.jpg)
បុគ្គលិករបស់ក្រុមហ៊ុន Unilever ដើរកាត់ស្លាកយីហោរបស់ក្រុមហ៊ុននៅទីស្នាក់ការកណ្តាលនីទីក្រុង Rotterdam។ រូបភាព :AFP
ទីក្រុងឡុងដ៍: Unilever ជាក្រុមហ៊ុនទំនិញប្រើប្រាស់របស់ចក្រភពអង់គ្លេស កាលពីថ្ងៃព្រហស្បតិ៍បានប្រកាសការធ្លាក់ចុះប្រាក់ចំណេញសុទ្ធឆមាសទី ១ ដោយសារតែតម្លៃកើនឡើង។
ក្រុមហ៊ុន Unilever បានឲ្យដឹងនៅក្នុងសេចក្ដីប្រកាសព័ត៌មានមួយថា ប្រាក់ចំណេញបន្ទាប់ពីបង់ពន្ធរួចបានធ្លាក់ចុះ ៥ ភាគរយមកនៅត្រឹម ៣,១២ ពាន់លានអឺរ៉ូ (៣,៦៨ ពាន់លានដុល្លារ) នៅរយៈពេល ៦ ខែដំបូងឆ្នាំនេះ ធៀបនឹងរយៈពេលដូចគ្នាកាលពីឆ្នាំ ២០២០។
ប្រាក់ចំណូលបានធ្លាក់ចុះប្រហែល ២៦ ពាន់លានអឺរ៉ូ សម្រាប់ក្រុមហ៊ុនផលិតអាហារមួយនេះ ផលិតផលសម្អាត និងផលិតផលសម្រស់ ដែលរួមមាន ការ៉េម Magnum សាប៊ូលាងមុខ Cif និង Dove ។
ក្រុមហ៊ុន Unilever ត្រូវរងផលប៉ះពាល់ដោយការចរាចរណ៍អត្រាប្តូរប្រាក់ បន្ថែមលើការកើនឡើងអតិផរណា ខណៈដែលសេដ្ឋកិច្ចដែលខ្ទេចខ្ទាំដោយវីរុសងើបចេញពីការបិទខ្ទប់។
លោក Alan Jope ប្រធានប្រតិបត្តិបានកត់សម្គាល់ថា៖ «យើងបានមើលឃើញអតិផរណាកើនឡើងបន្ថែមទៀតនៅត្រីមាសទី ២»។
ក្រុមហ៊ុនដែលទទួលបានចំណាប់អារម្មណ៍យ៉ាងខ្លាំងលើផលិតផលសម្អាតដៃ និងផលិតផលសម្អាតផ្ទះកាលពីឆ្នាំមុន ដោយសារតែការរីករាលដាលវីរុសកូរ៉ូណាបានឲ្យដឹងថា ខ្លួនបានបន្តរងផលប៉ះពាល់ ដោយសារតែការរីករាលដាលវីរុសនេះ។
ក្រុមហ៊ុន Unilever បានបន្ថែមនៅក្នុងសេចក្ដីប្រកាសព័ត៌មាននេះថា៖ «បរិយាកាសប្រតិបត្តិការនៅទូទាំងទីផ្សាររបស់យើងបានមើលឃើញការកើនឡើងមួយចំនួន ប៉ុន្តែនៅតែមានការប្រែប្រួល»។
ការធ្វើបច្ចុប្បន្នភាពធ្វើឡើង បន្ទាប់ពីលោក Naftali Bennett នាយករដ្ឋមន្ដ្រីប្រទេសអ៊ីស្រាអែលនៅសប្ដាហ៍នេះបានព្រមានក្រុមហ៊ុន Unilever ថា ការសម្រេចចិត្តរបស់ Ben & Jerry''s ជាក្រុមហ៊ុនបុត្រសម្ព័ន្ធរបស់ខ្លួនក្នុងការបញ្ឈប់ការលក់ការ៉េមនៅក្នុងទឹកដីប៉ាឡេស្ទីនកាន់កាប់នឹង «មានផលវិបាកធ្ងន់ធ្ងរ» ជាមិនខាន។
ក្រុមហ៊ុន Ben & Jerry''s កាលពីថ្ងៃចន្ទបានឲ្យដឹងថា ការលក់ការ៉េមនៅក្នុងទឹកដីប៉ាឡេស្ទីនដែលកាន់កាប់ដោយអ៊ីស្រាអែលគឺ «មិនស្របគ្នាជាមួយនឹងតម្លៃរបស់យើងនោះទេ» ទោះបីជាក្រុមហ៊ុនមួយនេះបានឲ្យដឹងថា ខ្លួនបានគ្រោងនឹងបន្តការលក់ផលិតផលរបស់ខ្លួននៅក្នុងប្រទេសអ៊ីស្រាអែលក៏ដោយ។
ក្រុមហ៊ុន Unilever បានក្លាយជាក្រុមហ៊ុនចក្រអង់គ្លេសទាំងស្រុងកាលពីចុងឆ្នាំមុន បន្ទាប់ពីក្រុមហ៊ុនមួយនេះបានបញ្ចប់ការច្របាច់បញ្ចូលគ្នាជាប្រវត្តិសាស្ដ្រនៃក្រុមហ៊ុនសាជីវកម្មរបស់ប្រទេសហូឡង់ និងអង់គ្លេសរបស់ខ្លួន៕ LA
