.jpg)
កម្ពុជា-រុស្ស៊ី ក្នុងកិច្ចប្រជុំតាមអនឡាញ កាលពីថ្ងៃទី ២២ កក្កដា។ រូបថត ក្រសួងទេសចរណ៍
ភ្នំពេញៈ កម្ពុជារំពឹងនឹងទទួលបានកំណើនភ្ញៀវទេសចររុស្ស៊ី ពិសេសក្នុងដំណាក់កាលដែលកម្ពុជាគ្រោងនឹងបើកទទួលយក «ទេសចរអន្តរជាតិដែលចាក់វ៉ាក់សាំង» បន្ទាប់ពីស្ថានភាពកូវីដ ១៩ បានធូរស្រាល។
ក្តីសុទិដ្ឋិនិយមនេះកើតឡើងបន្ទាប់ពីជំនួបប្រជុំតាមប្រព័ន្ធអនឡាញរវាង លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិនៃក្រសួងទេសចរណ៍កម្ពុជា ជាមួយនឹងលោក Demyan Smilevets ប្រធានផ្នែកសហប្រតិបត្តិការអន្តរជាតិនៃទីភ្នាក់ងារទេសចរណ៍សហព័ន្ធរុស្ស៊ី កាលពីចុងសប្តាហ៍មុន។
ទិន្នន័យពីក្រសួងទេសចរណ៍ឱ្យដឹងថា វិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យភ្ញៀវទេសចររុស្ស៊ីមកកម្ពុជាធ្លាក់ចុះយ៉ាងគំហុក ដោយក្នុងរយៈពេល ៥ ខែដំបូងឆ្នាំ ២០២១ កម្ពុជាទទួលបានភ្ញៀវរុស្ស៊ីចំនួន ៤៣ នាក់ធ្លាក់ចុះ ៩៩,៨ ភាគរយបើធៀបនឹងរយៈពេលដូចគ្នាឆ្នាំ ២០២០ ដែលមានចំនួន ២១ ៨៣៤ នាក់។
លោក ទ្រី ឈីវ ប្រធាននាយកដ្ឋានសហប្រតិបត្តិការអន្តរជាតិ និងអាស៊ាននៃក្រសួងទេសចរណ៍បានឱ្យដឹងថា លោក Demyan Smilevets បានទទួលយកសំណើរបស់កម្ពុជាក្នុងការពង្រីកកិច្ចសហប្រតិបត្តិការទេសចរណ៍រវាងប្រទេសទាំងពីរ ជាពិសេសក្នុងដំណាក់កាលដែលកម្ពុជានឹងបើកទទួលយក «ទេសចរអន្តរជាតិដែលចាក់វ៉ាក់សាំង» បន្ទាប់ពីស្ថានភាពកូវីដ ១៩ បានធូរស្រាល។
តាមរយៈកិច្ចប្រជុំនេះភាគីទាំង ២ ក៏បានពិភាក្សាលើបញ្ហាមួយចំនួនដូចជា ការបណ្ដុះបណ្ដាលបំប៉នដល់មគ្គុទ្ទេសក៍ទេសចរណ៍និយាយភាសារុស្ស៊ី, ការរៀបចំកិច្ចប្រជុំផ្សព្វផ្សាយ Road show តាមប្រព័ន្ធអនឡាញ ដោយមានការចូលរួមរបស់ក្រុមហ៊ុនទេសចរណ៍រុស្ស៊ី, ការរៀបចំទស្សនកិច្ចសិក្សាផ្សព្វផ្សាយពិសេសលើគោលដៅទេសចរណ៍នៅកម្ពុជាពីក្រុមហ៊ុនទេសចរណ៍ និងសារព័ត៌មាន ការគាំទ្ររបស់រុស្ស៊ីដល់ការអនុវត្ត «ផែនទីចង្អុលផ្លូវស្ដីពីផែនការស្ដារលើកស្ទួយ និងស្ដារវិស័យទេសចរណ៍កម្ពុជា ក្នុង និងក្រោយវិបត្តិកូវីដ ១៩,ការសហការជំរុញការហោះហើរត្រង់កម្ពុជា-រុស្ស៊ី និងគំនិតផ្ដួចផ្ដើមរៀបចំឱ្យមានមជ្ឈមណ្ឌលទេសចរណ៍អាស៊ាន-រុស្ស៊ីជាដើម។
បច្ចុប្បន្នកម្ពុជា-រុស្ស៊ី បាននិងកំពុងសិក្សាពីលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរី (FTA) ជាមួយគ្នាដើម្បីជំរុញ និងពង្រឹងកិច្ចសហប្រតិបត្តិការពាណិជ្ជកម្ម និងការវិនិយោគឱ្យមានទំហំកាន់តែធំ។
ក្នុងជំនួបជាមួយលោក Anatoly Borovik ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជា តាមរយៈប្រព័ន្ធវីដេអូកាលពីខែធ្នូ ឆ្នាំ ២០២០ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានស្នើឱ្យភាគីរុស្ស៊ីអញ្ជើញធុរជន និងវិនិយោគិនកម្ពុជាទៅចូលរួមកម្មវិធីនានារបស់សភាពាណិជ្ជកម្ម និងឧស្សាហកម្មរុស្ស៊ីនាពេលខាងមុខ ដើម្បីទទួលបាននូវកាលានុវត្តភាព ពាណិជ្ជកម្ម និងវិនិយោគផ្តល់ដោយសហព័ន្ធរុស្ស៊ី។
លោកលើកឡើងថា៖ «ក្នុងបរិការណ៍នេះ កម្ពុជាត្រូវការការវិនិយោគបន្ថែមពីសហព័ន្ធរុស្ស៊ី ពិសេសផ្នែកម៉ាស៊ីនធុនស្រាល និងមធ្យម ដើម្បីពង្រឹងវិស័យឧស្សាហកម្មកម្ពុជាសម្រាប់បង្កើនការប្រកួតប្រជែងក្នុងការនាំចេញ។ ក្នុងស្មារតីនេះ កម្ពុជាបង្ហាញបំណងសិក្សាពីលទ្ធភាពនៅក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា-រុស្សីឱ្យបានឆាប់តាមដែលអាចធ្វើបាន»។
យោងតាមក្រសួងពាណិជ្ជកម្ម ការធ្វើពាណិជ្ជកម្មទ្វេភាគីកម្ពុជា-រុស្ស៊ីក្នុងរយៈពេល ១០ ខែ ឆ្នាំ ២០២០ មានតម្លៃសរុប ៤៥,១៥ លានដុល្លារ កើន ៤,៥ ភាគរយធៀបនឹងរយៈពេលដូចគ្នាឆ្នាំ ២០១៩ ដែលមាន ៤៣,២១ លានដុល្លារ។ ក្នុងនោះការនាំចេញពីកម្ពុជាមានតម្លៃ ៣៨,៧៥ លានដុល្លារ ធ្លាក់ចុះ ៤,៥៨ ភាគរយ និងការនាំចូលមានតម្លៃ ៦,៤ លានដុល្លារកើនឡើង ១៥៥,៦ ភាគរយ៕ LA
