ភ្នំពេញៈ អ្នកប្រើប្រាស់ប្រព័ន្ធទូរស័ព្ទនៅកម្ពុជាបានសាទរចំពោះចំណាត់ការរបស់និយតករទូរគមនាគមន៍កម្ពុជា (ន.ទ.ក) ដែលប្រាប់ឱ្យក្រុមហ៊ុន ខេម ជ្ជីអេសអេម អែលធីឌី CamGSM Ltd និងក្រុមហ៊ុន វៀតធេល (ខេមបូឌា) Viettel (Cambodia) បញ្ឈប់ជាបន្ទាន់រាល់ការរំខានអ្នកប្រើប្រាស់ ដោយការហៅចូលមកលេខទូរស័ព្ទចល័តរបស់អតិថិជន ដើម្បីផ្សព្វផ្សាយពាណិជ្ជកម្មអំពីសេវាកម្មបន្ថែមរបស់ក្រុមហ៊ុន ខណៈលេខកូដទូរគមនាគមន៍ដែលក្រុមហ៊ុនប្រើប្រាស់ មិនដែលទទួលបានការអនុញ្ញាតពី ន.ទ.ក។
លិខិតចំនួន ២ ដែលចុះហត្ថលេខាដោយនាយកនិយតករទូរគមនាគមន៍កម្ពុជា លោក ថោង ចិន្តា កាលពីថ្ងៃទី ២៣ ខែកក្កដា ឱ្យដឹងថា ន.ទ.ក បានរកឃើញការហៅចូលពីក្រុមហ៊ុន ខេម ជ្ជីអេសអេម អែលធីឌី ដែលមាន ២៨-២៨, ៨១៩២, ៨៨៨៨, ៩១៩១, ៩២៩២, ៨៨៩៩, ៨៦៨៦, ២៦២៦, ២៩២៩ និងលេខ ៩៩៩៨ និងការហៅចូលរបស់ក្រុមហ៊ុន វៀតធេល (ខេមបូឌា) ដែលមានលេខ ៦២៣៦, ៦៦៨៨,៦១៦០, ៦៣៨៨, ១៧៧២ និង ១៤១៤ ជាអាទិ៍ដើម្បីផ្សព្វផ្សាយពាណិជ្ជកម្មអំពីសេវាកម្មបន្ថែមនានា (VAS) របស់ក្រុមហ៊ុន។
លិខិតបន្តថា សេវាដោយគ្មានការចុះឈ្មោះប្រើជាមុនដោយអតិថិជននេះជាសកម្មភាពរំខានដល់អ្នកប្រើប្រាស់ដោយសារខុសពីឆន្ទៈរបស់ពួកគាត់ ដែលការណ៍នេះស្តែងឱ្យឃើញអំពីភាពឥតសណ្ដាប់ធ្នាប់ក្នុងវិស័យទូរគមនាគមន៍។ ម្យ៉ាងវិញទៀត លេខកូដទូរគមនាគមន៍ដែលក្រុមហ៊ុនកំពុងប្រើប្រាស់នេះ មិនដែលទទួលបាន ការអនុញ្ញាតពី ន.ទ.ក ឡើយ។
លិខិតបានបន្ថែមថា៖ «ក្នុងន័យដូចបានជម្រាបជូនខាងលើ ន.ទ.ក តម្រូវឱ្យក្រុមហ៊ុនត្រូវបញ្ឈប់ជាបន្ទាន់រាល់ការរំខាននានាដល់អ្នកប្រើប្រាស់ដោយការហៅចូលមកលេខទូរស័ព្ទចល័តរបស់អតិថិជន ដោយសេវានេះពុំមានការចុះឈ្មោះប្រើប្រាស់ជាមុនដោយអតិថិជន និងបញ្ឈប់ជាបន្ទាន់រាល់ការប្រើប្រាស់លេខកូដទូរគមនាគមន៍ទាំងឡាយណាដែលគ្មានការអនុញ្ញាតពី ន.ទ.ក»។
នៅលើគេហទំព័រ ន.ទ.ក គេឃើញមានអ្នកប្រើប្រាស់មួយចំនួនបានចូលបញ្ចេញយោបល់ (Comment) ដោយពួកគេសុទ្ធតែបង្ហាញការគាំទ្រចំពោះលិខិតរបស់ ន.ទ.ក។
គណនីដែលមានឈ្មោះថា Kelian Haaland បានឱ្យដឹងថា សូម TRC មានវិធានការទៅលើក្រុមហ៊ុន Smart ក៏ដូចជាក្រុមហ៊ុនផ្សេងទៀតចំពោះការលក់សេវាទៅឱ្យក្រុមហ៊ុនបែបអចលនទ្រព្យជាដើម ព្រោះវាហាក់ដូចជាលួចលក់ឯកជនភាពរបស់អតិថិជនតែម្ដង (ព្រោះមិនមានការជូនដំណឹង ឬសុំការអនុញ្ញាតពីអតិថិជនបន្តិចឡើយ)។
លោកសរសេរថា៖ «វាពិតជាមានការរំខានជាខ្លាំង ព្រោះលេខដែលធ្វើការហៅចូលមកនោះ គឺជាលេខទូរស័ព្ទធម្មតាដែលមិនអាចសម្គាល់បានជាលេខសម្រាប់សេវាកម្មអ្វីមួយបានឡើយ ដូច្នេះទោះចង់ ឬមិនចង់ក៏ត្រូវតែទទួលសិនដែរ ដែលពេលខ្លះទាំងកំពុងបើកបរ បរិភោគអាហារ និងរៀនសូត្រជាដើម»។
គណនីហ្វេកប៊ុកដែលមានឈ្មោះថា Rathana Phin បានសរសេរថា៖ «ខ្ញុំបានប្រើលេខទូរស័ព្ទរបស់ប្រព័ន្ធ Metfone នឹង Cellcard ដោយពួកគេបានធ្វើដូចអ៊ីចឹង (លិខិត ន.ទ.ក)។ ការផ្សាយពាណិជ្ជកម្មប្រភេទនេះគួរឱ្យធុញទ្រាន់ និងរំខានដល់កិច្ចការឯកជន និងកិច្ចការផ្ទាល់ខ្លួនរបស់អតិថិជន»។
ចំណែកគណនីដែលមានឈ្មោះថា Chanthol Sou សរសេរថា៖ «ខ្ញុំរង់ចាំពេលវេលានេះយូរហើយ ព្រោះមានការរំខានរាល់ថ្ងៃពីលេខរបស់ក្រុមហ៊ុន ៤ ខ្ទង់ទាំងនេះ។ សូមអរគុណសម្រាប់ចំណាត់ការរបស់ក្រសួង»។
យោងតាម ន.ទ.ក បច្ចុប្បន្ននៅប្រទេសកម្ពុជា មានក្រុមហ៊ុនបម្រើសេវាទូរស័ព្ទចល័ត និងអចល័តសរុបចំនួន ៧។ គិតត្រឹមខែមេសា ឆ្នាំ ២០២១ ចំនួនអ្នកប្រើប្រាស់ទូរស័ព្ទចល័តមានចំនួន ២០ ៨១៦ ៦១៦ និងអ្នកប្រើប្រាស់ទូរស័ព្ទអចល័តមាន ចំនួន ៤២ ៥៧៧៕ LA