ភ្នំពេញៈ ក្រសួងទេសចរណ៍បានក្រើនរំឭកដល់អ្នកគ្រប់គ្រង ឬប្រធានសហគមន៍នៅតាមតំបន់ទេសចរណ៍ផ្សងព្រេង ត្រូវរៀបចំឱ្យមានការគ្រប់គ្រងចរន្តភ្ញៀវទេសចរ ជាពិសេសការធ្វើសម្រង់ព័ត៌មានភ្ញៀវទេសចរឱ្យបានច្បាស់លាស់មុននឹងឱ្យភ្ញៀវទេសចរចូលទៅតំបន់ផ្សងព្រេងរបស់ខ្លួន។
ក្រសួងទេសចរណ៍ឱ្យដឹងថា ក្នុងដំណាក់កាលដ៏លំបាកនៃវិបត្តិជំងឺកូវីដ ១៩ ចលនាទេសចរណ៍ផ្ទៃក្នុងទៅកាន់តំបន់អេកូទេសចរណ៍ សហគមន៍ទេសចរណ៍ និងតំបន់ទេសចរណ៍ផ្សងព្រេងមានសម្ទុះកើនឡើងយ៉ាងខ្លាំងដែលបានជួយបង្កើតប្រាក់ចំណូលដោយផ្ទាល់ទៅប្រជាជនក្នុងសហគមន៍ និងបានធ្វើឱ្យអនុវិស័យទាំងនេះមានភាពធន់នឹងវិបត្តិ (Resilient) ក្នុងការរួមចំណែកទ្រទ្រង់ដល់វិស័យទេសចរណ៍នៅកម្ពុជា។
ក្រសួងក៏បានក្រើនរំឭកឱ្យភ្ញៀវទេសចរ ផ្នែកឯកជន និងគណៈគ្រប់គ្រងតំបន់យកចិត្តទុកដាក់ចូលរួមអនុវត្តស្តង់ដាទេសចរណ៍ផ្សងព្រេង ដែលក្រសួងទេសចរណ៍បានដាក់ឱ្យអនុវត្តកាលពីឆ្នាំ ២០១៥ ដើម្បីជំរុញការរៀបចំតំបន់ទេសចរណ៍ផ្សងព្រេងនានាឱ្យគោរពតាមស្តង់ដា ធានាបាននូវសន្តិសុខ សុវត្ថិភាពជូនភ្ញៀវទេសចរ។
ក្រសួងបញ្ជាក់ថា៖ «ក្នុងន័យនេះ តំបន់ទេសចរណ៍ផ្សងព្រេងទាំងអស់ត្រូវរៀបចំឱ្យមានការគ្រប់គ្រងចរន្តទេសចរ ពិសេសការធ្វើសម្រង់ព័ត៌មានភ្ញៀវទេសចរឱ្យបានច្បាស់លាស់ មុននឹងចាប់ផ្តើមចូលទៅតំបន់ផ្សងព្រេង ហើយអ្នកគ្រប់គ្រងតំបន់ក៏ត្រូវត្រួតពិនិត្យ និងណែនាំដល់ភ្ញៀវទេសចរឱ្យគោរពទៅតាមបទប្បញ្ញត្តិ និងបម្រាមនានា ដែលត្រូវបានកំណត់ក្នុងតំបន់នីមួយៗ ព្រមទាំងពង្រឹងការអនុវត្តវិធានសុវត្ថិភាពទេសចរណ៍ក្នុងការទប់ស្កាត់ការរីករាលដាលនៃជំងឺកូវីដ ១៩ ពិសេសការអនុវត្តវិធានការ ៣ កុំ និង ៣ ការពារ»។
ក្រសួងឱ្យដឹងទៀតថា ទន្ទឹមនឹងនេះត្រូវរៀបចំឱ្យបានសមរម្យនូវបន្ទប់ទឹក និងបង្គន់អនាម័យដែលមានទំហំសមស្របដែលអាចមានលទ្ធភាពរៀបចំបាន ដើម្បីធានាសោភណភាព និងកាត់បន្ថយផលប៉ះពាល់ទៅលើបរិស្ថាន និងដំណើរកម្សាន្តរបស់ភ្ញៀវ ព្រមទាំងរំឭកឱ្យភ្ញៀវទេសចរចូលរួមថែរក្សាបរិស្ថាន និងអភិរក្សធនធានធម្មជាតិប្រកបដោយនិរន្តរភាព។
