ភ្នំពេញៈ ធនាគារជាតិនៃកម្ពុជា (NBC) ក្រោមជំនួយបច្ចេកទេសរបស់ធនាគារអភិវឌ្ឍន៍អាស៊ី បានប្រកាសដាក់ឱ្យដំណើរការសាកល្បងប្រព័ន្ធទិន្នន័យតាមដានម៉ាក្រូសេដ្ឋកិច្ច (Macroeconomic Surveillance Database System - MSDS) ខណៈប្រព័ន្ធនេះត្រូវរំពឹងថា នឹងប្រើសម្រាប់ការវិភាគ និងការតាមដានស្ថានភាពម៉ាក្រូសេដ្ឋកិច្ច និងហិរញ្ញវត្ថុកម្ពុជា។
ពិធីដាក់ឱ្យដំណើរការសាកល្បង MSDS បានធ្វើឡើងតាមប្រព័ន្ធអនឡាញ កាលពីថ្ងៃទី ២៣ ខែកក្កដា រវាងលោក យូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជាជាមួយនឹង លោក Anthony Gill ប្រធានបេសកកម្មរបស់ធនាគារអភិវឌ្ឍន៍អាស៊ីប្រចាំនៅកម្ពុជា។
សេចក្តីប្រកាសព័ត៌មានរបស់ NBC ឱ្យដឹងថា MSDS គឺជាប្រព័ន្ធមូលដ្ឋានទិន្នន័យអនឡាញ ដែលនឹងត្រូវប្រើប្រាស់សម្រាប់ការវិភាគ និងការតាមដានស្ថានភាពម៉ាក្រូសេដ្ឋកិច្ច និងហិរញ្ញវត្ថុ ដើម្បីគាំទ្រដល់ការរៀបចំគោលនយោបាយនានា សំដៅធានាឱ្យបាននូវស្ថិរភាពថ្លៃ និងកំណើនសេដ្ឋកិច្ចប្រកបដោយចីរភាព។ លើសពីនេះ MSDS នឹងផ្តល់លទ្ធភាពដល់អ្នកប្រើប្រាស់ក្នុងការតាមដាន និងវាយតម្លៃការវិវឌ្ឍនៃដំណើរការសេដ្ឋកិច្ច និងហិរញ្ញវត្ថុ តាមរយៈសូចនាករគន្លឹះទាំង ៧០, តារាងសូចនាករសំខាន់, ក្រាហ្វិក និងទិន្នន័យតាមវិស័យប្រមាណ ៣០០ មុខបន្ថែមទៀត ដែលត្រូវបានរៀបចំក្រោមជំនួយបច្ចេកទេសរបស់ធនាគារអភិវឌ្ឍន៍អាស៊ី និងដោយមានការគាំទ្រផ្នែកហិរញ្ញវត្ថុពីរាជរដ្ឋាភិបាលជប៉ុន។
យោងតាម NBC សូចនាករគន្លឹះ និងទិន្នន័យផ្សេងទៀត ត្រូវបានរៀបចំជាប្រចាំខែ ត្រីមាស និងឆ្នាំ ព្រមទាំងចែកចេញជា ៦ វិស័យម៉ាក្រូសេដ្ឋកិច្ចសំខាន់ៗ រួមមាន ការប្រែប្រួលសេដ្ឋកិច្ចសកល, ស្ថិរភាពម៉ាក្រូសេដ្ឋកិច្ច, វិស័យក្រៅប្រទេស, វិស័យសារពើពន្ធ, វិស័យហិរញ្ញវត្ថុ និងសូចនាករសម្រាប់ប្រៀបធៀបជាមួយប្រទេសដែលមានស្ថានភាពសេដ្ឋកិច្ចប្រហាក់ប្រហែលនឹងកម្ពុជា។
NBC បានបញ្ជាក់ថា៖ «ការដាក់ឱ្យដំណើរការសាកល្បងនូវប្រព័ន្ធទិន្នន័យតាមដានម៉ាក្រូសេដ្ឋកិច្ចនេះ គឺជាជំហានថ្មីមួយទៀតនៃដំណើរការផ្សព្វផ្សាយទិន្នន័យប្រកបដោយគុណភាព ប្រសិទ្ធភាព និងភាពទាន់ពេលវេលា ស្របតាមបេសកកម្មរបស់ធនាគារជាតិនៃកម្ពុជា»៕