The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ពន្ធដារ​ក្នុង​ឆមាស​ទី១ ធ្លាក់​ជាង​ ១០%




ចំណូល​ពន្ធដារ​ក្នុង​ឆមាស​ទី១ ធ្លាក់​ជាង​ ១០%

Content image - Phnom Penh Post
ស្នាក់ការអគ្គនាយកដ្ឋាន​ពន្ធដារ​ (GDT)។ ហេង ជីវ័ន

ចំណូល​ពន្ធដារ​ក្នុង​ឆមាស​ទី១ ធ្លាក់​ជាង​ ១០%

ភ្នំពេញៈ អគ្គនាយកដ្ឋាន​ពន្ធដារ​ (GDT) ប្រមូល​ពន្ធអាករ​បាន ១ ៥១៥,៩០ ​លាន​ដុល្លារ​នៅក្នុង​ឆមាស​ទី​១ ឆ្នាំ​ ២០២១ ធ្លាក់ចុះ ១០,៦០ ​ភាគរយ​ធៀប​នឹង​រយៈពេល​ដូចគ្នា​ឆ្នាំមុន​។ នេះ​បើតាម​សេចក្តី​ប្រកាស​ព័ត៌មាន​របស់ GDT​។

សេចក្តី​ប្រកាស​ព័ត៌មាន​បានឱ្យដឹងថា ការប្រមូល​ចំណូល​ពន្ធអាករ​ក្នុង​ឆមាស​ទី​១ ស្មើនឹង ៦៧,៥៨ ​ភាគរយ​នៃ​ផែនការ​ច្បាប់​ហិរញ្ញវត្ថុ​សម្រាប់​ការគ្រប់គ្រង​ឆ្នាំ​ ២០២១​។ សម្រាប់​ខែមិថុនា ឆ្នាំនេះ ចំណូល​ពន្ធអាករ​គ្រប់​ប្រភេទ​ដែល​អគ្គនាយកដ្ឋាន​ពន្ធដារ​ប្រមូលបាន​តាម​ប្រព័ន្ធគ្រប់គ្រង​ទិន្នន័យ​ចំណូល​អនឡាញ​មាន​ចំនួន ១៦៧,៦១ ​លាន​ដុល្លារ ​ស្មើនឹង​ ៧,៤៧ ភាគរយ​នៃ​ផែនការ​។

បើ​គិត​ត្រឹម​ថ្ងៃទី​ ២០ ខែកក្កដា GDT បាន​ប្រមូល​ចំណូល​ពន្ធ អាករ​គ្រប់​ប្រភេទ​បាន​ចំនួន ១ ៥៩០,៣៨ ​លាន​ដុល្លារ ក្នុងនោះ​រយៈពេល​ ២០ ​ថ្ងៃខែ​កក្កដា​នេះ ប្រមូល​ចំណូល​សរុប​ចំនួន ៧៤,៣២ លាន​ដុល្លារ​។

លោក គង់ វិបុល អគ្គនាយក​នៃ​អគ្គនាយកដ្ឋាន​ពន្ធដារ​បាន​លើកឡើង​ក្នុង​សេចក្តី​ប្រកាស​ព័ត៌មាន​ថា ការបន្ត​អូសបន្លាយ​នៃ​ការរាតត្បាត​ជំងឺ​កូវីដ​ ១៩ ក្នុង​ឆ្នាំ​ ២០២០ និង​ការ​ផ្ទុះឡើង​នៃ​ព្រឹត្តិការណ៍​សហគមន៍ ២០ កុម្ភៈ​ បាន​ជះឥទ្ធិពល​ជា​អវិជ្ជមាន​មកលើ​ការប្រមូល​ចំណូល​ពន្ធអាករ​យ៉ាងខ្លាំង​។

ទោះយ៉ាងណា​លោក​បញ្ជាក់ថា ការដាក់ចេញ​វិធានការ និង​ការអនុវត្ត​តាម​ប្រព័ន្ធ​អនឡាញ ប្រព័ន្ធ​បច្ចេកវិទ្យា​ព័ត៌មាន​របស់​អគ្គនាយកដ្ឋាន​ពន្ធដារ​ត្រូវបាន​អនុវត្ត​ដោយ​បុរេសកម្ម និង​បាន​ឆ្លើយតប​ទៅនឹង​បញ្ហា​ប្រឈម និង​ការលំបាក​នានា​ក្នុង​បរិបទ​នៃ​ជំងឺ​កូវីដ​ ១៩ ដែល​បាន​ឆ្លុះបញ្ចាំង​តាមរយៈ​លទ្ធផល​ប្រមូល​ចំណូល​ក្នុង​ឆមាស​ទី​១ សម្រេចបាន​រហូតដល់ ៦៧,៥៨ ​ភាគរយ​នៃ​ផែនការ​។

លោក លឹម ហេង អនុប្រធាន​សភាពាណិជ្ជកម្ម​កម្ពុជា​ប្រាប់​ ភ្នំពេញ ​ប៉ុស្តិ៍​ថា ក្នុង​បរិបទ​កូវីដ ១៩ ប្រមុខ​រដ្ឋាភិបាល​បានដាក់​ចេញ​នូវ​វិធានការ​ជា​បន្តបន្ទាប់​ ដើម្បី​ជួយ​កាត់បន្ថយ​បន្ទុក​ដល់​វិស័យ​ដែល​រង​ផលប៉ះពាល់​។

ទោះបីយ៉ាងណា​លោក​ប្រាប់ថា​៖ «​យើង​មាន​ការបារម្ភ​បើ​ជំងឺ​កូវីដ​ ១៩ នៅតែ​បន្ត​អូសបន្លាយ​វា​នឹង​ធ្វើឱ្យប៉ះពាល់​ចំណូល​ថវិកាជាតិ​។ ខ្ញុំ​សង្ឃឹមថា យុទ្ធសាស្ត្រ​ចាក់​វ៉ាក់សាំង​ជំងឺ​កូវីដ ១៩ នៅតាម​រាជធានី-ខេត្ត នឹង​ជួយ​ទប់ស្កាត់ ឬក៏​កាត់បន្ថយ​ការរីករាលដាល​ជំងឺ​កូវីដ​ ១៩ ហើយ​អាច​ដំណើរការ​វិស័យ​ផ្សេងៗ​ឡើងវិញ​»៕ LA

អត្ថបទគួរចាប់អារម្មណ៍