លោក ហុង វណ្ណថេត ស្ថាបនិកនៃ 12GoAdventure (ចង់ទៅដើរព្រៃ) ដែលជាសហគមន៍អេកូទេសចរណ៍ជាមួយនឹងបេសកកម្ម ដើម្បីលើកកម្ពស់ទេសចរណ៍ក្នុងស្រុកនៅក្នុងសហគមន៍ដាច់ស្រយាលនៅទូទាំងប្រទេសកម្ពុជា បានឱ្យដឹងថា សហគមន៍អេកូទេសចរណ៍របស់លោកតែងគោរពតាមការណែនាំរបស់ក្រសួងក្នុងការរៀបចំដំណើរផ្សងព្រេងទៅតំបន់អេកូទេសចរណ៍នានា។
លោកសម្គាល់ថា ប្រជាជនខ្មែរហាក់ចាប់អារម្មណ៍ច្រើននៃការធ្វើទេសចរណ៍ផ្សងព្រេងទៅសហគមន៍អេកូទេសចរណ៍ធម្មជាតិនាពេលនេះ។
លោកប្រាប់ថា៖ «អ្នកដែលចូលរួមដំណើរផ្សងព្រេងទាំងអស់ ទាល់តែចាក់វ៉ាក់សាំងការពារវីរុសកូវីដ ១៩ រួចរាល់ ទើបយើងអនុញ្ញាតឱ្យចូលរួមការផ្សងព្រេងនេះ ចំពោះអ្នកអត់បានចាក់ពួកខ្ញុំអត់យកទេ»។
បើតាមក្រសួងទេសចរណ៍ តំបន់ទេសចរណ៍ផ្សងព្រេងសំខាន់ៗរួមមាន តំបន់ខ្នងផ្សារ ភ្នំឱរ៉ាល់ គិរីរម្យ តំបន់ជីផាត អារ៉ែង ពាមក្រសោប ស្រែអំបិល វាលធំ សំឡូត ភ្នំត្បែង សមុទ្រឈើ តំបន់រាមសា បឹងទន្លេសាប ភ្នំគូលែន និងតំបន់ទេសចរណ៍ផ្សងព្រេងជាច្រើន គឺសុទ្ធតែទទួលបានកំណើនភ្ញៀវទេសចរផ្ទៃក្នុងគួរឱ្យកត់សម្គាល់ក្នុងអំឡុងវិបត្តិកូវីដ ១៩ ក្នុងឆ្នាំ ២០២០ និង ២០២១ នេះ។
ក្រសួងបញ្ជាក់ថា ស្តង់ដាទេសចរណ៍ផ្សងព្រេងនេះត្រូវបានបែងចែកជា ៧ សូចនាករ ដូចជា គុណភាពផ្លូវផ្សងព្រេងកម្សាន្តក្នុងព្រៃ ការផ្តល់ព័ត៌មានជូនភ្ញៀវទេសចរ ការអភិវឌ្ឍហេដ្ឋារចនាសម្ព័ន្ធទ្រទ្រង់ និងការធានាសន្តិសុខសុវត្ថិភាព ព្រមទាំងការផ្តល់សេវាកម្ម ការគ្រប់គ្រង និងការធានាផលប្រយោជន៍សង្គម និងបរិស្ថាន។
ជាមួយគ្នានេះអង្គការទេសចរណ៍ពិភពលោក ក៏បានចាត់ទុកថា អេកូទេសចរណ៍ផ្សងព្រេង រួមទាំងទេសចរណ៍ជនបទ គឺជាអនុវិស័យនៃទេសចរណ៍ពិភពលោក ដែលនៅតែមានសកម្មភាព និងដំណើរការទោះក្នុងដំណាក់កាលវិបត្តិកូវីដ-១៩ ពិសេសទ្រទ្រង់ដល់សកម្មភាពទេសចរណ៍ផ្ទៃក្នុង និងជាឧបករណ៍ដ៏មានប្រសិទ្ធភាពក្នុងការជំរុញការអភិវឌ្ឍនៅមូលដ្ឋាន។ នេះបើតាមក្រសួងទេសចរណ៍៕ LA