ភ្នំពេញៈ ឯកអគ្គរដ្ឋទូតចិនប្រចាំនៅកម្ពុជា លោក Wang Wentian បានលើកឡើងថា កិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន-កម្ពុជាមានសុខភាពល្អ ហើយលោកប្តេជ្ញានឹងបន្តជំរុញលើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មឱ្យកាន់តែស៊ីជម្រៅ ដើម្បីផ្តល់អត្ថប្រយោជន៍ឱ្យគ្នាទៅវិញទៅមក។
ការថ្លែងនេះបានធ្វើឡើងនៅក្នុងវេទិកាកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-កម្ពុជាក្នុងថ្ងៃទី ២៣ ខែកក្កដា តាមប្រព័ន្ធអនឡាញ។
វេទិកានេះរៀបចំដោយសារព័ត៌មាន China Economic Daily និងវិទ្យាស្ថានចក្ខុវិស័យអាស៊ី (AVI) ដោយពិភាក្សាលើប្រធានបទ «ការផ្ទៀងផ្ទាត់យុទ្ធសាស្ត្រអភិវឌ្ឍន៍រវាងចិន និងកម្ពុជា ឱកាសកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន និងកម្ពុជា និងចក្ខុវិស័យកិច្ចសហប្រតិបត្តិការសេដ្ឋកិច្ចឌីជីថលចិន និងកម្ពុជា»។
លោក Wang បាននិយាយថា ចិន និងកម្ពុជា គឺជាប្រទេសជិតខាងល្អ មិត្តល្អ បងប្អូនល្អ និងជាដៃគូល្អ។ ចាប់តាំងពីឆ្នាំ ២០២០ ជំងឺកូវីដ ១៩ បានរីករាលដាលទូទាំងពិភពលោក ប៉ុន្តែកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-កម្ពុជានៅតែមានកំណើនដដែល។
លោកបន្តថា សមិទ្ធផលនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មដែលប្រទេសទាំង ២ ទទួលបាននាពេលនេះគឺដោយសារការមានជំនឿទុកចិត្តគ្នាទៅវិញទៅមក មានគំនិតសហប្រតិបត្តិការគោរពគ្នាទៅវិញទៅមក ទទួលបានអត្ថប្រយោជន៍ជោគជ័យរួម និងការពង្រីកឥតឈប់ឈរដោយផ្អែកលើមូលដ្ឋាននៃរចនាសម្ព័ន្ធសេដ្ឋកិច្ចជួយបំពេញឱ្យគ្នាទៅវិញទៅមកកម្រិតខ្ពស់។
លោកថ្លែងថា៖ «បច្ចុប្បន្នប្រទេសទាំង ២ កំពុងស្ថិតនៅក្នុងដំណាក់កាលដ៏សំខាន់នៃការអភិវឌ្ឍដែលភាគីទាំង ២ ត្រូវពង្រឹងការផ្ទៀងផ្ទាត់យុទ្ធសាស្ត្រថែមមួយកម្រិតទៀត ដើម្បីប្រើប្រាស់ឱ្យបានល្អនូវផលប្រយោជន៍គោលនយោបាយក្នុងការដើរតួនាទីពិសេសក្នុងការបំពេញចន្លោះឱ្យគ្នាទៅវិញទៅមកនៃការអនុវត្តគម្រោងកិច្ចសហប្រតិបត្តិការសំខាន់ៗ»។
ទីប្រឹក្សារាជរដ្ឋាភិបាលកម្ពុជា និងជាប្រធានក្រុមប្រឹក្សាភិបាលនៃវិទ្យាស្ថាន AVI លោក សុក ស៊ីផាន់ណា បានលើកឡើងថា រដ្ឋាភិបាលចិនបានផ្តល់វ៉ាក់សាំងកូវីដជាច្រើនដល់កម្ពុជាដែលជួយពន្លឿនការអនុវត្តគោលដៅចាក់វ៉ាក់សាំងការពារវីរុសកូវីដ ១៩ ដើម្បីស្តារសេដ្ឋកិច្ចឡើងវិញ។ នេះបង្ហាញកាន់តែច្បាស់អំពីចំណងមិត្តភាពដ៏ជ្រាលជ្រៅរវាងកម្ពុជា និងចិនក្នុងពេលដ៏ចាំបាច់។ លោកថ្លែងថា៖ «ភាគីទាំង ២ ត្រូវយកចិត្តទុកដាក់បន្ថែមទៀត និងពង្រឹងកិច្ចសហប្រតិបត្តិការសេដ្ឋកិច្ច ព្រមទាំងខិតខំរួមគ្នា ដើម្បីចៀសផុតពីផលប៉ះពាល់នៃជំងឺមួយនេះឱ្យបានឆាប់រហ័ស»។
លោក Zheng Qingdong ប្រធាន និងជានិពន្ធនាយកនៃសារព័ត៌មាន China Economic Daily បានលើកឡើងថា សមិទ្ធផលនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន និងកម្ពុជាទទួលបានយ៉ាងច្រើន។ ស្ថិតក្រោមក្របខ័ណ្ឌនៃកិច្ចសហប្រតិបត្តិការឡានឆាង-មេគង្គ កិច្ចសហប្រតិបត្តិការរវាងប្រទេសទាំង ២ តែងបោះជំហានទៅមុខយ៉ាងរលូន។
លោកនិយាយថា៖ «កិច្ចព្រមព្រៀងពាណិជ្ជកម្មសេរីរវាងចិន និងកម្ពុជា ដែលចុះហត្ថលេខាកាលពីខែតុលា ឆ្នាំ ២០២០ បានបង្ហាញឱ្យឃើញពីភាពជាដៃគូយុទ្ធសាស្ត្រគ្រប់ជ្រុងជ្រោយនៃភាគីទាំង ២ ព្រមទាំងបានកសាងសហគមន៍វាសនារួមគ្នា និងកិច្ចសហប្រតិបត្តិការខ្សែក្រវាត់ និងផ្លូវបានឈានដល់ដំណាក់កាលថ្មីមួយទៀត»។
កិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជាចិន ត្រូវបានរដ្ឋាភិបាលប្រទេសទាំង ២ រំពឹងថានឹងចូលជាធរមាននៅដើមឆ្នាំក្រោយនេះ។
ទំហំពាណិជ្ជកម្មកម្ពុជា ចិនក្នុងឆ្នាំ ២០២០ មានតម្លៃប្រមាណ ៩,៥៦ ពាន់លានដុល្លារ កើន ១,៤ ភាគរយធៀបនឹងឆ្នាំ ២០១៩។ នេះបើតាម លោក Wang Wentian៕ LA