.jpg)
លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជា ថ្លែងនាពេលកន្លងទៅ។ ហេង ជីវ័ន
ភ្នំពេញៈ លោកស្រី ជា សិរី អគ្គនាយិកាបច្ចេកទេសធនាគារជាតិនៃកម្ពុជា (NBC) ត្រូវបានជ្រើសរើសធ្វើជាសមាជិកក្រុមប្រឹក្សាផ្ដល់យោបល់កាលពីថ្ងៃទី ២៦ ខែកក្កដា ឆ្នាំ ២០២១ នៃបណ្ដាញនវានុវត្តន៍ហិរញ្ញវត្ថុអាស៊ាន (AFIN) ជាទីដែលលោកស្រីរំពឹងថា នឹងឃើញវត្តមានរបស់បណ្តាក្រុមហ៊ុនក្នុងស្រុកពីវិស័យ FinTech និងគ្រឹះស្ថានហិរញ្ញវត្ថុ (FIs) របស់កម្ពុជា ឈរនៅលើវេទិកា APIX របស់សមាគមនេះ។
AFIN ត្រូវបានបង្កើតឡើងជាមួយបេសកកម្ម ដើម្បីជួយសម្រួលនវានុវត្តន៍ និងកិច្ចសហប្រតិបត្តិការរវាងគ្រឹះស្ថានហិរញ្ញវត្ថុ និង FinTech ជាកិច្ចខិតខំប្រឹងប្រែងដើម្បីផ្លាស់ប្តូរតាមបែបឌីជីថលនៃវិស័យធនាគារ និងហិរញ្ញវត្ថុនៅទូទាំងតំបន់អាស៊ាន និងលើសពីនេះទៀត ដើម្បីជំរុញបរិយាប័ន្នហិរញ្ញវត្ថុនៅទីបំផុត។ AFIN ប្រមូលផ្តុំអ្នកចូលរួមឧស្សាហកម្មហិរញ្ញវត្ថុ ដើម្បីស្វែងរក បង្កើត និងប្រើប្រាស់ដំណោះស្រាយឌីជីថលនវានុវត្តន៍នៅក្នុងប្រព័ន្ធអេកូស៊ីស្ដែម រួម។
លោកស្រី សិរី បានសរសេរលើទំព័រហ្វេសប៊ុកផ្លូវការផ្ទាល់ខ្លួនថា៖ «ខ្ញុំមានកិត្តិយស ដែលត្រូវបានអញ្ជើញជាសមាជិកនៃក្រុមប្រឹក្សាយោបល់នៃបណ្ដាញនវានុវត្តន៍ហិរញ្ញវត្ថុអាស៊ាន (AFIN)។ AFIN បានដាក់ឱ្យដំណើរការ API Exchange (APIX)។ APIX គឺជាទីផ្សារឆ្លងកាត់ព្រំដែនរបស់ពិភពលោក បើកចំហស្ថាបត្យកម្ម API និង ជាប្លាតហ្វ៉មស្នូលសម្រាប់ការសហការរវាង FinTechs និងគ្រឹះស្ថានហិរញ្ញវត្ថុ ដែលអ្នកចូលរួមអាចរួមបញ្ចូល និងសាកល្បងដំណោះស្រាយជាមួយគ្នាទៅវិញទៅមក តាមរយៈស្ថាបត្យកម្មខ្លោដ»។
លោកស្រីបន្ថែមថា៖ «នេះជាឱកាសសម្រាប់ FinTech នៅអាស៊ាន និងលើសពីនេះទៀត ដើម្បីបង្ហាញពិភពលោកនូវអ្វីដែលពួកគេបានទទួល។ ខ្ញុំធ្លាប់និយាយថា វាជាការតស៊ូរបស់យើងដែលយើងរកឃើញភាពច្នៃប្រឌិត។ ក្នុងករណីនេះអាស៊ានមិនខ្វះការតស៊ូទេ ហើយមិនខ្វះគំនិតនវានុវត្តន៍ផងដែរ។ វាជាតារាកំពុងរះ ខ្លួនខ្ញុំផ្ទាល់ ខ្ញុំទន្ទឹងរង់ចាំការមើលឃើញអ្នកនៅក្នុងវិស័យ FinTech និងគ្រឹះស្ថានហិរញ្ញវត្ថុ (FIs) របស់កម្ពុជានៅលើវេទិកា APIX»។
ស្ថិតក្រោមការដឹកនាំរបស់លោកស្រីកាលពីថ្ងៃទី ២៧ ខែតុលា ឆ្នាំ ២០២០ NBC បានដាក់ឱ្យដំណើរការវេទិកាទូទាត់ចល័តអន្តរធនាគារ ដែលគេស្គាល់ថា «ប្រព័ន្ធបាគង» ក្នុងគោលបំណងដើម្បីផ្ដល់សម្ទុះប្រកបដោយថាមពលទៅដល់វិស័យហិរញ្ញវត្ថុជនបទ អភិវឌ្ឍ និងលើកកម្ពស់បរិយាប័ន្នហិរញ្ញវត្ថុនៅក្នុងប្រទេសកម្ពុជា។
AFIN ត្រូវបានបង្កើតឡើងជាអង្គការមិនស្វែងរកប្រាក់ចំណេញក្នុងឆ្នាំ ២០១៨ ដោយសមាគមធនាគារិកអាស៊ាន សាជីវកម្មហិរញ្ញវត្ថុអន្តរជាតិសមាជិករបស់គ្រុបធនាគារពិភពលោក និងអាជ្ញាធររូបិយវត្ថុសិង្ហបុរី (MAS)៕ LA
