ភ្នំពេញៈ ក្រុមហ៊ុនទូរស័ព្ទចល័តចំនួន ២ ត្រូវបាននិយ័តករទូរគមនាគមន៍កម្ពុជា (ន. ទ. ក.) Telecommunication Regulator of Cambodia (TRC) ប្រាប់ឱ្យបញ្ឈប់ជាបន្ទាន់នូវរាល់ការរំខានដល់អ្នកប្រើប្រាស់ ដោយការហៅចូលមកលេខទូរស័ព្ទចល័តរបស់អតិថិជន ដើម្បីផ្សព្វផ្សាយពាណិជ្ជកម្មអំពីសេវាកម្មបន្ថែម (VAS) របស់ក្រុមហ៊ុន ខណៈលេខកូដទូរគមនាគមន៍ដែលក្រុមហ៊ុនកំពុងប្រើប្រាស់ មិនដែលទទួលបានការអនុញ្ញាតពី ន.ទ.ក. ឡើយ។
ក្រុមហ៊ុនទាំង ២ នោះរួមមាន ក្រុមហ៊ុន ខេម ជ្ជីអេសអេម អែលធីឌី CamGSM Ltd និងក្រុមហ៊ុន វៀតធេល (ខេមបូឌា) Viettel (Cambodia)។
លិខិតចំនួន ២ ដែលចុះហត្ថលេខាដោយលោក ថោង ចិន្តា នាយកនិយ័តករទូរគមនាគមន៍កម្ពុជាកាលពីថ្ងៃទី ២៣ ខែកក្កដា ឆ្នាំ ២០២១ ឱ្យដឹងថា ន. ទ. ក. បានរកឃើញការហៅចូលពីក្រុមហ៊ុន ខេម ជ្ជីអេសអេម អែលធីឌី ដែលមាន ២៨២៨, ៨១៩២, ៨៨៨៨, ៩១៩១, ៩២៩២ ៨៨៩៩, ៨៦៨៦, ២៦២៦, ២៩២៩ និងលេខ ៩៩៩៨ និងការហៅចូលរបស់ក្រុមហ៊ុន វៀតធេល (ខេមបូឌា) ដែលមានលេខ ៦២៣៦, ៦៦៨៨,៦១៦០, ៦៣៨៨, ១៧៧២ និង ១៤១៤ ជាអាទិ៍ដើម្បីផ្សព្វផ្សាយពាណិជ្ជកម្មអំពីសេវាកម្មបន្ថែម (VAS) នានារបស់ក្រុមហ៊ុន។
លិខិតបន្តថា សេវាដោយគ្មានការចុះឈ្មោះប្រើជាមុនដោយអតិថិជននេះជាសកម្មភាពរំខានដល់អ្នកប្រើប្រាស់ ដោយសារខុសពីឆន្ទៈរបស់ពួកគាត់ ដែលការណ៍នេះស្តែងឱ្យឃើញអំពីភាពឥតសណ្ដាប់ធ្នាប់ក្នុងវិស័យទូរគមនាគមន៍។ ម្យ៉ាងវិញទៀត លេខកូដទូរគមនាគមន៍ដែលក្រុមហ៊ុនកំពុងប្រើប្រាស់នេះ មិនដែលទទួលបានការអនុញ្ញាតពី ន.ទ.ក. ឡើយ។
លិខិតបានបន្ថែមថា៖ «ក្នុងន័យដូចបានជម្រាបជូនខាងលើ ន.ទ.ក. តម្រូវឱ្យក្រុមហ៊ុនត្រូវបញ្ឈប់ជាបន្ទាន់រាល់ការរំខាននានាដល់អ្នកប្រើប្រាស់ ដោយការហៅចូលមកលេខទូរស័ព្ទចល័តរបស់អតិថិជន ដោយសេវានេះពុំមានការចុះឈ្មោះប្រើប្រាស់ជាមុនដោយអតិថិជន និងបញ្ឈប់ជាបន្ទាន់រាល់ការប្រើប្រាស់លេខកូដទូរគមនាគមន៍ទាំងឡាយណាដែលគ្មានការអនុញ្ញាតពី ន. ទ. ក.»។
យោងតាមលិខិតរបស់ ន. ទ. ក. ក្នុងករណីក្រុមហ៊ុនទាំង ២ ខាងលើពុំព្រមអនុវត្តតាមការណែនាំ ន.ទ.ក. នឹងចាត់វិធានការយ៉ាងម៉ឺងម៉ាត់ ដោយបង្កករាល់ការស្នើសុំនានារបស់ក្រុមហ៊ុន ព្រមទាំងចាត់វិធានការស្របតាមមាត្រា ៦៩ និងមាត្រា ៧៨ នៃច្បាប់ស្តីពី ទូរគមនាគមន៍៕