ភ្នំពេញៈ វិស័យឯកជនបានគាំទ្ររដ្ឋាភិបាលចំពោះការបង្កើតអង្គភាពក្រោមឱវាទរបស់អាជ្ញាធរសេវាហិរញ្ញវត្ថុ និងមិនមែនធនាគារ (Non-Bank Financial Services Authority-FSA) ដែលគេជឿថា FSA នឹងជួយធ្វើឱ្យវិស័យសេវាហិរញ្ញវត្ថុ និងមិនមែនធនាគារកាន់តែរឹងមាំ និងមានភាពរីកចម្រើននៅពេលអនាគត។
អនុក្រឹត្យស្តីពីការរៀបចំ និងការប្រព្រឹត្តទៅនៃអង្គភាពក្រោមឱវាទរបស់អាជ្ញាធរសេវាហិរញ្ញវត្ថុមិនមែនធនាគារ (អ.ស.ហ) មាន ៦៥ មាត្រា និង ១៣ ជំពូកត្រូវបានលោកនាយករដ្ឋមន្ត្រី ហ៊ុន សែន ចុះហត្ថលេខាដាក់ឱ្យចាប់ផ្តើមអនុវត្តកាលពីថ្ងៃទី ១៤ ខែកក្កដា ឆ្នាំ ២០២១។
អនុក្រឹត្យនេះមានវិសាលភាពអនុវត្តចំពោះអង្គភាពក្រោមឱវាទ អ.ស.ហ រួមមាន អគ្គលេខាធិការដ្ឋាន និយតករធានារ៉ាប់រងកម្ពុជា និយតករមូលបត្រកម្ពុជា និយតករសន្តិសុខសង្គម និយតករបរធនបាលកិច្ច និយតករគណនេយ្យ និងសវនកម្ម និយតករអាជីវកម្មអចលនវត្ថុបញ្ចាំ និងអង្គភាពសវនកម្មផ្ទៃក្នុង។
ប្រធានអគ្គនាយកក្រុមហ៊ុន Forte Insurance លោក យក់ ចំរើនឫទ្ធិ បានប្រាប់ភ្នំពេញប៉ុស្តិ៍នាថ្ងៃអាទិត្យថា អាជ្ញាធរសេវាហិរញ្ញវត្ថុមិនមែនធនាគារនឹងផ្តល់អត្ថប្រយោជន៍ច្រើនដល់អ្នកនៅក្នុងវិស័យធានារ៉ាប់រង។
លោកនិយាយថា៖ «ខ្ញុំគិតថាការបង្កើតអាជ្ញាធរនេះនឹងជួយបង្កើនប្រសិទ្ធភាពការងារ ដោយសារអាជ្ញាធរជាអ្នកទទួលខុសត្រូវផ្ទាល់។ អ.ស.ហ នឹងជួយការពារផលប្រយោជន៍ទាំងសាធារណជនដែលជាអតិថិជន និងក្រុមហ៊ុនធានារ៉ាប់រងផងដែរ»។
លោកបន្តថា អ.ស.ហ នឹងជួយគាំទ្រដល់វិស័យធានារ៉ាប់រងនៅកម្ពុជាដែលវិស័យនេះនឹងដើរតួនាទីសំខាន់នៅក្នុងផលិតផលក្នុងស្រុកសរុប (GDP) របស់កម្ពុជានាពេលអនាគត។
លោកប្រាប់ថា៖ «យើងឃើញថា នាពេលកន្លងមក ផលប្រយោជន៍របស់សាធារណជនហាក់មិនត្រូវបានយកចិត្តទុកដាក់ អ៊ីចឹងនៅពេលមានអាជ្ញាធរនេះ ផលប្រយោជន៍អ្នកប្រើប្រាស់នឹងត្រូវបានគិតគូរជាងមុន»។
លោក គីម ហ៊ាង ប្រធានក្រុមហ៊ុនអចលនទ្រព្យ KW Cambodia និងជាម្ចាស់គម្រោង បុរី ខេអេស រ៉េស៊ីដេន បានស្វាគមន៍ និងគាំទ្រដល់ការបង្កើតអាជ្ញាធរសេវាហិរញ្ញវត្ថុមិនមែនធនាគារ ដែលវានឹងជួយឱ្យវិស័យអចលនទ្រព្យកាន់តែមានភាពរឹងមាំ ប៉ុន្តែអង្គភាពត្រូវតែមានអំណាច និងបុគ្គលិកគ្រប់គ្រាន់ដើម្បីបម្រើឱ្យវិស័យនេះ។
លោកប្រាប់ថា៖ «បើពិនិត្យមើលផ្លូវច្បាប់ នៅពេលរដ្ឋលូកដៃកាន់តែច្រើនវានឹងកាន់តែធ្វើឱ្យវិស័យនេះរឹងមាំ។ នៅពេលច្បាប់រឹងមាំ អ្នករកស៊ីនឹងគោរពច្បាប់ ហើយការប្រកួតប្រជែងក៏នឹងមានតម្លាភាព។ ដូចនេះខ្ញុំគាំទ្រ»។
លោកបន្តថា ទន្ទឹមនឹងទិដ្ឋភាពផ្លូវច្បាប់ល្អ ការអនុវត្តជាក់ស្តែងលោកក៏ឃើញថា នឹងមានអង្គភាពកាន់តែច្រើនដែលធ្វើឱ្យអ្នករកស៊ីចំណាយកាន់តែច្រើនដែរ។ លោកនិយាយថា៖ «បើអង្គភាពនេះមានកណ្តាប់ដៃដែក អ្នករកស៊ីទាំងអស់ត្រូវតែស្ថិតក្រោមច្បាប់ ពេលនោះអ្នកគោរពច្បាប់នឹងទទួលបានផលប្រយោជន៍ ប៉ុន្តែបើមានតែអង្គភាពអត់មានអំណាច និងមិនមានមនុស្សធ្វើការគ្រប់គ្រាន់ ពេលនោះការគ្រប់គ្រងនឹងធូររលុងដដែល»។
អនុក្រឹត្យខាងលើឱ្យដឹងទៀតថា លេខាធិការដ្ឋាន អ.ស.ហ មានតួនាទីមួយចំនួនដូចជា ផ្តល់ការគាំទ្រដល់កិច្ចដំណើរការ អ.ស.ហ, សម្របសម្រួលរៀបចំ និងអនុវត្តគោលនយោបាយ និងយុទ្ធសាស្ត្រអភិវឌ្ឍន៍វិស័យហិរញ្ញវត្ថុមិនមែនធនាគារ, បញ្ហាបច្ចេកទេសហិរញ្ញវត្ថុ, រៀបចំយុទ្ធសាស្ត្រ និងផែនការសកម្មភាពសម្រាប់អនុវត្តគោលនយោបាយអភិវឌ្ឍន៍វិស័យហិរញ្ញវត្ថុមិនមែនធនាគារ, តាមដាន និងវាយតម្លៃលើប្រសិទ្ធភាពនៃការអនុវត្ត, ជួយសម្របសម្រួលការសុំការអនុម័តបទប្បញ្ញត្តិ វិធាន និងនីតិវិធីចាំបាច់ការគ្រប់គ្រងវិស័យហិរញ្ញមិនមែនធនាគារ និងតាមដាន វាយតម្លៃលើប្រសិទ្ធភាពការអនុវត្ត ជាដើម៕ LA