ភ្នំពេញៈ ប្រទេសរុស្ស៉ី សន្យានឹងបង្កើនកិច្ចសហការនៅក្នុងវិស័យទេសចរណ៍ជាមួយប្រទេសកម្ពុជាឱ្យកាន់តែខ្លាំង តាមរយៈការជំរុញភ្ញៀវទេសចរពីប្រទេសខ្លួនឱ្យមកទស្សនាប្រទេសកម្ពុជាបានកាន់តែច្រើន ពិសេសក្នុងដំណាក់កាលដែលកម្ពុជាគ្រោងនឹងបើកទទួលយក «ទេសចរអន្តរជាតិដែលចាក់វ៉ាក់សាំង» បន្ទាប់ពីស្ថានភាពកូវីដ១៩ បានធូរស្រាល។
ការបញ្ជាក់នេះធ្វើឡើងក្នុងកិច្ចប្រជុំអនឡាញរវាង លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍កម្ពុជា ជាមួយ លោក Demyan Smilevets ប្រធានផ្នែកសហប្រតិបត្តិការអន្តរជាតិនៃទីភ្នាក់ងារទេសចរណ៍សហព័ន្ធរុស្ស៉ី កាលពីរសៀលថ្ងៃទី២២ ខែកក្កដា ឆ្នាំ ២០២១។
លោក ទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាន នៃក្រសួងទេសចរណ៍កម្ពុជា បានប្រាប់ឱ្យដឹងថា លោក Demyan Smilevets បានទទួលយកសំណើររបស់ភាគីកម្ពុជាក្នុងការពង្រីកកិច្ចសហប្រតិបត្តិការទេសចរណ៍រវាងប្រទេសទាំងពីរ ជាពិសេសក្នុងដំណាក់កាលដែលកម្ពុជានឹងបើកទទួលយក «ទេសចរអន្តរជាតិដែលចាក់វ៉ាក់សាំង» បន្ទាប់ពីស្ថានភាពកូវីដ១៩ បានធូរស្រាលនាពេលខាងមុខ។
តាមរយៈកិច្ចប្រជុំនេះភាគីទាំងពីរក៏បានពិភាក្សាលើបញ្ហាមួយចំនួន ដូចជា ការបណ្ដុះបណ្ដាលបំប៉នដល់មគ្គុទ្ទេសក៍ទេសចរណ៍និយាយភាសារុស្ស៉ី, ការរៀបចំកិច្ចប្រជុំផ្សព្វផ្សាយ Road show តាមប្រព័ន្ធអនឡាញ ដោយមានការចូលរួមផ្ទាល់របស់ក្រុមហ៊ុនទេសចរណ៍រុស្ស៉ី, ការរៀបចំទស្សនកិច្ចសិក្សាផ្សព្វផ្សាយ ពិសេសលើគោលដៅទេសចរណ៍នៅកម្ពុជាពីក្រុមហ៊ុនទេសចរណ៍ និងសារព័ត៌មាន (Tailormade Farm Trip), ការគាំទ្ររបស់រុស្ស៉ីដល់ការអនុវត្ត «ផែនទីចង្អុលផ្លូវស្ដីពីផែនការស្ដារលើកស្ទួយ និងស្ដារវិស័យទេសចរណ៍កម្ពុជា ក្នុងនិងក្រោយវិបត្តិកូវីដ១៩, ការសហការជំរុញការហោះហើរត្រង់រវាង កម្ពុជា-រុស្ស៉ី និងគំនិតផ្ដួចផ្ដើមរៀបចំឱ្យមានមជ្ឈមណ្ឌលទេសចរណ៍ អាស៊ាន-រុស្ស៉ី ជាដើម។
យោងតាមក្រសួងទេសចរណ៍ មុនពេលមានវិបត្តិជំងឺកូវីដ១៩ ចំនួនភ្ញៀវទេសចររុស្ស៉ីមកទស្សនានៅកម្ពុជា មានកំណើនគួរឱ្យកត់សម្គាល់ ជាពិសេសតំបន់ឆ្នេរសមុទ្រកម្ពុជា ដែលជាគោលដៅប្រកបដោយភាពទាក់ទាញសម្រាប់ទេសចររុស្ស៉ី។
កាលពីឆ្នាំ ២០២០ ភ្ញៀវរុស្ស៊ីធ្វើដំណើរមកកម្ពុជា មានចំនួន ២១ ៨៣៤នាក់ ដោយឡែកក្នុងរយៈពេល ៥ខែដើមឆ្នាំ ២០២១ នេះ គឺមានត្រឹមតែ ៤៣នាក់ប៉ុណ្ណោះ។ នេះបើតាមទិន្នន័យពីក្រសួងទេសចរណ៍៕