.jpg)
ទិដ្ឋភាពកំពង់ផែក្រុងព្រះសីហនុ។ ហេង ជីវ័ន
ភ្នំពេញៈ ទេសាភិបាលធនាគារជាតិនៃកម្ពុជា (NBC) លោក ជា ចាន់តូ បានឱ្យដឹងថា ការងើបឡើងវិញនៃសេដ្ឋកិច្ចពិភពលោកនឹងផ្តល់នូវភាពអំណោយផលដល់វិស័យខាងក្រៅរបស់កម្ពុជា ជាពិសេសការនាំចេញនិងការវិនិយោគដែលនឹងគាំទ្របន្តដល់វិស័យពាក់ព័ន្ធនានា ដើម្បីជំរុញសេដ្ឋកិច្ចកម្ពុជាឱ្យសម្រេចបានកំណើនវិជ្ជមានវិញ ទោះបីវិស័យទេសចរណ៍អាចនឹងងើបឡើងនៅក្នុងរយៈពេលយូរក៏ដោយ។
ការថ្លែងបែបនេះធ្វើឡើងក្នុងសន្និបាតបូកសរុបលទ្ធផលការងារប្រចាំឆមាសទី ១ ឆ្នាំ ២០២១ របស់ NBC កាលពីថ្ងៃទី ២២ ខែកក្កដា។ លោកលើកឡើងទៀតថា ការអូសបន្លាយពេលការរីករាលដាលកូវីដ ១៩ បានបន្តគំរាមកំហែងដល់ការងើបឡើងវិញនៃសេដ្ឋកិច្ចពិភពលោក។
លោកបន្តថា បណ្តាប្រទេសនានាបានបន្តប្រើប្រាស់នយោបាយសារពើពន្ធ និងរូបិយវត្ថុវិត្ថារកម្ម (Stimulus) និងបង្កើនការចាក់វ៉ាក់សាំងទៅឱ្យប្រជាជនដើម្បីគាំទ្រសុខុមាលភាពសង្គម និងសកម្មភាពសេដ្ឋកិច្ច។ ក៏ប៉ុន្តែភាពខុសគ្នានៃលទ្ធភាពទទួលបានវ៉ាក់សាំង និងលម្ហនយោបាយវិត្ថារកម្មបានធ្វើឱ្យសេដ្ឋកិច្ចងើបឡើងខុសគ្នា ដោយប្រទេសអភិវឌ្ឍន៍រំពឹងថា នឹងងើបឡើងលឿនជាងប្រទេសកំពុងលូតលាស់ និងប្រទេសកំពុងអភិវឌ្ឍន៍។
លោកអះអាងថា៖ «សេដ្ឋកិច្ចកម្ពុជាដូចនឹងសេដ្ឋកិច្ចប្រទេសកំពុងអភិវឌ្ឍន៍នានា ក៏អាចប្រឈមនឹងរលកថ្មីនៃការរីករាលដាលកូវីដ ១៩, ការកើនឡើងនៃបំណុលសាធារណៈ និងឯកជន និងការកើនឡើងនៃវិសមភាព និងភាពក្រីក្រផងដែរ។ ក្នុងស្ថានភាពនេះ ធនាគារជាតិនៃកម្ពុជានឹងបន្តត្រៀមខ្លួនរួមចំណែកស្តារ និងជំរុញសកម្មភាពសេដ្ឋកិច្ច តាមរយៈការដាក់ចេញនូវវិធានការគាំទ្រចាំបាច់នានា ប្រកបដោយភាពប្រុងប្រយ័ត្ន សន្សឹមៗ និងអាចរំពឹងទុកបាន»។
លោកបន្ថែមថា៖ «នៅកម្ពុជារដ្ឋាភិបាលបានដាក់ចេញនូវវិធានការម៉ឺងម៉ាត់ និងទាន់ពេលវេលាដើម្បីទប់ស្កាត់ និងកាត់បន្ថយការរីករាលដាលជំងឺកូវីដ ១៩ នៅក្នុងសហគមន៍ និងអនុវត្តយុទ្ធនាការចាក់វ៉ាក់សាំងទូទាំងប្រទេសបានយ៉ាងឆាប់រហ័ស។ វិធានការជាកញ្ចប់ដែលបានដាក់ចេញជាដំណាក់កាលបានជួយកាត់បន្ថយផលប៉ះពាល់នៃវិបត្តិ និងរក្សានិរន្តរភាពអាជីវកម្ម ពិសេសបានជួយដល់ប្រជាជនក្រីក្រងាយរងគ្រោះ និងវិស័យអាទិភាព។
