ភ្នំពេញៈ ក្រុមហ៊ុន ឌីប៊ីឌី អ៊ីនជីនារីង ម.ក (DBD Engineering & Construction) នឹងធ្វើការបោះផ្សាយមូលបត្រកម្មសិទ្ធិរបស់ខ្លួនលើទីផ្សារកំណើននៃផ្សារមូលបត្រកម្ពុជា (CSX) ចំនួនជាង ៦,៤ លានភាគហ៊ុនក្នុងការកៀរគរទុនពីសាធារណជនប្រមាណ ៣ លានដុល្លារដើម្បីពង្រីកអាជីវកម្ម។ ក្រុមហ៊ុននេះនឹងក្លាយជាក្រុមហ៊ុនទី១ ដែលបោះផ្សាយលើទីផ្សារកំណើននៃ CSX ដែលបានដាក់ដំណើរការតាំងពីឆ្នាំ ២០១៥។
លោក នាង វិធី នាយកគ្រប់គ្រងក្រុមហ៊ុន DBD នៅក្នុងកម្មវិធីរ៉ូដសូនៃការបោះផ្សាយលក់មូលបត្រកម្មសិទ្ធិលើកដំបូងជាសាធារណៈ (IPO) ដែលធ្វើឡើងតាមប្រព័ន្ធអនឡាញកាលពីថ្ងៃទី ១៩ ខែកក្កដា និយាយថា ក្រុមហ៊ុន ឌីប៊ីឌី ត្រូវបានបង្កើតឡើងក្នុងឆ្នាំ ១៩៩៥ ជាក្រុមហ៊ុនផ្តល់សេវាកម្មទឹកភ្លើង ម៉ាស៊ីនត្រជាក់ដល់មន្ទីរពេទ្យ និងគេហដ្ឋាន ដោយបច្ចុប្បន្នក្រុមហ៊ុនទទួលបានការគាំទ្រកាន់តែច្រើនពីសាធារណជន។
លោកបន្តថា ក្រុមហ៊ុនបានទទួលការអនុញ្ញាតពីនិយតករមូលបត្រកម្ពុជាក្នុងការបោះផ្សាយលក់មូលបត្រកម្មសិទ្ធិលើកដំបូងជាសាធារណៈនៅថ្ងៃទី ២៤ ខែ មិថុនា ឆ្នាំ ២០២១។
ក្រុមហ៊ុន ឌីប៊ីឌី នឹងក្លាយជាក្រុមហ៊ុនដំបូងគេដែលចុះបញ្ជីក្នុងទីផ្សារកំណើននៃផ្សារមូលបត្រកម្ពុជា បន្ទាប់ពីទទួលបានជយលាភីក្នុងកម្មវិធីឧត្តមភាពលើកទី ១ ដែលបានរៀបចំឡើងដោយនិយតករមូលបត្រកម្ពុជាកាលពីឆ្នាំ ២០១៨។ ក្រុមហ៊ុនឌីប៊ីឌី និងក្រុមហ៊ុន SBI បានចាប់ផ្តើមរៀបចំការងារពាក់ព័ន្ធតាំងពីត្រីមាសទី ៤ នៃឆ្នាំ ២០១៨ មកម្ល៉េះ។
លោកនិយាយថា៖ «ខ្ញុំសង្ឃឹមថា ក្រុមហ៊ុន DBD នឹងទទួលបានការគាំទ្រពីវិនិយោគិនដែលអនុញ្ញាតឱ្យក្រុមហ៊ុនឈានជំហានជោគជ័យក្នុងផ្សារមូលបត្រកម្ពុជា និងពង្រីកសក្តានុពលអាជីវកម្មខ្លួនបន្ថែមទៀត»។
លោកបន្ថែមថា DBD នឹងចាប់ផ្តើមលក់ចាប់ពីថ្ងៃទី ២៦ ខែកក្កដា ដល់ថ្ងៃទី ១៨ ខែសីហា។
