ភ្នំពេញៈ វិស័យឯកជននៃក្រុមការងារបច្ចេកទេសទី២ «គយឧស្សាហកម្មបម្រើការនាំចេញវិស័យមិនមែនកាត់ដេរ» បានស្នើដល់រដ្ឋាភិបាលក្នុងការជួយសម្របសម្រួលទំនិញឆ្លងកាត់ព្រំដែនដែលត្រូវបានរឹតបន្តឹងក្នុងអំឡុងពេលទប់ស្កាត់ជំងឺកូវីដ ១៩។
កិច្ចប្រជុំដែលធ្វើឡើងតាមប្រព័ន្ធអនឡាញ (Zoom) កាលពីរសៀលថ្ងៃទី ២៣ ខែកក្កដា បានដឹកនាំដោយលោក តាន់ មុនីវណ្ណ សហប្រធានក្រុមបច្ចេកទេសទី២ «គយឧស្សាហកម្មបម្រើការនាំចេញវិស័យមិនមែនកាត់ដេរ» ផ្នែកឯកជន លោក ងួន ម៉េងតិច អគ្គនាយកសភាពាណិជ្ជកម្មកម្ពុជា សមាជិកនៃសភាពាណិជ្ជកម្មកម្ពុជាតំណាងសមាគមភ័ស្តុភារកម្មកម្ពុជា តំណាងសហគ្រាស តំណាងសមាគម តំណាងសហព័ន្ធស្រូវអង្ករកម្ពុជា តំណាងក្រុមហ៊ុននាំចេញ និងក្រុមការងារបច្ចេកទេសជាច្រើនរូបទៀត។
គោលបំណងនៃកិច្ចប្រជុំនេះគឺដើម្បីពិគ្រោះពិភាក្សាទៅលើបញ្ហាប្រឈមរបស់ផ្នែកឯកជនពាក់ព័ន្ធនឹងឧស្សាហកម្មបម្រើការនាំចេញវិស័យមិនមែនកាត់ដេរដែលកំពុងជួបប្រទះ ពិសេសបញ្ហាកើតមានឡើងក្នុងបរិបទនៃជំងឺកូវីដ ១៩ ដែលកំពុងតែឆ្លងរាលដាលយ៉ាងខ្លាំងនៅកម្ពុជា។ ម្យ៉ាងទៀត ក៏ដើម្បីប្រមូលយកបញ្ហាប្រឈម កង្វល់ និងសំណូមពររួមរបស់ផ្នែកឯកជន សម្រាប់ស្នើសុំដំណោះស្រាយពីរដ្ឋាភិបាល និងស្ថាប័នពាក់ព័ន្ធ។
លោក លឹម ហេង អនុប្រធានសភាពាណិជ្ជកម្ម ប្រាប់ ភ្នំពេញ ប៉ុស្តិ៍ថា ការជួបពិភាក្សាគ្នានេះគឺដើម្បីដោះស្រាយលើការសម្របសម្រួលការនាំចេញ-នាំចូលទំនិញជាមួយនឹងអគ្គនាយកដ្ឋានគយ និងរដ្ឋាករកម្ពុជា ក្នុងអំឡុងពេលមានការរឹតបន្តឹងតាមព្រំដែនកម្ពុជា-វៀតណាម និងកម្ពុជា-ថៃ ដើម្បីទប់ស្កាត់ការរីករាលដាលជំងឺកូវីដ ១៩។
លោកប្រាប់ថា៖ «នាពេលកន្លងមក យើងបានដោះស្រាយបញ្ហាជាច្រើនដូចជាសម្រួលការនាំចេញ-ចូល ការស្តុកទំនិញនៅព្រលានយន្តហោះ និងតាមបណ្តាកំពង់ផែផ្សេងៗរបស់អគ្គនាយកដ្ឋានគយ និងរដ្ឋាករកម្ពុជា»។
លោក ស៊ិន ចន្ធី ប្រធានសមាគមភ័ស្តុភារកម្មកម្ពុជា (CLA) ដែលចូលរួមការពិភាក្សានេះបានប្រាប់ថា អង្គប្រជុំបានពិភាក្សាគ្នារកដំណោះស្រាយនៃការកកស្ទះការនាំចេញដំឡូងមីស្ងួតទៅប្រទេសថៃដោយសាររឹតបន្តឹងតាមព្រំដែនក្នុងអំឡុងពេលកូវីដ ១៩។
លោកលើកឡើងថា៖ «យើងចង់ឱ្យមានការបង្វែរដំឡូងមីមកតាមកំពង់ផែក្រុងព្រះសីហនុវិញ ប៉ុន្តែយើងកំពុងធ្វើការសិក្សាទៅលើថ្លៃដឹកជញ្ជូនដែលនឹងត្រូវចំណាយថ្លៃដើមខ្ពស់ អ៊ីចឹងយើងចង់ស្នើឱ្យកំពង់ផែជួយរៀបចំកន្លែងដាច់ដោយឡែកសម្រាប់តែទំនិញកសិផល ដើម្បីសម្រួលដល់ការនាំចេញ។ ចំពោះទំនិញអង្ករ យើងក៏ស្នើសុំឱ្យគយបញ្ចុះតម្លៃលើកដាក់ទំនិញថែមទៀតផងដែរ»។
បើក្រុមការងារណាមួយដោះស្រាយមិនរួច សភាពាណិជ្ជកម្មនឹងដាក់លិខិតទៅកាន់សហប្រធានទាំង ១៣ ក្រុមនៃយន្តការភាពជាដៃគូគយផ្នែកឯកជនដើម្បីជួយរកដំណោះស្រាយ ហើយបើបញ្ហានេះនៅតែមិនអាចដោះរួច នឹងដាក់ទៅកាន់វេទិការាជរដ្ឋាភិបាលឯកជនដែលមានលោកនាយករដ្ឋមន្ត្រី ហ៊ុន សែន ជាអ្នកសម្រេច។ នេះបើតាម លោក លឹម ហេង។
កម្ពុជាបាននាំចេញផលិតផលវិនិយោគមិនមែនកាត់ដេរក្នុងទឹកប្រាក់សរុប ១ ៨៩៩,៧ លានដុល្លារ នៅក្នុងឆមាសទី១ ឆ្នាំ ២០២១ កើន ៤៩,៩ ភាគរយធៀបទៅនឹងឆមាសទី១ ឆ្នាំ ២០២០ ដែលមានចំនួន ១ ២៦៧,២ លានដុល្លារ។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
ផលិតផលទាំងនោះមានដូចជា កង់ គ្រឿងបំណែកអេឡិចត្រូនិក គ្រឿងផ្គុំខ្សែភ្លើង គ្រឿងបន្លាស់រថយន្ត អំពូលលម្អកុងផ្លាកេ និងផលិតផលឧស្សាហកម្មផ្សេងៗទៀត៕ LA
វីដេអូ៖