំពឹងថា លំហូរធនធានហិរញ្ញប្បទានសម្រាប់ការអភិវឌ្ឍនឹងមានកំណើនខ្ពស់។ ក្នុងចំណោមលំហូរទាំងនេះ ប្រភពហិរញ្ញប្បទានពីក្នុងស្រុកកាន់តែមានសារៈសំខាន់ខ្លាំងឡើងៗ។
លោកបន្ថែមថា៖ «កម្ពុជាអាចងើបចេញពីឋានៈជាប្រទេសដែលមានការអភិវឌ្ឍតិចតួចនៅចុងទសវត្សរ៍ ២០២០។ ពេលនេះជាពេលវេលាដែលត្រូវត្រៀមប្រភពហិរញ្ញប្បទានថ្មីៗ ដូចដែលបង្ហាញយ៉ាងច្បាស់នៅក្នុងរបាយការណ៍នេះ។ ឧទាហរណ៍ការមានលទ្ធភាពចេញសញ្ញាបណ្ណជាប្រាក់រៀល គឺជាជម្រើសមួយដែលកំពុងត្រូវបានយកមកធ្វើការពិចារណា ហើយក៏ជាជម្រើសដែលទទួលបានការគាំទ្រខ្លាំងក្លាពីអង្គការ UNDP ផងដែរ។»
លោក រស់ សីលវ៉ា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុបានលើកឡើងថា រាជរដ្ឋាភិបាលកម្ពុជាមានគម្រោងផ្សព្វផ្សាយផែនការស្តារសេដ្ឋកិច្ចឡើងវិញក្រោយវិបត្តិជំងឺកូវីដ-១៩ សម្រាប់ឆ្នាំ ២០២១-២០២៣ ដែលនឹងប្រើប្រាស់ហិរញ្ញប្បទានពីថវិកាជាតិ និងពិចារណាកៀរគរប្រភពហិរញ្ញប្បទានផ្សេងទៀត។
លោកបានកត់សម្គាល់ថា របាយការណ៍នេះបានរួមចំណែកផ្តល់ឱ្យនូវគំនិតបន្ថែមពីជម្រើសប្រភពហិរញ្ញប្បទាន។
លោក សីលវ៉ា ក៏បានស្វាគមន៍អនុសាសន៍គោលនយោបាយដែលត្រូវបានលើកឡើងនៅក្នុងរបាយការណ៍ DFA របស់អង្គការ UNDP នេះ។
លោកបន្ថែមថា៖ «ការផ្ដល់អនុសាសន៍គោលនយោបាយឈរលើភ័ស្តុតាងពិតជាក់ស្តែងដល់រាជរដ្ឋាភិបាលកម្ពុជា គឺជាការរួមវិភាគទានបន្ថែមទៀតរបស់ UNDP»៕ LA