លោក ស៊ូ សុជាតិ អគ្គនាយកនៃនិយតករមូលបត្រកម្ពុជាបានឱ្យដឹងថា ជាមួយកិច្ចខិតខំប្រឹងប្រែងរបស់ក្រុមហ៊ុនក្នុងការជម្នះរាល់ឧបសគ្គនានាដើម្បីទទួលបានជោគជ័យលើការបោះផ្សារមូលបត្រកម្មសិទ្ធិនាពេលនេះ គឺជាសក្ខីកម្មមួយដែលក្រុមហ៊ុននឹងទទួលបានការចុះបញ្ជីលើ CSX នាពេលដ៏ខ្លីខាងមុខ។
លោកថ្លែងថា៖ «DBD គឺជាក្រុមហ៊ុនទី១ ដែលនឹងចូលទីផ្សារកំណើនចំពេលដែលប្រទេសយើង និងបណ្តាប្រទេសនានាកំពុងប្រយុទ្ធប្រឆាំងនឹងការរីករាលដាលជំងឺកូវីដ ១៩ ដូច្នេះការបន្តទៅមុខរបស់ក្រុមហ៊ុន DBD ក្នុងការចុះបញ្ជីនៅក្នុងផ្សារមូលបត្រកម្ពុជានៃទីផ្សារកំណើន គឺជាឆន្ទៈដ៏មុតស្រួចដែលយើងខ្ញុំជាថ្នាក់ដឹកនាំនិយតករមូលបត្រកម្ពុជា និងផ្សារមូលបត្រកម្ពុជាពិតជាស្វាគមន៍ និងអបអរសាទរសម្រាប់កម្មវិធីរ៉ូដសូ ថ្ងៃនេះ»។
លោក ហុង សុខហួរ អគ្គនាយកផ្សារមូលបត្រកម្ពុជា (CSX) លើកឡើងថា គិតដល់ថ្ងៃទី ១៩ ខែកក្កដានេះ CSX មានក្រុមហ៊ុនចុះបញ្ជីចំនួន ១៣ ដែលរួមមានក្រុមហ៊ុន ៧ បានចុះបញ្ជីជាភាគហ៊ុន និង ៦ ទៀតបានចុះបញ្ជីជាសញ្ញាបណ្ណ។
ក្រុមហ៊ុនទាំង ១៣ នេះបានប្រមូលទុនពីទីផ្សារសរុបប្រមាណជាង ២៥៣ លានដុល្លារ ហើយក្រុមហ៊ុនទាំងនេះមិនត្រឹមតែមានលទ្ធភាពទទួលបាននូវប្រភពទុនដែលមានថ្លៃដើមទាប និងជាប្រភពទុនរយៈពេលវែងប៉ុណ្ណោះទេ ថែមទាំងទទួលបានការលើកទឹកចិត្តពន្ធដារពីរដ្ឋាភិបាល ទទួលបានការកើនឡើងនូវកិត្តិនាមលើទីផ្សារជាតិ និងអន្តរជាតិ និងជាពិសេសទទួលបាននូវទំនុកចិត្តបន្ថែមពីសាធារណជន និងវិនិយោគិន។
លោកអះអាងថា៖ «ខ្ញុំសង្ឃឹមថាជាមួយវត្តមានថ្មីរបស់ DBD ដែលរំពឹងថានឹងអាចចុះបញ្ជីបានក្នុងពេលឆាប់ៗនេះ នឹងធ្វើជាគំរូល្អមួយសម្រាប់សហគ្រាសខ្នាតតូច និងមធ្យមដែលមានសក្តានុពល ពិចារណាធ្វើពិពិធកម្មប្រភពទុនតាមរយៈផ្សារហ៊ុន។ ការណ៍នេះបញ្ជាក់ថា ទីផ្សារហ៊ុនមិនសម្រាប់តែក្រុមហ៊ុនធំៗប៉ុណ្ណោះទេ ប៉ុន្តែក៏ជួយគាំទ្រដល់សហគ្រាសខ្នាតតូច និងមធ្យមផងដែរ»៕ LA