យោងតាមលោក ជា ចាន់តូ ស្របតាមគោលនយោបាយរបស់រដ្ឋាភិបាល ធនាគារជាតិនៃកម្ពុជាបានចូលរួមចំណែកអនុវត្តនយោបាយរូបិយវត្ថុវិត្ថារកម្ម និងការបន្ធូរបន្ថយវិធានការម៉ាក្រូប្រុងប្រយ័ត្ន ដើម្បីបំពេញសេចក្តីត្រូវការហិរញ្ញប្បទានក្នុងសេដ្ឋកិច្ច និងសម្រាលបន្ទុកដល់អតិថិជនដែលមានចំណូលធ្លាក់ចុះដោយសារវិបត្តិ តាមរយៈការបង្កើនសាច់ប្រាក់ក្នុងដៃរបស់គ្រឹះស្ថានធនាគារ និងហិរញ្ញវត្ថុ និងផ្តល់លទ្ធភាពឱ្យគ្រឹះស្ថានទាំងនោះធ្វើការរៀបចំឥណទានឡើងវិញ។
បើយោងតាមរបាយការណ៍ប្រចាំឆមាសទី ១ របស់ NBC ក្នុងឆមាសទី ១ ឆ្នាំ ២០២១ មូលនិធិរូបិយវត្ថុអន្តរជាតិបានព្យាករថា កំណើនសេដ្ឋកិច្ចពិភពលោកអាចកើនដល់ ៦ ភាគរយនៅឆ្នាំ ២០២១ ធៀបនឹង -៣,៣ ភាគរយកាលពីឆ្នាំ ២០២០ ក្នុងនោះប្រទេសអភិវឌ្ឍន៍កើនដល់ ៥,១ ភាគរយ ប្រទេសកំពុងលូតលាស់ និងកំពុងអភិវឌ្ឍន៍កើនដល់ ៦,៧ ភាគរយ។ ចំពោះអាស៊ានបូក ៥ សេដ្ឋកិច្ចរំពឹងនឹងកើនត្រឹម ៤,៩ ភាគរយដែលទាបជាងការព្យាករកាលពីដើមឆ្នាំដោយសារការប្រឈមនឹងរលកថ្មីនៃកូវីដ ១៩ ខណៈធនាគារពិភពលោកព្យាករណ៍ថា សេដ្ឋកិច្ចកម្ពុជានឹងមានកំណើនក្នុងរង្វង់ ៤ ភាគរយនៅឆ្នាំ ២០២១ នេះ ប៉ុន្តែបើក្នុងករណីប្រធានស័ក្តិ កំណើននេះនឹងធ្លាក់ក្រោម ១ ភាគរយ។
NBC បញ្ជាក់ថា៖ «ការងើបឡើងនៃប្រទេសអភិវឌ្ឍន៍ដែលជាដៃគូពាណិជ្ជកម្មរបស់កម្ពុជាបានផ្តល់ផលវិជ្ជមានដល់ការនាំចេញរបស់កម្ពុជា។ ក៏ប៉ុន្តែ ដោយសារការជួបប្រទះនឹងការរីករាលដាលជំងឺកូវីដ ១៩ ទាំងក្នុងតំបន់ និងនៅកម្ពុជា វិស័យចម្បងៗនៃសេដ្ឋកិច្ចកម្ពុជាបន្តទទួលរងការថយចុះ ជាពិសេសវិស័យទេសចរណ៍»។
របាយការណ៍ NBC ឱ្យដឹងទៀតថា ភ្ញៀវទេសចរអន្តរជាតិចូលមកកម្ពុជាបានធ្លាក់ចុះ -៨៧,៨ តម្លៃផលិតផលសរុបក្នុងវិស័យកម្មន្តសាល ថយចុះប្រមាណ -៣៧ ភាគរយ ហើយវិស័យសំណង់ក៏ថមថយផងដែរ ដោយសារតម្លៃគម្រោងសំណង់ថយចុះ -៤០,៥ ភាគរយ។ ដោយឡែកវិស័យកសិកម្មបន្តមានវឌ្ឍនភាពល្អដោយផលស្រូវរដូវប្រាំង កើនឡើង ១២ ភាគរយ។
រហូតមកដល់ពេលនេះ រដ្ឋាភិបាលកម្ពុជាបានដាក់ចេញវិធានការជុំទី ៩ ជាបន្តទៀត ដើម្បីទប់ស្កាត់ការរីករាលដាលជំងឺកូវីដ ១៩ លើវិស័យវាយនភណ្ឌ កាត់ដេរ ស្បែកជើង ផលិតផលធ្វើដំណើរ និងវិស័យទេសចរណ៍ដោយស្ថានភាពព្រឹត្តិការណ៍សហគមន៍ ២០ កុម្ភៈ នៅតែបន្តវិវឌ្ឍខ្លួនគួរឱ្យបារម្ភតាមរយៈការបំប្លែងខ្លួនថ្មី។
ទោះយ៉ាងណាជញ្ជីងទូទាត់កម្ពុជានៅបន្តទទួលបានអតិរេក ១៥៧ លានដុល្លារ ដែលគាំទ្រដោយលំហូរចូលសុទ្ធនៃគណនីហិរញ្ញវត្ថុ បើទោះបីជាឱនភាពគណនីចរន្តបន្តកើនឡើងក៏ដោយ។ ទន្ទឹមនេះ ទុនបម្រុងអន្តរជាតិបានបន្តស្ថិតក្នុងកម្រិតខ្ពស់ ២០,៨ ពាន់លានដុល្លារ ដែលអាចធានាការនាំចូលទំនិញ និងសេវាសម្រាប់គ្រាបន្ទាន់បានជាង ១០ ខែ។ នេះបើយោងតាមរបាយការណ៍ NBC៕ LA
