.jpg)
បុរសម្នាក់ជិះម៉ូតូកាត់ពីមុខទីស្នាក់ការក្រុមហ៊ុនផ្សារមូលបត្រកម្ពុជា(CSX)។ ហុង មិនា
ភ្នំពេញៈ ទំហំទឹកប្រាក់ និងបរិមាណនៃការជួញដូរនៅផ្សារមូលបត្រកម្ពុជា (CSX) បានកើនឡើងយ៉ាងគំហុកគិតត្រឹមដំណាច់ឆមាសទី១ ឆ្នាំ ២០២១ នេះ បើទោះបីជាសកម្មភាពសេដ្ឋកិច្ចកំពុងរងផលប៉ះពាល់ដោយសារការផ្ទុះឡើងនៃព្រឹត្តិការណ៍សហគមន៍ ២០ កុម្ភៈ យ៉ាងណាក្តី។
យោងតាមតួលេខចុងក្រោយរបស់ CSX គិតត្រឹមដំណាច់ឆមាសទី១ ឆ្នាំ ២០២១ ផ្សារមូលបត្រកម្ពុជា មានក្រុមហ៊ុនចុះបញ្ជីចំនួន ១៣ ដែលរួមមានក្រុមហ៊ុនចំនួន ៧ បានចុះបញ្ជីជាភាគហ៊ុន និង ៦ ទៀតបានចុះបញ្ជីជាសញ្ញាប័ណ្ណសាជីវកម្ម។ ក្រុមហ៊ុនទាំង ១៣ នេះបានប្រមូលទុនពីទីផ្សារមូលបត្រសរុបជាង ២៣៥ លានដុល្លារ។
របាយការណ៍ដដែលឱ្យដឹងទៀតថា គិតត្រឹមដំណាច់ឆមាសទី១ ឆ្នាំ ២០២១ បរិមាណជួញដូរភាគហ៊ុនប្រចាំថ្ងៃជាមធ្យម កើនដល់ ១១១ ១២៦ ហ៊ុនក្នុង ១ ថ្ងៃ ពោលគឺកើនឡើង ១៣៥ ភាគរយបើធៀបនឹងឆ្នាំ ២០២០ ដែលមានត្រឹម ៤៧ ២៧២ ហ៊ុន។ ចំណែកទំហំជួញដូរភាគហ៊ុនប្រចាំថ្ងៃជាមធ្យមត្រឹមដំណាច់ឆមាសទី១ ឆ្នាំ ២០២១ មានចំនួន ២០១ ១៤៣ ដុល្លារ កើនឡើងប្រមាណ ៧០ ភាគរយបើធៀបទៅនឹងឆ្នាំ ២០២០ ដែលមានចំនួន ១១៨ ១៤៣ ដុល្លារ។
លោក ហុង សុហួរ អគ្គនាយកផ្សារមូលបត្រកម្ពុជា (CSX) បានឱ្យដឹងថា ជាមួយនឹងការទទួលបានសិទ្ធិចុះបញ្ជីនៅលើផ្សារមូលបត្រ ក្រុមហ៊ុនទាំងនេះមិនត្រឹមតែមានលទ្ធភាពទទួលបាននូវប្រភពទុនដែលមានតម្លៃដើមទាប និងជាទុនរយៈពេលវែងប៉ុណ្ណោះទេ ប៉ុន្តែថែមទាំងទទួលបាននូវការលើកទឹកចិត្តពន្ធដារពីរដ្ឋាភិបាល បង្កើនកិត្តិនាមរបស់ខ្លួននៅលើទីផ្សារជាតិ និងអន្តរជាតិ ព្រមទាំងទទួលបានទំនុកចិត្តខ្ពស់ពីអតិថិជន វិនិយោគិន និងសាធារណជនទៀតផង។
លោកថ្លែងថា៖ «ការមានប្រភពទុនតែ ១ ឬ ២ អាចបណ្តាលឱ្យអាជីវកម្មងាយជួបនឹងហានិភ័យ ដូចនេះខ្ញុំសូមលើកទឹកចិត្តឱ្យក្រុមហ៊ុនសក្តានុពលនានាចាប់ផ្តើមធ្វើពិពិធកម្មប្រភពទុនរបស់ខ្លួន និងចាប់យកនូវការកៀរគរទុនពីសាធារណជន តាមរយៈទីផ្សារភាគហ៊ុនដើម្បីពង្រីក និងពង្រឹងអាជីវកម្មរបស់ខ្លួនដែលសមស្របសម្រាប់បរិបទបច្ចុប្បន្ន»។
លោកបន្តថា៖ «នៅឆ្នាំ ២០២១ នេះផងដែរ ខ្ញុំរំពឹងថា ផ្សារមូលបត្រកម្ពុជានឹងទទួលស្វាគមន៍ក្រុមហ៊ុនចុះបញ្ជីថ្មីចំនួន ៤ ឬ ៥ ទៀត ដែលនឹងចុះបញ្ជីភាគហ៊ុន និង ២ ឬ ៣ ទៀតនឹងចុះបញ្ជីជាសញ្ញាប័ណ្ណ»។ នេះបើយោងតាមការបញ្ជាក់របស់លោក សុហួរ។
អគ្គនាយកនិយតករមូលបត្រកម្ពុជា លោក ស៊ូ សុជាតិ បានអះអាងថាក្នុងកាលៈទេសៈមួយដែលប្រទេសកម្ពុជា និងបណ្តាប្រទេសនានាកំពុងប្រយុទ្ធប្រឆាំងនឹងការរីករាលដាលជំងឺកូវីដ-១៩ CSX បានបង្ហាញកាលានុវត្តភាពថ្មីដោយទទួលបាននូវការចាប់អារម្មណ៍ពីសាធារណជនគួរឱ្យកត់សម្គាល់។
លោកថ្លែងថា៖ «ប្រឈមនឹងវិបត្តិជំងឺកូវីដ ១៩ ប៉ុន្តែយើងអាចចាប់យកកាលានុវត្តភាពពីភាពប្រឈមនេះ ដោយសារតែខ្ញុំទទួលបានរបាយការណ៍ជួញដូររៀងរាល់ថ្ងៃពីទីផ្សារ គឺការជួញដូររបស់យើងមិនទាន់ធ្លាក់ក្រោម ១ ពាន់លានរៀលទេ ដែលពីមុនយើងឆ្លងមិនផុតនៃទំហំការជួញដូរដល់ ១ ពាន់លានរៀលទេ ប៉ុន្តែឥឡូវនេះយើងទទួលបានលើស ១ ពាន់លានរៀលរៀងរាល់ថ្ងៃ។ ចំណែកចំនួនអ្នកចូលរួមក្នុងទីផ្សារដើមឆ្នាំត្រឹមតែកម្រិត ៤ ទៅ ៥ រយនាក់ក្នុង ១ ថ្ងៃ ប៉ុន្តែឥឡូវមិនក្រោម ១ ពាន់នាក់ទេក្នុង ១ ថ្ងៃ»។
កាលពីថ្ងៃទី ១៩ ខែកក្កដា ក្រុមហ៊ុន ឌីប៊ីឌី អ៊ីនជីនារីង ម.ក (DBD Engineering & Construction) បានធ្វើរ៉ូដសូ អំពីផែនការនៃការបោះផ្សាយមូលបត្រកម្មសិទ្ធិរបស់ខ្លួនលើទីផ្សារកំណើនរបស់ CSX ចំនួនជាង ៦,៤ លានភាគហ៊ុនក្នុងការកៀរគរទុនពីសាធារណជនប្រមាណ ៣ លានដុល្លារដើម្បីពង្រីកអាជីវកម្ម។ ក្រុមហ៊ុននេះនឹងក្លាយជាក្រុមហ៊ុនទី ១ ដែលបានបោះផ្សាយលើទីផ្សារកំណើននៃ CSX ដែលបានដាក់ដំណើរការតាំងពីឆ្នាំ ២០១៥។ DBD បានចាប់ផ្តើមលក់ចាប់ពីថ្ងៃទី ២៦ ខែកក្កដា ដល់ថ្ងៃទី ១៨ ខែសីហា ខាងមុខ៕ LA
